នៅព្រឹកថ្ងៃទី២៦ ខែកុម្ភៈ ឆ្នាំ២០២១ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានរៀបចំបើកសិក្ខាសាលាផ្សព្វផ្សាយស្តីពី ការអនុវត្តថវិកាកម្មវិធី និងរៀបចំផែនការសកម្មភាព(P3&P4) ឆ្នាំ២០២១ ដើម្បីធ្វើការផ្សព្វផ្សាយផែនការថវិកាកម្មវិធីឆ្នាំ២០២១ រៀបចំការអនុវត្តអោយទាន់ពេលវេលា ការទទួលបានការយល់ដឹងក្នុងការប្រែប្រួលនីតិវិធីនៃការទូរទាត់សម្រាប់ឆ្នាំ២០២១ និងការរៀបចំកែសម្រួលនូវផែនការសកម្មភាពសូចនាករឲ្យបានសមស្របតាមទំហំថវិកា។
ថ្លែងបូកសរុបនិងបិទអង្គសិក្ខាសាលា លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្ត មានប្រសាសន៍ថា ការអនុវត្តនូវថវិកាកម្មវិធី គឺតម្រូវឱយការលើកផែនការឱ្យស្របទៅនឹងកញ្ចប់ថវិកាដែលក្រសួងសេដ្ឋកិច្ចហិរញ្ញវត្ថុ ឬក្រសួងកសិកម្មរុក្ខាប្រមាញ់និងនេសាទដែលធ្វើវិភាជផ្តល់មកឱ្យអង្គភាពមន្ទីរនៅថ្នាក់ក្រោមជាតិ។ លោកក៏ជំរុញដល់ថ្នាក់ដឹកនាំមន្ទីរ ការិយាល័យជំនាញចំណុះឱ្យយកចិត្តទុកដាក់រៀបចំពិនិត្យឡើងវិញនូវផែនការដែលនឹងយកមកអនុវត្តក្នុងឆ្នាំ២០២១ ដែលជាផែនការ៣ឆ្នាំរំកិលរបស់មន្ទីរក៍ដូចជាផែនការរបស់ខេត្តដែរ ពោលគឺសកម្មភាពយកមកអនុវត្តសម្រាប់ឆ្នាំ២០២១ ជាការដកចេញពីផែនការ៣ឆ្នាំរំកិល ក្នុងនោះមុននឹងអនុវត្តក៍ត្រូវពិនិត្យឱ្យបានច្បាស់ត្រូវមានទំនាក់ទំនងល្អ និងសហការផ្តល់ព័ត៌មានគ្នាជាមួយថ្នាក់ក្រោមជាតិ(ក្រុងស្រុក) លើសពីនេះយកចិត្តទុកដាក់ចាត់ចែងប្រើប្រាស់ថវិកាឱ្យបានសមស្របតាមនិតិវិធី និងប្រកាសរបស់ក្រសួងសេដ្ឋកិច្ច និងហិរញ្ញវត្ថុ ក្នុងការប្រើប្រាស់កញ្ចប់ថវិកាឱ្យបានត្រឹមត្រូវទៅតាមគោលការណ៍ណែនាំដូចជា ការងារបណ្តុះបណ្តាល ការងារប្រជុំផ្សេងៗជាដើម និងចំពោះថវិកាសម្រាប់មន្ត្រីចុះបេសកកម្ម ក៍ត្រូវពិនិត្យពីទំហំការងារ សន្សំសំចៃ កាត់បន្ថយការចំណាយ ឱ្យសមស្របតែការ អនុវត្តមានប្រសិទ្ឋភាព។
លោក ទា គឹមសុទ្ឋ បន្ថែមថា ថវិកាកម្មវិធីរមែងមានការប្រែប្រួលជានិច្ចពីមួយឆ្នាំទៅមួយឆ្នាំ ហេតុនេះទាមទារមន្ត្រីដែលទទួលអនុវត្ត ត្រូវមានទំនាក់ទំនង សម្របសម្រួលគ្នាចៀសវាងកើតឡើងនូវបញ្ហា ធ្វើយ៉ាងណាឱ្យឆ្លើយតបទៅនឹងលទ្ឋផលរំពឹងទុកក្នុងផែនការ បើជួបបញ្ហាប្រឈមត្រូវរួមពិភាក្សាគ្នា រួមគ្នាដោះស្រាយ ប្រកបដោយការទទួលខុសត្រូវ។
គួរជម្រាបជូនថា ថវិកាកម្មវិធី Program Budgeting គឺជាផ្នែកដ៏សំខាន់មួយនៃកម្មវិធីកំណែទម្រង់ ការគ្រប់គ្រងហិរញ្ញវត្ថុសាធារណៈ ដែលជាការរៀបចំថវិកាដោយផ្នែកលើកម្មវិធីច្បាស់លាស់នូវធាតុចូលជាចំណាយចរន្ត និងចំណាយមូលធនសម្រាប់អនុវត្តចង្កោមសកម្មភាព ដើម្បីឆ្លើយតបទៅនឹងគោលនយោបាយរបស់ក្រសួង និងវាត្រូវមានសូចនាករសមិទ្ធិកម្មសម្រាប់យន្តការតាមដាន ត្រួតពិនិត្យ វាយតម្លៃ វាស់វែង ធ្វើរបាយការណ៍លទ្ធផលក្នុងឆ្នាំ និងលទ្ធផលចុងក្រោយទៅតាមកម្មវិធីនីមួយៗ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
