បច្ចុប្បន្នវិស័យកម្មសិទ្ធិបញ្ញាបានដើរតួនាទីយ៉ាងសំខាន់សម្រាប់បំផុសគំនិតនៃការបង្កើតថ្មី ហើយក៏ជាការលើកទឹកចិត្តសម្រាប់ការប្រកួតប្រជែងក្នុងការប្រកបរបរនានានៅក្នុងសង្គមទំនើបនេះ។ លើសពីនេះទៅទៀត ចំពោះអ្នកដែលបង្កើតថ្មី កម្មសិទ្ធិបញ្ញា ក៏ជាផ្នែកមួយដែលបង្កើតចំណូលអកម្ម យ៉ាងច្រើនសន្ធឹកសន្ធាប់ នៅពេលដែលកម្មសិទ្ធិបញ្ញានៃផលិតផល ឬសេវាកម្មនោះ ត្រូវបានទទួលស្គាល់ ពេញនិយម និងត្រូវបានការពារដោយច្បាប់ ព្រោះថាម៉ាក និង ម៉ាកសម្គាល់ភូមិសាស្ត្រទំនិញ គឺជាអ្វីដែលអ្នករកទទួលទានចំពោះផលិតផលនានានៅក្នុងសហគមន៍ ឬនៅក្នុងតំបន់ណាមួយដែលមានសក្តានុពលសម្រាប់ផលិតផលនោះ កំពុងព្យាយាមបង្កើតឲ្យមានចំពោះមុខទំនិញក្នុងសហគមន៍ ឬក្នុងតំបន់របស់ខ្លួន។ នេះបើតាមការបង្ហាញពីលោក នាក់ ណេរ៉ុន អភិបាលរងខេត្តសៀមរាប ក្នុងឱកាសបើកសិក្ខាសាលា ស្តីពី “នីតិវិធីនៃការចុះបញ្ជីម៉ាក និងទស្សនទាននៃម៉ាកសម្គាល់ភូមិសាស្ត្រទំនិញ និងអត្ថប្រយោជន៍នៃកិច្ចការពារលើម៉ាកសម្គាល់ភូមិសាស្ត្រ” នៅថ្ងៃទី២៦ ខែកុម្ភៈ ឆ្នាំ២០២១នេះ។
លោកអភិបាលរងខេត្តសៀមរាប បញ្ជាក់ទៀតថា នៅក្នុងខេត្តសៀមរាបយើងនេះ ក៏មានមុខទំនិញ ឬផលិតផលនៅក្នុងតំបន់មួយចំនួន គឺជាមុខទំនិញ ឬផលិតផលដែលមានគុណភាព អាចយកទៅប្រកួតប្រជែងជាមួយផលិតផល ឬមុខទំនិញក្នុងស្រុក ឬអាចឈានទៅដល់ការប្រកួតប្រជែងក្រៅស្រុកផង។ ប៉ុន្តែការយល់ដឹងឲ្យច្បាស់អំពីម៉ាក និង ម៉ាកសម្គាល់ភូមិសាស្ត្រទំនិញ ព្រមទាំងនីតិវិធីនៃការចុះបញ្ជីជាក់ស្តែង គឺនៅតែមិនទាន់មានភាពច្បាស់លាស់ និងទូលំទូលាយនៅឡើយទេ ហេតុនេះសិក្ខាសាលានាថ្ងៃនេះ នឹងផ្តល់ជាប្រយោជន៍យ៉ាងច្រើនជូនដល់ប្រជាពលរដ្ឋនៅក្នុងខេត្តសៀមរាបយើង បានយល់ដឹងអំពីសារៈសំខាន់នៃកម្មសិទ្ធិបញ្ញា ឬដោយផ្តោតជាពិសេសចំពោះ ម៉ាក និង ម៉ាកសម្គាល់ភូមិសាស្ត្រទំនិញ នេះ នៅពេលនោះពួកគាត់នឹងព្យាយាមធ្វើឲ្យផលិតផល ឬមុខទំនិញរបស់ពួកគាត់ នឹងកាន់តែមានគុណភាពតាមស្តង់ដារ ដើម្បីយកទៅធ្វើការចុះបញ្ជីការពារ ក្នុងគោលបំណងធ្វើឲ្យផលិតផលនៅក្នុងតំបន់របស់ពួកគាត់ ត្រូវបានគេទទួលស្គាល់ មានការការពារដោយច្បាប់ ហើយនិងកើនតម្លៃ ព្រមទាំងមានភាពល្បីល្បាញ ដូចផលិតផល ឬមុខទំនិញនៅក្នុងខេត្តដទៃទៀតដែរ។
លោកស្រីមេធាវី សេង វួចហ៊ុន ប្រធានសមាគមកម្មសិទ្ធិបញ្ញាកម្ពុជា បានឲ្យដឹងថា នៅក្នុងប្រទេសជឿនលឿន វិស័យកម្មសិទ្ធិបញ្ញា បានដើរតួនាទីយ៉ាងសំខាន់នៅក្នុងចរន្តសេដ្ឋកិច្ចរបស់ប្រទេស ព្រោះថានៅពេលដែលកម្មសិទ្ធិបញ្ញាមានការពេញនិយម និងត្រូវបានការពារដោយច្បាប់ ពេលនោះគំនិតនៃការបង្កើតថ្មី និងការប្រកួតប្រជែងក្នុងការប្រកបរបរនានានៅក្នុងសង្គមទំនើបទាំងនោះ ក៏កាន់តែមានភាពសកម្មផងដែរ។ ជាក់ស្តែងការរីកចម្រើនក្នុងវិស័យកម្មសិទ្ធិបញ្ញា និងការរីកដុះដាលនៃអាជីវកម្មខ្នាតតូច ខ្នាតធំ និងខ្នាតមធ្យមនៅកម្ពុជា គឺជាផ្នែកមួយដែលធ្វើឲ្យប្រទេសកម្ពុជាអាចរក្សាបាននូវកំណើនសេដ្ឋកិច្ចក្នុងរង្វង់ ៦,៥ភាគរយ ក្នុងមួយឆ្នាំ ក្នុងរយៈពេលប៉ុន្មានឆ្នាំចុងក្រោយនេះ៕
អត្ថបទ និង រូបថត ៖ លោក ស៊ាន សុផាត ,ជា ស្រស់
កែសម្រួលអត្ថបទ ៖ លោក លីវ សាន្ត
