នៅថ្ងៃទី២៥ ខែកុម្ភៈ ឆ្នាំ២០២១ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោកស្រី យូ សុភា អភិបាលរងខេត្តសៀមរាប បានអញ្ជើញបើក វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២០ គោលដៅទី៤ មានស្រុកសូទ្រនិគម និងស្រុកប្រាសាទបាគង ស្ថិតក្នុងវត្តប្រាសាទបន្ទាយស្រី ក្នុងស្រុកសូទ្រនិគម ខេត្តសៀមរាប ដែលមានអាជ្ញាធរមូលដ្ឋានគ្រប់លំដាប់ថ្នាក់ និងប្រជាពលរដ្ឋចូលរួមប្រមាណជាង៥០០នាក់។
មានប្រសាសន៍បើកអង្គវេទិកា ឯកឧត្តម អ៊ាន ឃុន គូសបញ្ជាក់ថា ការអភិវឌ្ឍប្រទេសជាតិ ការអភិវឌ្ឍមូលដ្ឋាន មានលទ្ធផលវិជ្ជមានទៅបាន ដរាបណាមានការចូលរួមជាមតិ-យោបល់ពីសំណាក់ប្រជាពលរដ្ឋ អង្គការសង្គមស៊ីវិល ផ្នែកឯកជន និងអ្នកពាក់ព័ន្ធផ្សេងៗទៀត។ ជាមួយគ្នានេះ ប្រជាពលរដ្ឋមានតួនាទីដ៏សំខាន់ ក្នុងការចូលរួមជាមួយអាជ្ញាធរមូលដ្ឋាន តាមរយៈនៃការរាយការណ៍អំពីបញ្ហាប្រឈមនានាដែលបានជួបប្រទះ និងដែលមិនអាចដោះស្រាយបាននៅក្នុងមូលដ្ឋានរបស់ខ្លួន។
ឯកឧត្តម អ៊ាន ឃុន មានថ្លែងកោតសរសើរចំពោះតំណាងមន្ទីរ-អង្គភាពនានាក្នុងខេត្ត និងអាជ្ញាធរគ្រប់លំដាប់ថ្នាក់ ដែលបានធ្វើការបកស្រាយបំភ្លឺឆ្លើយតបទៅនឹងសំណួរកង្វល់របស់បងប្អូនប្រជាពលរដ្ឋ។ ជាមួយគ្នានោះចំពោះសំណួរ និងសំណូមពរដែលមិនទាន់បានបកស្រាយឆ្លើយតបជូនអង្គវេទិកាសូមរក្សាទុកសិនពុំទាន់អាចបកស្រាយបំភ្លឺបាន ក្រុមប្រឹក្សាខេត្តនឹងយកសំណួរ និងកង្វល់ទាំងនេះទៅពិនិត្យពិភាក្សាក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៏អក្សរដល់ម្ចាស់សំណួរបងប្អូនប្រជាពលរដ្ឋតាមកាលវេលាសមគួរ តាមរយៈមេឃុំមូលដ្ឋានដែលបងប្អូនរស់នៅ។
ក្នុងឱកាសនោះដែរ លោកស្រី យូ សុភា ក៏បានលើកឡើងអំពីការងារផ្គត់ផ្គង់អគ្គីសនីនៅក្នុងខេត្តសៀមរាប ដែលមកដល់ពេលនេះលើ១០០ឃុំ-សង្កាត់ ស្មើនឹង៩១០ភូមិ មានប្រជាពលរដ្ឋចំនួន៨៩០ភូមិហើយ ដែលមានអគ្គីសនីប្រើប្រាស់ គឺនៅសល់តែ២០ភូមិទៀតប៉ុណ្ណោះ ដែលមិនមានបណ្តាញអគ្គីសនីទៅដល់ ដូចនេះ បញ្ហានេះ អង្គភាពអគ្គីសនីកម្ពុជាខេត្តសៀមរាប និងប្រតិបត្តិករដែលកំពុងវិនិយោគលើវិស័យនេះ ត្រូវសហការគ្នា គិតគូបន្ថែមទៀត ដើម្បីបំពេញតាមសំណូមពររបស់ប្រជាពលរដ្ឋ ស្របតាមផែនការយុទ្ធសាស្រ្តរបស់រាជរដ្ឋាភិបាល។
សូមបញ្ជាក់ថា ក្នុងវេទិកានាឱកាសនោះដែរ ក្រុមការងារទទួលបានសំណួរ ក្នុងនោះសំណូមពរនិងសំណួរផ្ទាល់មាត់ចំនួន១២ ត្រូវបានលើកឡើង រួមមានសំណូមពរជួសជុលកសាងផ្លូវនៅជនបទ ការរកដំណោះស្រាយលើបញ្ហាដីធ្លី បទអន្តរាគមន៍លើការប្រើប្រាស់ទំនប់ ប្រឡាយ ត្រពាំង បញ្ហាស្រែប្រាំង ការងារការពារនិងប្រើប្រាស់តំបន់ដីព្រៃលិចទឹក ការកាត់ឆ្វៀលគម្របដីព្រៃ បញ្ហាវិនិយោគលើសេវាកម្មផ្គត់ផ្គង់ទឹកស្អាត និងអគ្គីសនីជាដើម៕
អត្ថបទ និង រូបភាព៖ ងិន គីមឡេង
កែសម្រួល៖ អ៊ុន ណារាជ្យ
