នៅរសៀលថ្ងៃទី០៨ ខែកុម្ភៈ ឆ្នាំ២០២១នេះ អាជ្ញាធរជាតិអប្សរា សម្រេចដកហូតដើមឈើ៤ដើមនៅលើដងផ្លូវ ក្នុងតំបន់រមណីដ្ឋានអង្គរ ស្ថិតក្នុងសង្កាត់នគរធំ ក្រុងសៀមរាប ដែលស្របតាមសំណូមពររបស់អាជ្ញាធរមូលដ្ឋាន ក្នុងហេតុផល បញ្ចៀសគ្រោះថ្នាក់ចរាចរណ៍ ដែលធ្លាប់កើតមាននាពេលកន្លងមក។
អ្នកនាំពាក្យ នឹងជាប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា លោក ឡុង កុសល បញ្ជាក់ថា ដើមឈើ៤ដើម ដែលត្រូវដកហូតបន្ទាន់នេះ មានដូចជា រួមមានដើមយាង ដើមដក-ព ដើមត្រាច និងដើមចំបក់ ដែលស្ថិតនៅតាមដងផ្លូវ ចាប់ពីចំណុចខាងកើតប្រាសាទអង្គរវត្ត រហូតដល់ប្រាសាទបន្ទាយក្តី។ ដើមឈើទាំង៤ដើមនេះដែរ មានសភាពដុះទ្រេតខ្លាំងជាប់គន្លងផ្លូវកង់ និងនៅជាប់ចំណុចផ្លូវកោង ដែលជាហេតុបង្កឲ្យមានគ្រោះថ្នាក់ចរាចរណ៍នាពេលកន្លងមក។
លោក ឡុង កុសល បន្ថែមថា ដោយមានការពិនិត្យយ៉ាងល្អិតល្អន់ពីមន្ត្រីជំនាញពាក់ព័ន្ធផងនោះ អាជ្ញាធរជាតិអប្សរាបានកំណត់ឃើញថា មានដើមឈើចំនួន១៩ដើមទៀត ដែលត្រូវមានការប្រុងប្រយ័ត្ន ដោយអាជ្ញាធរនឹងដាក់ស្លាកសញ្ញាចរាចរណ៍ ចំណាំងផ្លាតនៅលើដើមឈើទាំងនោះ ដើម្បីរក្សាទុកដើមឈើទាំងនេះ។
អត្ថបទ និង រូបភាព៖ ជា ស្រស់
