នៅព្រឹកថ្ងៃទី០១ ខែមីនា ឆ្នាំ២០២១នេះ ក្រុមការងារចម្រុះរដ្ឋបាលខេត្តសៀមរាប ដោយមានការចង្អុលបង្ហាញពី ឯកឧត្តម ទៀ សីហា អភិបាលខេត្ដសៀមរាប បានបន្តចុះផ្សព្វផ្សាយពីការប្រើប្រាស់ QR Code លើទូរស័ព្ទដៃទំនើប ដើម្បីចូលរួមទប់ស្កាត់ការរីករាលដាលជំងឺកូវីដ-១៩ តាមទីសាធារណៈក្នុងក្រុងសៀមរាប។
លោក សុខ សីហា ប្រធានមន្ទីរប្រៃណីយ៍ និងទូរគមនាគមន៍ខេត្ត លើកឡើងថា៖ បន្ទាប់ពីរាជរដ្ឋាភិបាល បានប្រកាសពីព្រឹត្តិការណ៍ ២០កុម្ភៈ រដ្ឋបាលខេត្តសៀមរាប បានចូលរួមយ៉ាងសកម្ម ក្នុងការជំរុញផ្សព្វផ្សាយ ដល់គ្រប់ស្ថាប័នរដ្ឋ និងឯកជនទាំងអស់ក្នុងខេត្ត ចូលរួមប្រើប្រាស់ប្រព័ន្ធ QR Code Stop Covid-19 លើទូរស័ព្ទដៃទំនើប ដើម្បីបានដឹងពីទីតាំង និងបុគ្គលដែលអាចចម្លងជំងឺកូវីដ-១៩ ឬមានប្រវត្តិប៉ះពាល់អ្នកជំងឺកូវីដ-១៩ បន្ថែមពីលើវិធានសុវត្ថិភាពនានា ដែលមានស្រាប់។ ការផ្សព្វផ្សាយអប់រំពី ការបង្កើត និងការប្រើប្រាស់ប្រព័ន្ធ QR Code នេះ បានចុះទៅដល់បណ្តាមន្ទីរអង្គភាព គ្រឹះស្ថានសាធារណៈ សាលារៀន ភោជនីយដ្ឋាន ផ្សារទំនើប ទីតាំងអាជីវកម្មជាច្រើន ក្នុងក្រុងសៀមរាប។
លោកប្រធានមន្ទីរប្រៃណីយ៍ និងទូរគមនាគមន៍ខេត្ត ក៏បានអំពាវនាវដល់ប្រជាពលរដ្ឋ និងយុវជនទាំងអស់នៅក្នុងខេត្ដសៀមរាប ត្រូវចូលរួមទប់ស្កាត់ការពារការរីករាលដាលនៃជំងឺកូវីដ-១៩ ដោយចូលរួមប្រើប្រាស់ប្រព័ន្ធ QR Codeនេះ នៅពេលទៅដល់ទីកន្លែង ដែលមានបិទស្លាកសញ្ញានេះ ព្រមទាំងនៅកន្លែងធ្វើការរបស់ខ្លួន។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
