តាមរយៈសារសំឡេងរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា តាមប្រព័ន្ធអេឡិចត្រូនិចនាព្រឹកថ្ងៃទី១៩ ខែមីនា ឆ្នាំ២០២១នេះ បានបញ្ជាក់ថា វ៉ាក់សាំងប្រភេទ Sinovac ចំនួន១,៥លានដូស ដែលកម្ពុជាកម្មង់ទិញពីប្រទេសចិននោះ នឹងមកដល់នាថ្ងៃទី២៦ ខែមីនាខាងមុខនេះ ហើយវ៉ាក់សាំងនេះនឹងផ្តល់អាទិភាពចាក់ដល់មនុស្សវ័យ៦០ឆ្នាំឡើង ខណៈវ៉ាក់សាំង Sinopharm ដែលជាជំនួយរបស់ចិនដែរនោះ នឹងមកដល់មុនចូលឆ្នាំខ្មែរខាងមុខនេះផងដែរ។
ក្នុងសារសំឡេងនោះដែរ សម្តេចតេជោ ហ៊ុន សែន បានបញ្ជាក់បន្ថែមថា បន្ទាប់ពីថ្នាំវ៉ាក់សាំងទាំងពីរប្រភេទនេះមកដល់កម្ពុជា សម្តេចតេជោ ក៏បានស្នើដល់លោកជំទាវ ឱ វណ្ណឌីន ប្រធានគណៈកម្មការចំពោះកិច្ចសម្រាប់ការចាក់វ៉ាក់សាំង និងឯកឧត្តម ឃួង ស្រេង អភិបាលរាជធានីភ្នំពេញ ត្រូវពិភាក្សាគ្នាអំពីការបើកយុទ្ធនាការ១៥ថ្ងៃ ដើម្បីចាក់វ៉ាក់សាំង Astra Zeneca ដល់មនុស្សចាស់ដែលមានអាយុចាប់ពី៦០ឆ្នាំឡើង នៅក្នុងបណ្តាខណ្ឌទាំង១៤ នៅរាជធានីភ្នំពេញផងដែរ។ សម្តេចតេជោ ក៏បានបញ្ជាឱ្យមន្ទីរពេទ្យទាំងអស់ផ្អាកការចាក់វ៉ាក់សាំង Astra Zeneca ដល់អ្នកដែលមានអាយុក្រោម៦០ឆ្នាំជាបណ្តោះអាសន្នសិន ដើម្បីទុកលទ្ធភាពក្នុងការចាក់វ៉ាក់សាំងដល់មនុស្សចាស់ ចាប់ពីអាយុចាប់ពី៦០ឆ្នាំឡើង។ ប៉ុន្តែប្រសិនបើអ្នកទាំងនោះទទួលវ៉ាក់សាំងដូសទី១ហើយ ត្រូវបន្តអនុញ្ញាតឱ្យគាត់ទទួលបានដូសទី២បន្តទៀត ព្រោះវ៉ាក់សាំងមិនអាចចាក់តែ១លើកបានទេ។
សូមជម្រាបថា គិតមកដល់ថ្ងៃទី១៨ ខែមីនានេះ កម្ពុជាបានទទួលវ៉ាក់សាំងចំនួន២ប្រភេទរួមមាន៖ វ៉ាក់សាំង Sinopharm ដែលជាជំនួនរបស់ភាគីចិនជំហានដំបូងចំនួន៦០ម៉ឺនដូស និង Astra Zeneca ជាង៣២ម៉ឺន ដែលជាជំនួយតាមរយៈយន្តការកូវ៉ាក់។ ក្នុងនោះកម្ពុជាបានចាក់វ៉ាក់សាំងបង្ការជំងឺកូវីដ១៩ ដល់កងទ័ព មន្រ្តីរាជការ និងជនស៊ីវិល បានចំនួនជាង៣០ម៉ឺននាក់ហើយ៕
អត្ថបទ ៖ ឈិត សាវី
កែសម្រួល៖ អ៊ុន ណារាជ្យ
