នៅម៉ោងប្រមាណ៤ទាបភ្លឺ ថ្ងៃទី២៨ ខែកុម្ភៈ ឆ្នាំ២០២១ មានករណីគ្រោះថ្នាក់ចរាចរណ៍មួយកើតឡើង រវាងរថយន្តដឹកប្រេង និង រថយន្តដឹកចំណីសត្វ នៅលើកំណាត់ផ្លូវជាតិលេខ៦ ស្ថិតនៅភូមិថ្នល់ ឃុំល្វែងឬសី្ស ស្រុកជីក្រែង ខេត្តសៀមរាប បណ្ដាលឲ្យ មនុស្សម្នាក់ស្លាប់ និង រងរបួសធ្ងន់ស្រាល ០៣នាក់។
តាមការបញ្ជាក់របស់ លោកអធិការនគរបាលស្រុកជីក្រែង បង្ហាញថា ករណីគ្រោះថ្នាក់ចរាចរណ៍នេះ បណ្តាលឲ្យរថយន្តទាំង២គ្រឿង ខូចខាតធ្ងន់ធ្ងរ។ ក្នុងនោះ អ្នកបើកបរ រថយន្តដឹកប្រេងរបស់ក្រុមហ៊ុនPTT ភេទ ប្រុស អាយុ ៣៥ឆ្នាំ មានទីលំនៅភូមិក្រម៉ាមាស ឃុំអមលាំង ស្រុកថ្ពង ខេត្តកំពង់ស្ពឺ បានស្លាប់ និងអ្នករួមដំណើរម្នាក់រងរបួសស្រាល។ រីឯ អ្នកបើកបររថយន្តដឹកចំណីសត្វ របស់ក្រុមហ៊ុន L M H ភេទ ប្រុស អាយុ ៣៥ឆ្នាំ មានទីលំនៅ ភូមិទួលព្រះហា ឃុំមិនដឹង ស្រុកត្បួងឃ្មុំ ខេត្តត្បូងឃ្មុំ រងរបួសធ្ងន់ និងអ្នករួមដំណើរជាមួយម្នាក់រងរបួសស្រាល។
តាមរបាយការណ៍របស់សមត្ថកិច្ច ករណីគ្រោះថ្នាក់ចរាចរណ៍នេះ បណ្តាមកពីអ្នកបើកបររថយន្តដឹកប្រេង មិនប្រកាន់ស្តាំ។ ចំពោះសពជនរងគ្រោះ សមត្ថកិច្ចរងចាំប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ដោយឡែករថយន្តទាំងពីរ សមត្ថកិច្ចបានយកមករក្សាទុកនៅអធិការនគរបាលស្រុក ដើម្បីអនុវត្តន៍តាមនិតិវិធីច្បាប់ ៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
