កាលពីរសៀលថ្ងៃទី២១ ខែមីនា ឆ្នាំ២០២១នេះ ក្រុមយុវជនស្ម័គ្រចិត្ដ”តោះទៅលេងសៀមរាប” បានចុះធ្វើការផ្សព្វផ្សាយ និងជម្រុញអោយម្ចាស់អាជីវកម្មកន្លែងនីមួយៗ បិទQR Code នៅកន្លែងអាជីវកម្មឬភោជនីយដ្ឋានរបស់ខ្លួន ដើម្បីងាយតាមដានអ្នកសង្ស័យផ្ទុកមេរោគកូវីដ១៩ ដែលចូលទៅកន្លែងអាជីវកម្មរបស់ពួកគាត់ ខណៈដែលអាជ្ញាធរបាននឹកកំពុងរឹតបណ្ដឹងពីវិធានការការពារជំងឺកូវីដ១៩ ក្រោពេលរកឃើញបុរសម្នាក់ទៀតឆ្លងកូវីដ១៩ កាលពីថ្ងៃទី២០ ខែមីនាកន្លងទៅ។
បើតាមលោក ស៊ុន ចំណាន តំណាងក្រុមយុវជនស្ម័គ្រចិត្ដ ”តោះទៅលេងសៀមរាប” បានឲ្យដឹងថា ការបិទQR Code គឺម្ចាស់អាជីវកម្មខ្លះបានបិទរួចហើយ ប៉ុន្តែមួយចំនួនទៀតក៏មិនទាន់មាននៅឡើយ ទើបក្រុមលោកបានចាំផ្ដើមចុះធ្វើការផ្សព្វផ្សាយ និងណែនាំបន្ថែមដល់ពួកគាត់ ហើឲ្យពួកគាត់ណែនាំបន្តដល់អតិថិជនរបស់គាត់ អោយចេះពីរបៀបស្គេនQR Code នៅពេលពួកគាត់ចូលទិញទំនិញនៅកន្លែងណាមួយ។ ជាមួយគ្នានោះការដាក់ QR Code នៅតាមអាជីវកម្មនេះ ក៍មានភាពងាយស្រួលការតាមដានចំពោះពលរដ្ឋដែលមានការសង្ស័យមានវិជ្ជមានជំងឺកូវីដ១៩ ស្របពេលដែលក្រុងសៀមរាប បានរកឃើញអ្នកផ្ទុកមេរោគកូដវី១៩ម្នាក់ទៀតមកពីខេត្ដកណ្ដាល។
លោកបានបន្ដថា ការស្គេនQR Code មានសារៈប្រយោជន៍ច្រើនខ្លាំងណាស់សម្រាប់តាមដាន ជាពិសេសនៅពេលពួកគាត់បានស្គេនQR Code តាមរយៈទូរស័ព្ទដៃស្មាតហ្វូន ហើយបើប្រជាពលរដ្ឋគ្មានទូរស័ព្ទបែបនោះទេ ម្ចាស់ហាងត្រូវកត់ឈ្មោះអតិថិជនរបស់ខ្លួនទុក ដោយមានថ្ងៃខែចេញចូលត្រឹមត្រូវ។ ជាមួយគ្នានោះកន្លងមកក្រុមការងារក៍បានបិទQR Code នៅទីតាំងត្រួតពិនិត្យសុខភាពបឋមថ្មី នៅតាមព្រំប្រទល់ខេត្តសៀមរាប និងខេត្តជាប់ព្រំប្រទល់ដើម្បីអោយអ្នកដំណើរឆ្លងកាត់ចូលខេត្តបានស្គេន។
អត្ថបទ និងរូបភាព៖ ឈិត សាវី
កែសម្រួល៖ អ៊ុន ណារាជ្យ
