ផ្លូវមួយខ្សែនៅចំណុចផ្លូវមិត្ដភាពកម្ពុជា-កូរ៉េ ស្ថិតនៅទីរួមស្រុកអង្គរធំ ជាផ្លូវឆ្ពោះទៅកាន់ស្រុកវ៉ារិន ស្រុកអង្គរជុំ ខេត្ដសៀមរាប បានរងការខូចខាតជាច្រើនឆ្នាំមក ដោយសាររថយន្ដដឹកថ្ម ដឹកដីឆ្លងកាត់បណ្ដាលអោយហុយប៉ះពាល់ដល់លំនៅឋានប្រជាពលរដ្ឋ និងអ្នកដំណើរដោយសារក្រុមហ៊ុនដឹកជញ្ជូននោះមិនស្រោចទឹក។
ប្រជាពលរដ្ឋមួយចំនួនរស់នៅក្នុងស្រុកអង្គរធំ ដែលរស់នៅតាមផ្លូវនោះបានត្អូញត្អែរថា ជារៀងរាល់ថ្ងៃពួកគាត់រងផលប៉ះពាល់ពីធូលីដីហុយចូលផ្ទះ និងពេលកំពុងធ្វើដំណើរបណ្ដាលអោយប៉ះពាល់សុខភាពពួកគាត់ ជាពិសេសប៉ះពាល់ដល់សិស្សធ្វើដំណើរទៅសាលារៀន ព្រោះតែមិនស្រោចទឹកផ្លូវ ខណៈដែលមានរថយន្ដរាប់រយគ្រឿងដឹកជញ្ជូនថ្ម ដីខ្សាច់ចេញពីតំបន់ភ្នំ ឆ្លងកាត់តាមបណ្ដោយផ្លូវនោះ។ ប្រជាពលរដ្ឋលើកឡើងទៀតថា កន្លងមកមានប្រជាពលរដ្ឋតវ៉ាអោយស្រោចទឹកជាច្រើនដងដែរ ប៉ុន្ដែខាងក្រុមហ៊ុនស្រោចទឹកបន្ដិចបន្ទួច ពោលស្រោចទឹកផ្លូវអោយគេមើលឃើញថែខ្លួនធ្វើប៉ុណ្ណោះ ពួកគាត់ក៏បានទទួចអោយអាជ្ញាធរជា ពិសេសរាជរដ្ឋាភិបាល ជម្រុញអោយក្រុមហ៊ុនដឹកជញ្ជូនថ្ម ដឹកជញ្ជូនដីខ្សាច់ តាមផ្លូវនោះស្រោចទឹកជាប្រចាំនិងមានសំណើមជោគជាំដើម្បីបំដីហុយ ចូលលំនៅឋានពួកគាត់ ស្រួលធ្វើដំណើរ និងជួយជួយជុលជុលផ្លូវនោះឡើងវិញព្រោះផ្លូវនោះមានសារៈសំខាន់ក្នុងការដឹកជញ្ជូនទំនិញកសិកម្ម។
ទាក់ទងបញ្ហានេះ លោក ឡុង រដ្ឋារក្ស អភិបាលស្រុកអង្គរធំ បានទទួលស្គាល់ថា ផ្លូវនោះពិតជាហុយធូលីមែន ព្រោះមានរថយន្ដក្រុមហ៊ុនកិនថ្មចំនួន៥ក្រុមហ៊ុនធ្វើចរាចរណ៍លើផ្លូវនោះ ហើយកន្លងមកអាជ្ញាធរក៍បានដាក់បញ្ជាអោយក្រុមហ៊ុន ធ្វើកិច្ចសន្យាស្រោចទឹកផ្លូវជាចាំផងដែរ ប៉ុន្ដែដោយសាររដូវក្ដៅពេកទើបមានដីហុយខ្លះៗ។ ជាមួយគ្នានោះលោកក៍បានស្នើរសុំទៅស្ថាប័នពាក់ព័ន្ធធ្វើការជួសជុលឡើងវិញ ប៉ុន្ដែមិនទាន់មានការឆ្លើយតបនៅឡើយ ។
លោកអភិបាលស្រុក បញ្ជាក់ទៀតថា ផ្លូវនេះមានប្រវែងជាង៤៦គីឡូម៉ែត្រ ចេញពីចំណុចផ្លូវមិត្ដភាពកម្ពុជា-កូរ៉េ ជិតទីរួមស្រុកអង្គរធំ ឆ្ពោះទីព្រំប្រទល់ស្រុកចំនួន៣ រួមមានស្រុកអង្គរធំ ស្រុកអង្គរជុំ និងស្រុកវ៉ារិន។ ផ្លូវនេះគម្រោងស្ថាបនារួចរាល់ម្ដងរួចមកហើយកាលពីឆ្នាំ២០១២ និងឆ្នាំ២០១៣ ប៉ុន្ដែរងការខូចខាតទៅវិញក្នុងរយៈពេលប៉ុន្មានឆ្នាំចុងក្រោយនេះ ដោយសារមានរថយន្ដធន់ធំធ្វើចរាចរណ៍ដឹកជញ្ជូនថ្ម ដីខ្សាច់ និងទំនិញផ្សេងៗជាដើម៕
ព័ត៌មានជាតិ ថ្មីៗ
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
