តាមការផ្សព្វផ្សាយរបស់រដ្ឋបាលខេត្តសៀមរាប ថ្ងៃទី៨ ខែកុម្ភៈ ឆ្នាំ២០២១ បង្ហាញថា ផ្លូវក្នុងក្រុងសៀមរាបចំនួន៨ខ្សែ នឹងត្រូវ បិទចរាចរណ៍ផ្លូវទាំងស្រុង និងដោយកំណាត់ ដើម្បីរៀបចំដាក់ បណ្តាញអគ្គិសនី ខ្សែកាប និងលូទឹកផ្សេងៗ។
តាមការផ្សព្វផ្សាយដដែលនេះ បញ្ជាក់ថា ការបិទចរាចរជាដំណាក់កាល និងដោយអន្លើៗនេះ អាស្រ័យដោយតម្រូវការពន្លឿនការសាងសង់គម្រោងហេដ្ឋារចនាសម្ព័ន្ធផ្លូវចំនួន ៣៨ខ្សែ ក្នុងក្រុងសៀមរាប ឲ្យបានលឿន ឆាប់រហ័ស និងប្រកបដោយគុណភាព។ ក្នុងនោះផ្លូវដែលត្រូវបិទចរាចរណ៍ទាំងស្រុង ឬបិទដោយកំណាត់ផ្លួវ រួមមាន:
១. ផ្លូវ អ៊ុ ឃុន ( ផ្លូវជាប់ខាងត្បូងគណបក្សប្រជាជន ទៅផ្លូវស៊ីវុត្ថា)
២. ផ្លូវមន្ទីរពេទ្យនាគទេពថ្មី
៣. ផ្លូវជន្លង់ ចេញមកស្ទឹងសៀមរាប
៤. ផ្លូវវត្តរាជបូព៌ ទៅស្តុបកោះកេរ្តិ៍ទៅត្បូង និងទៅវត្តពោធិ៍លង្កា
៥. ផ្លូវកូម៉ៃ ពីស្តុបសុខា ដល់មុខវត្តថ្មី ឬវត្តទេពពោធិ៍វង្ស
៦. ផ្លូវ ៣០ម៉ែត្រ
៧. ផ្លូវស្តុបទន្លេសាប ទៅជើង
៨.កំណាត់ផ្លូវវាងក្រុងពីក្រោលសេះ ទៅទីស្នាក់ការគយ (ភូមិសណ្តាន់ សង្កាត់ទឹកវិល )
ដោយឡែកក្រៅពីនេះ កំណាត់ផ្លូវបានបិទខ្លះត្រូវបានបិទរយៈពេលខ្លី ឬផ្នែកណាមួយ តែមានផ្លូវដែលអាចបញ្ចៀសចរាចរណ៍បាន។
តាមការឲ្យដឹងពី ក្រុមការងារកម្មការអន្តរក្រសួង នៃគម្រោងហេដ្ឋារចនាសម្ព័ន្ធផ្លូវចំនួន ៣៨ខ្សែ បង្ហាញថា គិតត្រឹមថ្ងៃទី២៥ ខែមករា ឆ្នាំ២០២១ លទ្ធផលនៃការសាងសង់គម្រោងហេដ្ឋារចនាសម្ព័ន្ធផ្លូវចំនួន ៣៨ខ្សែ ក្នុងក្រុងសៀមរាប សម្រេចបានជាង១៧ភាគរយ។
អត្ថបទ៖ មន្ទីរព័ត៌មានខេត្តសៀមរាប
