នៅថ្ងៃទី២៥ ខែកុម្ភៈ ឆ្នាំ២០២១ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក ង៉ាន់ ភិរុណ អភិបាលរងខេត្តសៀមរាប បានអញ្ជើញបើក វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២០ គោលដៅទី៣ មានស្រុកបន្ទាយស្រី និងស្រុកអង្គរធំ ស្ថិតក្នុងបរិវេណវត្តសិលាចារ្យបន្ទាយស្រី ក្នុងស្រុកបន្ទាយស្រី ខេត្តសៀមរាប។
វេទិកានាឱកាសនោះដែរ ក្រុមការងារទទួលបានសំណួរ និងកង្វល់ផ្ទាល់មាត់ពីបងប្អូនប្រជាពលរដ្ឋចំនួន ១២សំណួរ សំណូមពរ ពាក់ព័ន្ឋទៅនឹងបញ្ហាដីធ្លី បញ្ហាគ្គីសនី សំណូមពរកសាងផ្លូវក្នុងមូលដ្ឋានជាដើម។ ក្នុងនោះមន្ត្រី និងអាជ្ញាធរពាក់ព័ន្ធបានបំភ្លឺទាំង ១២សំណួរ ដោយបានធ្វើការបកស្រាយបំភ្លឺឆ្លើយតបទៅនឹងសំណួរ កង្វល់របស់បងប្អូនប្រជាពលរដ្ឋជាបន្តបន្ទាប់។ដោយឡែក សំណួរសំណូមពរជាលាយលក្ខ័អក្សរចំនួន៣៤នៅមិនទាន់បានឆ្លើយបំភ្លឺ។
មានប្រសាសន៍បូកសរុប និងបិទវេទិកា ឯកឧត្តម អ៊ាន ឃុន មានថ្លែងកោតសរសើរចំពោះតំណាងមន្ទីរ-អង្គភាពនានាក្នុងខេត្ត ដែលបានធ្វើការបកស្រាយបំភ្លឺឆ្លើយតបទៅនឹងសំណួរកង្វល់របស់បងប្អូនប្រជាពលរដ្ឋ។ ជាមួយគ្នានោះចំពោះសំណួរ និងសំណូមពរដែលមិនទាន់បានបកស្រាយឆ្លើយតបជូនអង្គវេទិកាសូមរក្សាទុកសិនពុំទាន់អាចបកស្រាយបំភ្លឺបាន ក្រុមប្រឹក្សាខេត្តនឹងយកសំណួរ និងកង្វល់ទាំងនេះទៅពិនិត្យពិភាក្សាក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៏អក្សរដល់ម្ចាស់ សំណួរបងប្អូនប្រជាពលរដ្ឋតាមកាលវេលាសមគួរតាមរយៈមេឃុំមូលដ្ឋានដែលបងប្អូនរស់នៅ។
ឯកឧត្តមប្រធានក្រុមប្រឹក្សា បានវាយតម្លៃថាអង្គវេទិកាផ្សព្វផ្សាយ និងពិគ្រោះយោបល់នាពេលនេះពិតជាជំហានរីកចម្រើនថ្មីបន្ថែមទៀត សម្រាប់រដ្ឋបាលខេត្តសៀមរាប ក្នុងការអនុវត្តន៍មុខងាររបស់ខ្លួន ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋានឲ្យកាន់តែរឹងមាំ និងទំលំទូលាយ។ ចំពោះសំណួរ-សំណូមពរ ដែលពុំទាន់បានឆ្លើយតប នឹងត្រូវយកទៅពិនិត្យ ពិភាក្សាបន្ត ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយល័ក្ខអក្សរ តាមកាលវេលាសមគួរ តាមរយៈមេឃុំ ចៅសង្កាត់ នៅក្នុងមូលដ្ឋានដែលបងប្អូនប្រជាពលរដ្ឋរស់នៅ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ