នៅរសៀលថ្ងៃទី១៥ ខែកុម្ភៈ ឆ្នាំ២០២១ សាខាកាកបាទក្រហមខេត្តសៀមរាប បានប្រគល់អំណោយមនុស្សធម៌ជូនសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តសៀមរាប ដែរអំណោយទាំងនោះមាន៖អង្ករ ៤.៥០០គីឡូក្រាម ,ទឹកបរិសុទ្ធ២០កេស ,មី៣០០កេសតូច អំពូលភ្លើងបំភ្លឺសូឡាចំនួន ៥ឈុត និងគ្រឿងឧបភោគបរិភោគមួយចំនួនទៀត។ ពិធីនេះប្រព្រឹត្តិទៅក្រោមវត្តមានលោកជំទាវ សុខ ណារ៉ូ ពៅហេង អនុប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប និងសហការី និងលោកជំទាវ ស៊ីន ណម ប្រធានសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្តសៀមរាប។
មានប្រសាសន៍នាឱកាសនោះដែរ លោកជំទាវ សុខ ណារ៉ូ ពៅហេង បានលើកឡើងថា អំណោយមនុស្សធម៌ដែលប្រគល់ជូន សមាគមនារីកម្ពុជាដើម្បីសន្ដិភាព និងអភិឌ្ឍន៍ខេត្តសៀមរាបនាពេលនេះ គឺជាអំណោយមនុស្សធម៌ដែលសាខាកាកបាទក្រហមកម្ពុជាខេត្ត ទទួលបានពីសប្បុរសជន ក្នុងការជួយគាំទ្រសកម្មភាពមនុស្សធម៌របស់កាកបាទក្រហមកម្ពុជា។ ប៉ុន្តែដោយមើលឃើញពីតម្រូវការចាំបាច់របស់សមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តសៀមរាប ក្នុងការជួយគ្រួសារងាយរងគ្រោះ ក្នុងក្រុមគោលដៅរបស់សមាគមនារីកម្ពុជាដើម្បីសន្ដិភាព និងអភិឌ្ឍន៍ខេត្ត ពិសេសដើម្បីគាំទ្រសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ហើយក៏ជាការអបអរដល់ថ្ងៃ ទិវាជាតិ សុខភាពមាតាទារក និងកុមារ នៅថ្ងៃទី ២១ ខែកុម្ភៈ ខាងមុខនេះ និង ការខ្វះខាតក្នុងក្រុងគ្រួសារពេលជួបនូវវិបត្តិជម្ងឺកូវិដ១៩ ទើបសាខាកាកបាទក្រហមកម្ពុជាខេត្តដែលមានឯកឧត្តម ទៀ សីហា ជាប្រធានគណៈកម្មាធិការសាខា សម្រេចផ្ដល់ជូននូវអំណោយមនុស្សធម៌នេះ ដើម្បីឲ្យសមាគមអាចចាត់ចែងជួយដល់ក្រុមគោលដៅបានតាមលទ្ធភាព។
ថ្លែងក្នុងឱកាសនោះដែរ លោកជំទាវ ស៊ិន ណម ក៏បានលើកផងដែរ អំពីសកម្មភាពរបស់សមាគមនារីកម្ពុជាដើម្បីសន្ដិភាព និងអភិវឌ្ឍន៍ខេត្ត បានអនុវត្តកន្លងមក។ ជាមួយគ្នានោះលោកជំទាវ បានថ្លែងអំណរគុណយ៉ាងជ្រាលជ្រៅ ដល់សាខាកាកបាទក្រហមកម្ពុជា ខេត្តសៀមរាប ពិសេសឯកឧត្តម ទៀ សីហា ប្រធានគណៈកម្មាធិការសាខា និងសប្បុរជនតាមរយៈសាខាកាកបាទក្រហមកម្ពុជា ខេត្តសៀមរាប ដែលបានចែករំលែកនូវអំណោយមនុស្សធម៌ដ៏ថ្លៃថ្លានេះ ដល់សមាគមនារីកម្ពុជាដើម្បីសន្ដិភាព និងអភិវឌ្ឍន៍ខេត្តសៀមរាប សម្រាប់ជួយដល់គ្រួសារស្ត្រីងាយរងគ្រោះនៅក្នុងក្រុមគោលដៅរបស់សមាគម ។ ក្នុងនោះដែរលោកជំទាវក៏បានលើកផងដែរ អំពីសកម្មភាពរបស់សមាគមនារីកម្ពុជាដើម្បីសន្ដិភាព និងអភិវឌ្ឍន៍ខេត្ត បានអនុវត្តកន្លងមកផងដែរ ។
ព័ត៌មានជាតិ ថ្មីៗ
អត្ថបទ និងរូបភាព៖ ទ្រា ពន្លឺ
