នៅព្រឹកថ្ងៃទី១៦ ខែកុម្ភៈ ឆ្នាំ២០២១នេះ ក្រុមប្រឹក្សាខេត្តសៀមរាប បានបើកវេទិកាផ្សព្វផ្សាយ និងពិគ្រោះយោបល់របស់ខ្លួន អាណត្តិទី៣ ឆ្នាំ២០២០ នៅគោលដៅទី១ សម្រាប់ស្រុកក្រឡាញ់ និងស្រុកស្រីស្នំ ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក នាក់ ណេរ៉ុន អភិបាលរងខេត្តសៀមរាប រួមជាមួយមន្រ្តីជំនាញថ្នាក់ខេត្ត ផ្នែកឯកជនដែលពាក់ព័ន្ធ មន្រ្តីថ្នាក់មូលដ្ឋាន ប្រជាពលរដ្ឋ គ្រូបង្រៀន និងសិស្សានុសិស្ស មកពីចំនួន២ស្រុក គឺស្រុកក្រឡាញ់ និងស្រុកស្រីស្នំ។
ឯកឧត្តម អ៊ាន ឃុន មានប្រសាសន៍ថា ក្នុងបរិបទនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ វេទិកាផ្សព្វផ្សាយ និងពិគ្រោះយោបល់ គឺជាកាលានុវត្តិភាព ដើម្បីផ្ដល់ឱកាសជូនបងប្អូនប្រជាពលរដ្ឋ អ្នកពាក់ព័ន្ធទាំងអស់ បានស្វែងយល់ពីស្ថានភាពទូទៅនៃការអភិវឌ្ឍខេត្ត ក្រុង ស្រុក ឃុំសង្កាត់ ព្រមទាំងបញ្ហាប្រឈមនានាដែលកើតមានឡើងកន្លងមក ពិសេសវេទិកានេះ នឹងផ្ដល់នូវឱកាសយ៉ាងធំធេងដល់ប្រជាពលរដ្ឋ នៅតាមមូលដ្ឋានបានលើកឡើងពីបញ្ហាប្រឈម ក្ដីកង្វល់ សំណូមពរនានា ដើម្បីឲ្យអាជ្ញាធរមានសមត្ថកិច្ច ពិនិត្យដោះស្រាយ និងឆ្លើយតបចំពោះតម្រូវការដែលបានលើកឡើង។ ឯកឧត្តមសង្ឃឹមយ៉ាងមុតមាំថា វាគ្មិននឹងធ្វើការបកស្រាយបំភ្លឺនូវសំណួរ សំណូមពរ ដែលប្រជាពលរដ្ឋបានលើកឡើង បានសមស្របតាមគោលបំណងនៃសាមីសំណួរសំណូមពរចង់បាន។
លោក នាក់ ណេរ៉ុន ក៏បានលើកឡើងផងដែរ អំពីគំនិតផ្តួចផ្តើមរបស់អភិបាលខេត្តសៀមរាប ដែលបានបង្ហាញនៅក្នុងកិច្ចប្រជុំសាមញ្ញលើកទី២១ របស់ក្រុមប្រឹក្សាខេត្តអណត្តិទី៣ ដែលថា ចាប់ពីពេលនេះ គប្បីបញ្ឈប់ការលើកគម្រោងស្ថាបនាផ្លូវក្រាលគ្រួសក្រហមនៅមូលដ្ឋាន ដោយការធ្វើកំណែរទម្រង់ចក្ខុវិស័យថ្មី ដោយការប្រើប្រាស់គម្រោងសាងសង់ផ្លូវបេតុងវិញ តាមលទ្ធភាពដែលអាចធ្វើបាន ដើម្បីអភិវឌ្ឍន៍បណ្តាញផ្លូវជនបទ ដែលជាបទដ្ឋានថ្មីសម្រាប់អនាគត។ លោកក៏បានជម្រុញឲ្យអាជ្ញាធរស្រុក-ឃុំ សិក្សារៀបចំឲ្យមានប្លង់គោលសម្រាប់ការអភិវឌ្ឍន៍មូលដ្ឋានរបស់ខ្លួន ចៀសវាងមានបញ្ហាប្រឈមនានាសម្រាប់ថ្ងៃអនាគត ដែលទាក់ទងទៅនឹងដំណោះស្រាយគោលនយោបាយនៃផលប៉ះពាល់នោះ។ ការចុះបញ្ជីដីធ្លីលក្ខណៈជាប្រព័ន្ធ ត្រូវតែមានភាពច្បាស់លាស់ ព្រោះវាមិនត្រឹមតែមានប្រយោជន៍ ក្នុងការផ្តល់កម្មសិទ្ធិអចលនទ្រព្យស្របច្បាប់ជូនប្រជាពលរដ្ឋបានប្រើប្រាស់ប៉ុណ្ណោះទេ តែក៏មានសារសំខាន់ សម្រាប់ការថែរក្សាការពារ ទ្រព្យសម្បត្តិសាធារណៈរបស់រដ្ឋផងដែរ។
គួរបញ្ជាក់ដែរថា នៅក្នុងវេទិកានេះ វាគ្មិនបានដោះស្រាយសំណួរ និងសំណូមពរ ដែលបានលើកឡើងដោយប្រជាពលរដ្ឋ មេភូមិ និងគ្រូបង្រៀនចំនួន១២សំណួរ-សំណូមពរ ដែលក្នុងនោះ ៧០ភាគរយ លើកឡើងអំពីបញ្ហាផ្លូវថ្នល់ និង៣០ភាគរយទៀត លើកឡើងអំពីវិស័យអប់រំ អគ្គីសនី និងជាសំនួរចម្ងល់លើបញ្ហាផ្សេងៗ៕
អត្ថបទ និងរូបភាព: លោក ងិន គីមឡេង ,លោកស៊ាន សុផាត
កែសម្រួល៖អ៊ុន ណារាជ្យ
