នាព្រឹកថ្ងៃទី១៥ ខែកុម្ភៈ ឆ្នាំ២O២១ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានអញ្ជើញបើកកិច្ចប្រជុំសាមញ្ញប្រចាំសប្តាហ៍ ដើម្បីត្រួតពិនិត្យវឌ្ឍនភាពការងារ ដែលបានលើកឡើងការពីសប្ដាហ៍កន្លងទៅ។
ថ្លែងក្នុងកិច្ចប្រជុំនោះ ឯកឧត្តម ខៀវ កាញារីទ្ធ បានជំរុញដល់ អគ្គនាយកដ្ឋានព័ត៌មាន និងសោតទស្សន៍ និងបណ្តាមន្ទីរព័ត៌មានទាំងអស់ ត្រូវធ្វើការពិនិត្យឡើងវិញ ចំពោះអង្គភាពសារព័ត៌មានឯកជនមួយចំនួន ដែលបានដើរបើកវគ្គបណ្តុះបណ្តាល ទាក់ទងទៅនឹង ការយកព័ត៌មានតាមប្រព័ន្ធទូរស័ព្ទដៃស្មាតហ្វូន ថាតើមានការស្នើសុំ និងការអនុញ្ញាត្តដែរឬយ៉ាងណា ហើយអ្វីជាគោលបំណងសំខាន់នៃវគ្គបណ្ដុះបណ្ដាលនោះ?
ឯកឧត្តមរដ្ឋមន្រ្តី បញ្ជាក់ថា ការត្រួតពិនិត្យលើបញ្ហានេះ គឺដើម្បីបង្ការ និងរួមគ្នាទប់ស្កាត់នូវព័ត៌មាន ក្លែងក្លាយ បើសិនជាបណ្តោយ ឲ្យមានក្រុមមានបំណងអាក្រក់បំពុលសង្គម គឺគេនឹងផ្សព្វផ្សាយនូវព័ត៌មាន ដែលមិនពិតជាច្រើននៅក្នុងបណ្តាញសង្គម ដែលនាំឲ្យមានការយល់ច្រឡំ និងពិបាកក្នុងការគ្រប់គ្រង។ ឯកឧត្តម ក៏បានរំលឹកពាក្យមួយថា រូបថត ១ សន្លឹក ស្មើនឹងសម្ដី ១ពាន់ពាក្យ ដូច្នេះយើងត្រូវរួមគ្នាពីគ្រប់ផ្នែក និងជំនាញទាំងអស់ មិនត្រឹមតែ ក្រសួងព័ត៌មាន នោះទេ គឺ ត្រូវក្តាប់ឲ្យបានពីសភាពការណ៍វិវឌ្ឍថ្មីៗ ដែលកើតមាន ឡើងនាពេល បច្ចុប្បន្ននេះ ទាំងព័ត៌មានពិត និងព័ត៌មានមិនពិត ដើម្បីធ្វើយ៉ាងណាបន្សាបព័ត៌មាន ក្លែងក្លាយ។
ទន្ទឹមនោះ ថ្នាក់ដឹកនាំតាមជំនាញពាក់ព័ន្ធ ក៏បានលើកឡើង ពីដំណើរការរៀបចំ កិច្ចប្រជុំអន្តរក្រសួងពាក់ព័ន្ធ សម្រាប់ត្រៀមរៀបចំកិច្ចប្រជុំកំពូលអាស៊ី-អឺរ៉ុប ដែលប្រទេសកម្ពុជា ត្រូវធ្វើជាម្ចាស់ផ្ទះ នេះប្រសិនសិនបើ ស្ថានភាពជំងឺកូវីដ-១៩ មានសភាពធូរស្រាល។ ដោយឡែក ចំពោះដំណើរការរៀបចំប្រព័ន្ធគ្រប់គ្រង ធនធានមនុស្ស នៃក្រសួងព័ត៌មាន គ្រោងនឹងធ្វើការបង្ហាញជូន នាថ្ងៃទី ២៣ ខែកុម្ភៈ ខាងមុខនេះ។
ពាក់ព័ន្ធនឹង កិច្ចប្រជុំកំពូលអាស៊ី-អឺរ៉ុប ឯកឧត្តមរដ្ឋមន្រ្តី បានជំរុញ ដល់គណៈកម្មការចងក្រងសៀវភៅ ស្ដីពីកម្ពុជា ឆ្នាំ២O២១ (Cambodia 2O21) ដាក់បញ្ជូលបន្ថែមនូវរូបភាព និងកិច្ចខិតខំប្រឹងប្រែងរបស់ប្រទេសកម្ពុជា ក្នុងការគ្រប់គ្រង ការឆ្លងរីករាលដាលនៃជំងឺកូវីត១៩ បានយ៉ាងល្អប្រសើរ និងធ្វើយ៉ាងណាឲ្យបានចប់រួចរាល់នៅមុន កិច្ចប្រជុំកំពូលនេះ ដើម្បីចែកជូនដល់ថ្នាក់ដឹកនាំ និងប្រមុខរដ្ឋ នៃបណ្តាប្រទេសនានា ដែលអញ្ជើញមកចូលរួម។
អត្ថបទ និងរូបភាព៖ ក្រសួងព័ត៌មាន