បើតាមមន្ទីរបញ្ចកោណបានឲ្យដឹងថា នៅថ្ងៃព្រហស្បតិ៍ម្សិលមិញ ប្រធានាធិបតីអាមេរីក លោក ចូ បៃដិន (ពេលវេលានៅវ៉ាស៊ីនតោន) បានបញ្ជាយោធាអាមេរិក បើកការវាយប្រហារតាមផ្លូវអាកាស ទៅលើមូលដ្ឋានជាច្រើនកន្លែង របស់ក្រុមសកម្មប្រយុទ្ធស៊ីអ៊ីតគាំទ្រដោយអ៊ីរ៉ង់ នៅក្នុងប្រទេសស៊ីរី។ នេះបើតាមការចេញផ្សាយ ដោយសារព័ត៌មាន Reuters នៅព្រឹកថ្ងៃសុក្រ នេះ ។
នៅក្នុងសេចក្ដីថ្លែងការណ៍មួយ អ្នកនាំពាក្យមន្ទីរបញ្ចកោណ លោក ចន ឃើប៊ី (John Kirby) បានគូសបញ្ជាក់ថា «ដោយមានបទបញ្ជាពីលោកប្រធានាធិបតី ចូ បៃដិន យោធាអាមេរិកនៅល្ងាចថ្ងៃព្រហស្បតិ៍មុននេះបន្តិច បានដឹកនាំការវាយប្រហារតាមផ្លូវអាកាសលើមូលដ្ឋាន និងហេដ្ឋរចនាសម្ព័ន្ធជាច្រើន ដែលត្រូវបានប្រើប្រាស់ដោយ ក្រុមសកម្មប្រយុទ្ធគាំទ្រដោយអ៊ីរ៉ង់ នៅឯភាគខាងកើតប្រទេសស៊ីរី»។ការវាយប្រហារនេះត្រូវបានគេមើលឃើញថា ជាការឆ្លើយតបទៅនឹងការវាយប្រហាដោយគ្រាប់រ៉ុក្កែត ប្រឆាំងនឹងយោធាអាមេរិក នៅក្នុងប្រទេសអ៊ីរ៉ាក់កាលពីថ្ងៃទី១៥ ខែកុម្ភៈ។
លោក John Kirby បានបន្ថែមទៀតថា លោក ចូ បៃដិន នឹងបន្តធ្វើសកម្មភាពនានា ដើម្បីការពារយោធាអាមេរិក និងក្រុមកម្លាំងចម្រុះអន្តរជាតិ។
គួរបញ្ជាក់ថា បើតាមលោក John Kirby ការវាយប្រហារតាមផ្លូវការអាកាសខាងលើ បានកម្ទេចមូលដ្ឋានជាច្រើននៅតាមបណ្ដោយព្រំដែន ដែលត្រូវបានប្រើប្រាស់ដោយ ក្រុមសកម្មប្រយុទ្ធគាំទ្រដោយអ៊ីរ៉ង់ ក្នុងនោះរួមមានដូចជាក្រុមសកម្មប្រយុទ្ធ កាតាអ៊ីប ហេសបូលឡាហ៍ (Kata’ib Hezbollah ឬ KH) និង កាតាអ៊ីប សាយយីដ អាល់ ស៊ូហាដា (Kata’ib Sayyid al-Shuhada ឬ KSS) ជាដើម។ ខណៈពេលនេះ មិនទាន់មានការបញ្ជាក់ណាមួយ អំពីទំហំនៃការបំផ្លិចបំផ្លាញ ឬអ្នកស្លាប់ និងរបួសនៅឡើយទេ ប៉ុន្តែការវាយប្រហារតាមផ្លូវអាកាសខាងលើ ហាក់ដូចជាបានកំណត់ជាមុននៃទំហំខូចខាត ដោយមិនចង់ឱ្យវាផ្ទុះទៅជាជម្លោះធំណាមួយ ខណៈរដ្ឋបាលលោក ចូ បៃដិន និងអ៊ីរ៉ង់កំពុងស្ថិតនៅក្នុងដំណាក់កាលពិចារណា ក្នុងការត្រលប់ចូលទៅកាន់ កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ឡើងវិញ៕
