សម្តេចពិជ័យសេនា ទៀ បាញ់ លើកឡើងនូវការកត់សម្គាល់ថា សម្ព័ន្ធមេត្រីភាព រវាងអង្គភាពនៃកងយោធពលខេមរភូមិន្ទ ជាមួយស្ថាប័នអង្គភាពស៊ីវិល កំពុងស្ថិតក្នុងជំហានរីកចំរើន ដោយចាប់ផ្តើមពីការជួយឧបត្ថម្ភបំពេញកង្វះខាត វិវត្តន៍ប្រែប្រួល ឆ្ពោះទៅជាការជួយឧបត្ថម្ភ មានលក្ខណៈជាយុទ្ធសាស្រ្តសេដ្ឋកិច្ច យូរអង្វែង!
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក្នុងអង្គសិក្ខាសាលា ដកពិសោធន៍លើការងារសម្ព័ន្ធមេត្រីភាព រវាងអង្គភាពនៃកងយោធពលខេមរភូមិន្ទ ជាមួយស្ថាប័នអង្គភាពស៊ីវិលទិសយោធភូមិភាគទី៤ ដែលបានបិទបញ្ចប់នារសៀលថ្ងៃទី២៧ ខែមករា ឆ្នាំ២០២១ នៅសាលាខេត្តសៀមរាប បានផ្តល់នូវអនុសាសន៍សំខាន់ៗ និងទិសដៅភារកិច្ចមួយចំនួន ដោយផ្តោតទៅលើការជម្រុញ បន្តអនុវត្តតាមគោលនយោបាយ និងវិធានការជាយុទ្ធសាស្រ្តរបស់រាជរដ្ឋាភិបាល ក្នុងនោះអនុសាសន៍ដ៏ខ្ពង់ខ្ពស់របស់ សម្តេចតេជោ នាយករដ្ឋមន្រ្តី ក្នុងគោលដៅពង្រឹងខឿនការពាររបស់ប្រជាជន ដើម្បីធានាដល់ការការពារសន្តិភាព ឯករាជ្យ អធិបតេយ្យ បូរណភាពទឹកដី នៅគ្រប់កាលៈទេសៈ។
ការងារសម្ព័ន្ធមេត្រីភាព គឺស្ថិតនៅក្នុងកិច្ចសហការ ដែលមានលក្ខណៈជាប្រពៃណីល្អ រវាងកងទ័ពនិងប្រជាជន លើកកម្ពស់ “សិល្បៈនៃការចែករំលែក” បណ្តុះមនសិការចូលរួមដោយផ្ទាល់ ពីសំណាក់ប្រជាជនគ្រប់ស្រទាប់ វណ្ណៈ គ្រប់មជ្ឈដ្ឋាន ទាំងស្ថាប័នរដ្ឋ និងឯកជន ទាំងក្នុងនិងក្រៅប្រទេស មានលក្ខណៈសកម្មផុលផុស ជាមួយបណ្ដាអង្គភាព នៃកងយោធពលខេមរភូមិន្ទ។
សម្តេចពិជ័យសេនា ទៀ បាញ់ បង្ហាញថា៖ ប្រធានបទចំនួន៣ ដែលពាក់ព័ន្ធទៅនឹងអត្ថប្រយោជន៍ និងសារសំខាន់របស់ការងារសម្ព័ន្ធមេត្រីភាព រួមមានទី១ ការបង្វែរទិសមួយផ្នែកនៃជំនួយសម្ព័ន្ធមេត្រីភាព ឲ្យបំរើទស្សនវិស័យយូរអង្វែង ដូចជាការរួមចំណែកដល់ការគាំទ្រកំណែរទម្រង់កងយោធពលខេមរភូមិន្ទ ការស្ថាបនាសំណង់ការពារជាតិ ទី២ គឺរួមជាមួយដៃគូសម្ព័ន្ធមេត្រីភាពដែលមានស្រាប់ សហការផ្តួចផ្តើមរៀបចំគម្រោងអភិវឌ្ឍនានា ដើម្បីទ្រទ្រង់ជីវភាព សុខុមាលភាពយោធិន និងគ្រួសារយោធិន និងទី៣ គឺការបណ្តុះបណ្តាលធនធានមនុស្ស ជួយដល់កងទ័ព មុនចូលនិវត្ត។
សម្តេចពិជ័យ ក៏បានអំពាវនាវផងដែរ ដល់ស្ថាប័ន អង្គភាពស៊ីវិលរបស់រដ្ឋ ក៏ដូចជាក្រុមហ៊ុន សហគ្រាស អង្គការសមាគម វិស័យឯកជននិងសប្បុរសជននានា សូមចូលរួមបន្តការគាំទ្រចំពោះស្មារតីនៃវប្បធម៌ចែករំលែក និងអនុវត្តគោលនយោបាយនានា ដែលរាជរដ្ឋា-ភិបាលកម្ពុជាបានដាក់ចេញ ជាមួយនឹងការពង្រឹងនិងលើកកម្ពស់ប្រពៃណីដ៏ល្អនៅក្នុងចំណងសម្ព័ន្ធមេត្រីភាព បំផុសអប់រំលើកទឹកចិត្តចលនាមហាជន ប្រជាជន យុវជន ឱ្យចូលរួមជាកម្លាំងចលករនៅក្នុងបុព្វហេតុ”ការពារជាតិដើម្បីទាំងអស់គ្នា ទាំងអស់គ្នាដើម្បីការពារជាតិ” និង ”សន្តិភាពដើម្បីទាំងអស់គា្ន ទាំងអស់គ្នាដើម្បីសន្តិភាព”។
អត្ថបទ និង រូបថត ៖ លោក ងិន គឹមឡេង និងលោក យូ វង្ស
