ក្នុងមួយឆ្នាំៗ វិស័យទេសចរណ៍ពិភពលោក មានកំណើនក្នុងរង្វង់៥ភាគរយ ក្នុងនោះវិស័យអេកូទេសចរណ៍ និងទេសចរណ៍សហគមន៍ មានកំណើនប្រមាណ២០ភាគរយ ជារៀងរាល់ឆ្នាំ។ នេះបើតាម ការបង្ហាញនៅក្នុង វេទិកាជាតិអេកូទេសចរណ៍លើកទី២ នៅសាលសន្និសីទសុខា ក្នុងក្រុងសៀមរាប នាព្រឹកថ្ងៃទី២៧ ខែមករា ឆ្នាំ២០២១។
ប៉ុន្តែស្ថិតក្នុងបរិបទនៃការឆ្លងសាកលជំងឺកូវីដ-១៩ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងារអន្ដរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ លើកឡើងថា ចំនួនភ្ញៀវទេសចរអន្តរជាតិបានថយចុះយ៉ាងគំហុក ក្នុងន័យនេះ សន្ទុះកើនឡើងនៃអ្នកទេសចរណ៍ក្នុងស្រុក ជាផ្នែកមួយយ៉ាងសំខាន់ ក្នុងការលើកកម្ពស់សេដ្ឋកិច្ចរបស់ប្រជាពលរដ្ឋ នៅតាមសហគមន៍អេកូទេសចរណ៍ទូទាំងប្រទេស។
ឯកឧត្តម ថោង ខុនបន្តថា កម្ពុជាសំបូរទៅដោយសក្តានុពលទេសចរណ៍ ធម្មជាតិនៅទូទាំងប្រទេស ដូច្នេះការអភិវឌ្ឍន៍សហគមន៍ទេសចរណ៍ ពិតជារឿងចាំបាច់ណាស់ តែក្នុងនោះអាជ្ញាធរក៏ត្រូវផ្តល់សិទ្ធិអំណាចទៅកាន់សហគមន៍ ដើម្បីចាត់ចែងនិងអភិវឌ្ឍន៍សហគមន៍ដោយផ្ទាល់។
ឯកឧត្តមរដ្ឋមន្ត្រី ក៏បានគូសបញ្ជាក់ដែរថា ខណៈសហគមន៍ទេសចរណ៍ និងអេកូទេសចរណ៍ មានលក្ខណៈប្រទាក់ក្រឡាជាអន្តរវិស័យ និងអន្តរស្ថាប័ន ឯកឧត្តមបានស្នើឲ្យក្រសួង-ស្ថាប័នពាក់ព័ន្ធពិភាក្សាគ្នា រកដំណោះស្រាយទៅលើបញ្ហាសំខាន់ៗ ដូចជា ការស្ថាបនាផ្លូវតភ្ជាប់ទៅតំបន់សហគមន៍ ការផ្គត់ផ្គង់អគ្គិសនី ការផ្គត់ផ្គង់ទឹកស្អាត ការតភ្ជាប់ប្រព័ន្ធទូរស័ព្ទ និងប្រព័ន្ធអ៉ីនធើណេត ការគ្រប់គ្រងសំរាម ការដោះមីន និងគ្រាប់មិនទាន់ផ្ទុះ ការព្យាបាលជំងឺគ្រុនចាញ់ និងបញ្ហាផ្សេងៗរបស់សហគមន៍ ពិសេសឆ្លើយតបតាមតម្រូវការជាក់ស្តែងរបស់ប្រជាពលរដ្ឋមូលដ្ឋាន។
ទន្ទឹមនោះ ក្រុមការងារអន្តរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ ដែលមាន ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ជាប្រធាន ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានជំរុញលើកទឹកចិត្ត និងគាំទ្រដល់វិស័យឯកជន ពិសេសទីភ្នាក់ងារទេសចរណ៍កម្ពុជា ត្រូវបង្កើនការរៀបចំកញ្ចប់ទស្សនកិច្ចឱ្យបានច្រើនទៅកាន់តំបន់សហគមន៍នានានៅកម្ពុជា ដើម្បីចូលរួមជួយដោះស្រាយជីវភាពប្រជាពលរដ្ឋមូលដ្ឋាន ក្នុងដំណាក់កាលវិបត្តិជំងឺកូវីដ-១៩ និងក្រោយវិបត្តិនេះ។
អត្ថបទ និង រូបថត ៖ លោក ជា ស្រស់ និងលោក បូ សាវី
កែសម្រួលអត្ថបទ ៖ លោក សេង ផល្លី
