អ្នកនាំពាក្យក្រសួងសុខាភិបាលកម្ពុជា លោកជំទាវ ឱ វណ្ណឌីន បានអំពាវនាវដោយទទួចឲ្យបងប្អូនជនរួមជាតិទាំងអស់បង្កើនការប្រុងប្រយ័ត្នបន្ថែមទៀត ជាពិសេសអនុវត្តឲ្យបានម៉ត់ចត់បំផុតចំពោះ៣ការពារ និង៣កុំ ខណៈកម្ពុជាមានករណីស្លាប់ជាលើកដំបូងដោយសារមេរោគកូវីដ-១៩ ទៅលើបុរសជនជាតិខ្មែរម្នាក់ មានអាយុ៥០ឆ្នាំ។
ថ្លែងនៅក្នុងកិច្ចសម្ភាសន៍ពិសេសជាមួយទូរទស្សន៍ប៊ីធីវី នាថ្ងៃទី១១ ខែមីនា ឆ្នាំ២០២១នេះ លោកជំទាវ ឱ វណ្ណឌីន បានលើកឡើងថា បងប្អូនប្រជាពលរដ្ឋគ្រប់រូប ត្រូវរួមគ្នាគ្រប់ពេលវេលា និងគ្រប់កាល:ទេស:ទាំងអស់ ក្នុងការទប់ស្កាត់នៃការរីករាលដាលមេរោគកូវីដ-១៩នេះ ដោយមិនត្រូវមើលស្រាល អំពីស្ថានការណ៍នោះឡើយ ហើយទៅមុខទៀតក៏យើងមិនទាន់ដឹងថា វានឹងមានអ្វីធ្ងន់ធ្ងរជាងនេះទៅទៀតនោះផងដែរ។
លោកជំទាវ ឱ វណ្ណឌីន ក៏បានលើកអំពីករណីស្លាប់ បុរសខ្មែរម្នាក់ អាយុ៥០ឆ្នាំមានទីលំនៅក្នុងសង្កាត់ចាក់អង្រែ ខណ្ឌមានជ័យ រាជធានីភ្នំពេញ ដោយសារមេរោគកូវីដ-១៩ នាព្រឹកថ្ងៃនេះផងដែរ ដោយលោកជំទាវ បានបញ្ជាក់ថាមកពី ស្ថានភាពជំងឺរបស់បុរសនេះមានលក្ខណ:ធ្ងន់ធ្ងរបំផុតចំពោះសួតរបស់គាត់ ដែលមិនអាចជួយគាត់ឲ្យបាន។
ព័ត៌មានជាតិ ថ្មីៗ
លោកជំទាវ ឱ វណ្ណឌីន បានលើកឡើងថា ក្នុងនាមក្រសួងសុខាភិបាលកម្ពុជា មានការសោកស្តាយ យ៉ាងខ្លាំង ចំពោះករណីបុរសជនជាតិខ្មែរ ដែលបានស្លាប់ដោយសារមេរោគកាចសាហាវមួយ ហើយក្រសួងសុខាភិបាល សូមចូលរួមរំលែកទុក្ខជាមួយក្រុមគ្រួសារសពផងដែរ។
សូមរំលឹកថា មកដល់ថ្ងៃទី១១ ខែមីនា ឆ្នាំ២០២១នេះ ប្រទេសកម្ពុជាមានករណីឆ្លងនូវមេរោគកូវីដ១៩នេះឡើង ដល់ចំនួន១១៦៣នាក់ហើយ ដោយក្នុងនោះអ្នកជាសះស្បើយចំនួន៥៩៧នាក់ និងអ្នកបន្តសម្រាកព្យាបាលចំនួន៥៦៤នាក់ ហើយឆ្លងនៅក្នុងសហគមន៍ ២០កុម្ភ:មានចំនួន ៦៥២នាក់ ៕
អត្ថបទ: លោកបូ សាវី
កែសម្រួលដោយ លីវ សុខុន!!!
