នៅព្រឹកថ្ងៃទី១៩ ខែមីនា ឆ្នាំ២០២១ ឯកឧត្តម ទៀ សីហា អភិបាលនៃគណៈអភិបាលខេត្ត រួមជាមួយលោកលោកស្រីជាប្រធាន/អនុប្រធានមន្ទីរ-អង្គភាពក្នុងខេត្តសៀមរាប បានអញ្ជើញចូលរួមក្នុងកិច្ចប្រជុំគណៈកម្មការចំពោះកិច្ច ចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស តាមប្រព័ន្ធវីដេអូពីចម្ងាយ (Zoom) ក្រោមអធិបតីភាព លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស។
លោកជំទាវវេជ្ជបណ្ឌិត ឱ វណ្ណឌីន មានប្រសាសន៍ថា គណៈកម្មការដែលបានបង្កើតនេះមានតួនាទី និងភារកិច្ចគ្រប់គ្រង ដឹកនាំ ចាត់ចែង សម្របសម្រួល រៀបចំផែនការ ត្រួតពិនិត្យ តាមដាន និងវាយតម្លៃពីវឌ្ឍនភាពនៃការចាក់វ៉ាក់សាំងកូដ-១៩ការងារចាក់វ៉ាក់សាំងកូវីដ-១៩ និងធ្វើរបាយការណ៍ពីគណៈកម្មការចំពោះកិច្ច ចាក់វ៉ាក់សាំងកូវីដ-១៩ ថ្នាក់ក្រោមជាតិជូនទៅថ្នាក់ជាតិ ហើយគណៈកម្មការចំពោះកិច្ចថ្នាក់ជាតិរាយការណ៍ជូនទៅរាជរដ្ឋាភិបាល។ សមាជិកទាំងអស់នៃគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេសត្រូវ ចូលរួមប្រជុំ តាមការអញ្ជើញរបស់ប្រធាន និងអនុវត្តភារកិច្ច ទៅតាមការចាត់ចែងរបស់ប្រធាន។ កាលពីពេលថ្មីៗនេះសម្តេចតេជោ ហ៊ុន សែន បានផ្តល់មកគណៈកម្មការនេះនូវថវិកាចំនួន ១២ពាន់លានរៀល ជាថវិការាជរដ្ឋាភិបាល សម្រាប់ចាត់ចែងដំណើរការការងារ របស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេស ដោយថវិកានេះផ្តល់ទៅឱ្យគណៈកម្មការចំពោះកិច្ចចាក់វ៉ាក់សាំងកូវីដ-១៩នៅតាមរាជធានីខេត្តមួយផ្នែក និងមួយផ្នែកទៀតសម្រាប់ចាត់ចែងការងារនៅថ្នាក់កណ្តាល។
ក្នុងឱកាសនោះដែរលោកជំទាវ ក៏បានជម្រុញដល់អភិបាលនៃគណៈអភិបាល និងប្រធានមន្ទីរសុខាភិបាលទាំង២៥ រាជធានីខេត្ត ត្រូវរៀបចំផែនការគម្រោងចំណាយឱ្យបានច្បាស់លាស់ ដើម្បីគណៈកម្មការចំពោះកិច្ច ចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេសត្រូវពិនិត្យ និងបែងចែកជូនទៅដល់បណ្តាខេត្តឲ្យបានច្បាស់លាស់។ ជាមួយនោះលោកជំទាវបានណែនាំ និងដាក់បញ្ជាម៉ឹងម៉ាត់ដល់បណ្តាមន្ទីរសុខាភិបាលរាជធានីខេត្ត ត្រូវតែធានារក្សានិងមើលឱ្យបានម៉ត់ចត់នូវវ៉ាក់សាំងដែលបានចែកជូនហើយសម្រាប់ទុកចាក់ជំហានទី២(ដូស្តទី២)ជូនដល់អ្នកដែលបានចាក់លើកទី១ ដោយមិនត្រូវមានមនោសញ្ចេតនាអនុគ្រោះ តាមរយៈការបញ្ជាឬអន្តរាគមន៍ ពីនរណាឡើយបើអនុវត្តមិនបានទេ ព្រោះវានឹងបង្កឱ្យមានភាពច្របូកច្របល់ និងខ្វះថ្នាំសម្រាប់អ្នកចាក់លើកទី១ ដែលដល់កំណត់មកចាក់លើកទី២។ បន្ថែមពីនេះត្រូវពង្រឹងការងារគ្រប់គ្រងមន្ត្រីក្រោមឱវាទឱ្យបានល្អ ដើម្បីគ្រប់គ្រងទិន្នន័យនៃការមកទទួលចាក់វ៉ាក់សាំងទៅតាមតារាងផែនការឱ្យបានច្បាស់លាស់ និងត្រូវពន្លឿនប្រើប្រាស់វ៉ាក់សាំងឱ្យអស់តាមកាលកំណត់ និងច្បាស់លាស់៕
អត្ថបទ និងរូបភាព៖ យូ វង្ស ,ងិន គឹមឡេង
កែសម្រួល៖ អ៊ុន ណារាជ្យ
