រយ:ពេល៤ថ្ងៃក្នុងឱកាសបុណ្យចូលឆ្នាំប្រពៃណីចិន វៀតណាម ថ្ងៃទី១១-១៤ ខែកុម្ភ: ឆ្នាំ២០២១ នៅទូទាំងខេត្តសៀមរាបទទួលបានភ្ញៀវទេសចរជាតិ-អន្តរជាតិជាង១១ម៉ឹន ៧ពាន់នាក់ (ដប់មួយម៉ឺនប្រាំពីរពាន់នាក់) មានការធ្លាក់ចុះជាងឆ្នាំមុន ដោយការធ្លាក់ចុះ គឺបណ្តាលមកពីវិបត្តិជាសាកល នៃជំងឺកូវីដ-១៩។
បើតាមលោក ង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បានឲ្យដឹងថាចាប់ពីថ្ងៃទី១១ មកដល់ថ្ងៃទី១៤ខែកុម្ភៈនេះ មានអ្នកទេសចរប្រមាណជាង១១ម៉ឺន៧ពាន់នាក់ ក្នុងនោះមាន ភ្ញៀវទេសចរបរទេសមានចំនួន ១.៧៨៩ នាក់ ថយចុះ ៨៩,៥៨% បើប្រៀបធៀបនឹងរយៈពេលដូចគ្នា ឆ្នាំ២០២០ មានចំនួន ១៧.១៦៨ នាក់ ។ ចំណែកភ្ញៀវទេសចរខ្មែរមានចំនួនប្រមាណ ១១ម៉ឺន៦ ពាន់នាក់ ក្នុងនោះតំបន់អង្គរមានចំនួនប្រមាណ ៨ម៉ឺន១ពាន់នាក់ និងប្រមាណ ៣ម៉ឺន៥ពាន់នាក់ទៀត ចូលទស្សនាតំបន់រមណីយដ្ឋាន និងសហគមន៍នានាក្នុងខេត្តសៀមរាបដូចជានៅឧទ្យានជាតិភ្នំគូលែន សហគមន៍ព្រៃទឹកជប់ខ្នារពោធិ៍ សហគមន៍ត្រាវកុដិ សហគមន៍បឹងឈូកបន្ទាយស្រី និងសហគមន៍ទេសចរណ៍បាគងភូមិខ្ញុំ ជាដើម៕
អត្ថបទ និង រូបភាព៖ ជា ស្រស់ ,ឈិត សាវី