លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឲ្យដឹងថា នៅថ្ងៃទី១៧ ខែមីនា ឆ្នាំ២០២១នេះ ក្រុមការងារជំនាញ នៃនាយកដ្ឋានទ្រទ្រង់បច្ចេកទេសនិងគម្រោងអន្តរវិស័យ របស់អាជ្ញាធរជាតិអប្សរា បានធ្វើការជួសជុលស្ពានបណ្តែតទឹកនៅកសិន្ធុមុខប្រាសាទអង្គរវត្ត ដោយក្រុមការងារបានផ្លាស់ប្តូរពោងបណ្តែតដែលបានខូច ពោងសង្រ្គោះបន្ទាន់ លាបថ្នាំការពារ ផ្លាស់ប្តូរស្លាកសញ្ញា និងបង្កាន់ដៃ ដើម្បីលើកកម្ពស់សោភ័ណភាព ធានាសុវត្ថិភាព និងសម្រួលដល់ការធ្វើដំណើរចូលទស្សនាទៅកាន់ប្រាសាទអង្គរវត្តរបស់ភ្ញៀវទេសចរជាតិ និងអន្តរជាតិ។
លោកមានប្រសាសន៍ទៀតថា ស្ពានបណ្ដែតទឹកនេះ មានបណ្តោយប្រវែង១៧០ម៉ែត្រ និងទទឹង០៨ម៉ែត្រ ហើយត្រូវបានដាក់ឲ្យប្រើប្រាស់ជាផ្លូវការកាលពីថ្ងៃទី២៥ ខែឧសភា ឆ្នាំ២០១៧ បន្ទាប់ពីស្ពានហាលអង្គរ ត្រូវបានប្រកាសបិទមិនអនុញ្ញាតឲ្យធ្វើចរាចរណ៍ ដើម្បីធ្វើការជួសជុល ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
