នៅព្រឹកថ្ងៃទី ១៦ ខែ មីនា ឆ្នាំ២០២១នេះ នាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ បានដឹកនាំក្រុមការងារបច្ចេកទេសស្ពានថ្នល់នៃក្រសួងការពារជាតិ និងក្រសួងសាធារណការ និងដឹកជញ្ជូន បានធ្វើការត្រួតពិនិត្យបច្ចេកទេសរបស់កងវិស្វកម្ម១៧៨ ដែលទទួលការងារស្ថាបនាផ្លូវចំនួន១៣ខ្សែ ដែលជាចំណែកមួយនៃគម្រោងស្ថាបនាផ្លូវ៣៨ខ្សែក្នុងក្រុងសៀមរាប ។
បើតាមឧត្តមសេនីយ៍ឯក សឿន រឿត នាយករង នាយកដ្ឋានវិស្វកម្មក្រសួងការពារជាតិ បានឲ្យដឹងថា ចាប់ពីដំណើរការគម្រោងស្ថាបនាផ្លូវទាំង៣៨ខ្សែក្នុងក្រុងសៀមរាប កងវិស្វកម្ម១៧៨ ទទួលស្ថាបនាផ្លូវចំនួន១៣ខ្សែ ដែលជាផ្លូវស្ថិតក្នុងតំបន់មានភាពស្មុកស្មាញ ដែលបានធ្វើឲ្យប៉ះពាល់នូវសតិអារម្មណ៍របស់ប្រជាពលរដ្ឋរស់នៅអមសង្ខាងផ្លូវ។ ការងារស្ថាបនាផ្លូវទាំង១៣ខ្សែ មានប្រវែងសរុប ២៦,៥៤គីឡូម៉ែត្រ មកដល់ពេលនេះធ្វើបាន២៥%ហើយ ក្នុងនោះផ្លូវមួយចំនួនបានធ្វើការរៀបចំគ្រឹះ និងរៀបចំដាក់ប្រព័ន្ធលូទឹកភ្លៀង និងទឹកកខ្វក់បានរួចរាល់ហើយផ្លូវមួយចំនួនមានភាពយឺតយ៉ាវ ដោយខ្វះខាតលូ ដោយក្រុមហ៊ុនផលិតលូ ផ្គត់ផ្គង់ផ្តល់មិនទាន់ពេលវេលា និងការរង់ចាំការងារកប់បណ្តាញទឹកស្អាត បណ្តាញអគ្គិសនី និង ខ្សែកាបជាដើម។
នាយឧត្តមសេនីយ៍ ឃឹម ប៊ុនសុង បានវាយតម្លៃខ្ពស់ចំពោះកិច្ចដំណើរការរបស់ការដ្ឋានទាំងអស់ ក្នុងប្រតិបត្តិការណ៍របស់ខ្លួនប្រកបដោយភាពរលូនទទួលខុសត្រូវខ្ពស់ចំពោះវឌ្ឍនភាពនៃកិច្ចដំណើរការការដ្ឋានស្ថាបនាហេដ្ឋារចនាសម្ព័ន្ធផ្លូវ៣៨ខ្សែនៅក្រុងទេសចរណ៍សៀមរាប ដែលកំពុងឆ្ពោះទៅរកការអភិវឌ្ឍជាទីក្រុងទំនើប-ឆ្លាតវៃនាថ្ងៃអនាគតដែលជាចក្ខុវិស័យវែងឆ្ងាយនៃប្រមុខរាជរដ្ឋាភិបាលកម្ពុជា ដោយអនុវត្តតាមលក្ខណៈបច្ចេកទេសសៀវភៅបន្ទុកត្រឹមត្រូវដែលអាចនឹងរំពឹងទុកថា នឹងមានគុណភាពរឹងមាំអាចប្រើប្រាស់ជាប់បានយូរអង្វែង និងបញ្ចប់តាមផែនការដែលបានគ្រោងទុក។ ក្នុងដំណាក់កាលដំបូងនៃគម្រោងនេះ គឺការយកចិត្តទុកដាក់តាមដានការសាងសង់ស្រទាប់គ្រឹះផ្លូវប្រកបដោយគុណភាព ដែលតម្រូវឲ្យមានការគោរពតាមបទដ្ឋានបច្ចេកទេសសាងសង់ ចៀសវាងការសាងសង់រួច ត្រូវគាស់កកាយ ជួសជុលឡើងវិញ ដែលនាំឲ្យខាតបង់ថវិកា និងពេលវេលា ។
នាយឧត្តមសេនីយ៍ ក៏បានធ្វើការកោតសរសើរផងដែរចំពោះកងកម្លាំងវិស្វកម្មទាំងអស់ដែលបានខិតខំយកចិត្តទុកដាក់ខ្ពស់ ក្នុងការស្ថាបនាផ្លូវទៅតាមបទដ្ឋានបច្ចេកទេសសាងសង់ ព្រមទាំងបានធ្វើការដាក់ប្រព័ន្ធលូទឹកភ្លៀង និងទឹកកខ្វក់ប្រកបទៅដោយបច្ចេកទេសល្អ ក្នុងការធានាប្រើប្រាស់បានយូរអង្វែងទៀតផង៕
អត្ថបទ និង រូបភាព៖ ជា ស្រស់
កែសម្រួល៖ អ៊ុន ណារាជ្យ
