កាលពីថ្ងៃទី២៩ ខែមីនា ឆ្នាំ២០២១ម្សិលមិញនេះ សមាគមមរតកព្រះពុទ្ឋសាសនានិងសង្គម ដឹកនាំដោយព្រះតេជគុណ រតនឃោសកោ សោម សេរីរិទ្ឋី នាយកសមាគម រួមទាំងព្រះចៅអធិការវត្តប្រាសាទលលៃស្រុកប្រាសាទបាគង និងព្រះគ្រូសូត្រស្តាំវត្តពោធិបន្ទាយជ័យ ក្រុងសៀមរាប បាននិមន្ដចុះសួរសុខទុក្ខនិងនាំយកគ្រឿងឧបភោគបរិភោគជូនដល់ប្រជាពលរដ្ឋជាង១៣០នាក់កំពុងធ្វើចត្តាឡីស័ក នៅមណ្ឌលចត្តាឡីស័កសាលាសិក្សាសហគម ស្ថិតនៅក្នុងឃុំរើល ស្រុកពួកខេត្តសៀមរាប ដែលអំណោយទាំងនោះរួមមាន ៖ ត្រីខ ១៥០កំប៉ុង , មី ១២កែស , ទឹកក្រូច ៦កែស , ត្រីឆ្អើ ៣០ក្រាស , ស្កសរ ៥គីឡូក្រាម និង ទឹកបរិសុទ្ឋមួយចំនួន ។
ព្រះតេជគុណ រតនឃោសកោ សោម សេរីរិទ្ឋី នាយកសមាគមមានសង្ឃដីកាថា ដោយសារតែមេរោកូវីដ-១៩ បានធ្វើឱ្យប៉ះពាល់ដល់ជីវភាពប្រជាពុទ្ធបរិស័ទទូទៅ ដូច្នេះដោយមើលឃើញពីបញ្ហានេះ បានជាសមាគមត្រៀមស្បៀងអាហារខ្លះៗតាមលទ្ធភាពសម្រាប់ជួយដល់បងប្អូនប្រជាពុទ្ឋបរិស័ទដែលជួបការលំបាកក្នុងជីវភាពប្រចាំថ្ងៃ បង្ហាញពីទឹកព្រះទ័យ ព្រួយបារម្ភ ចែករំលែកនិងជួយទុក្ខធុរៈគ្នាក្នុងគ្រាលំបាក ព្រោះថា ការលំបាកនិងសេចក្តីទុក្ខរស់ញាតិញោម ក៏ជាការលំបាកនិងសេចក្តីទុក្ខរបស់ព្រះសង្ឃដែរ ជាពិសេសគឺជាឆន្ទៈចូលរួមជាមួយរាជរដ្ឋាភិបាល និងអាជ្ញាធរមូលដ្ឋានក្នុងការជួយបន្ឋូរបន្ថយខ្លះៗនូវតម្រូវការចាំចាច់របស់បងប្អូនកំពុងធ្វើចត្តាឡីស័ក ដែលមិនអាចចេញទៅណាបាន ដោយអនុវត្តទៅតាមការណែនាំរបស់ក្រសួងសុខាភិបាល និងអាជ្ញាធរមានសមត្ថកិច្ច។
ក្នុងឱកាសនោះដែរ ព្រះតេជគុណក៏បានណែនាំដល់អ្នកកំពុងធ្វើចត្តាឡីស័ក ក៍ដូចជាបងប្អូនប្រជាពលរដ្ឋក្នុងមូលដ្ឋានទាំងអស់ ត្រូវប្រុងប្រយ័ត្នឱ្យបានខ្ពស់ ជាពិសេសត្រូវអនុវត្តឱ្យបានជាប្រចាំនូវវិធានការ ៣ការពារនិង៣កុំរបស់សម្តេចតេជោ សែន នាយករដ្ឋមន្ត្រីនៃកម្ពុជា ក្នុងនោះ ៣ការពារ ៖ គឺដោយការពាក់ម៉ាស់ , លាងសំអាតដៃឱ្យបានញឹកញាប់ និង រក្សា គម្លាតសុវត្ថិភាពសង្គមបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅឱ្យបានគ្រប់ៗគ្នា និង ៣កុំ គឺកុំចូលទៅទីកន្លែងបិទជិតខ្យល់ចេញចូលនិងប្រើម៉ាស៊ីនត្រជាក់ច្រើន , កុំទៅទីដែលមានមនុស្សច្រើនកុះករ និង កុំប៉ះពាល់គ្នា ជាពិសេសត្រូវអនុវត្តឲ្យបានខ្ជាប់ខ្ជួនផងដែរ នូវវិធានការនានារបស់ក្រសួងសុខាភិបាល ដើម្បីរួមគ្នាទប់ស្កាត់ការឆ្លងរីករាលដាលមេរោគកូវីដ-១៩ចូលទៅក្នុងសហគមន៍របស់យើង ។
លោក ពិក រឹម មេឃុំរើល បានមានប្រសាសន៍ថ្លែងអំណរព្រះគុណ នូវព្រះទ័យយកចិត្តទុកដាក់របស់សមាគមមរតកព្រះពុទ្ឋសាសនានិងសង្គម ដែលបានជួយឧបត្ថម្ភស្បៀងអាហារនាពេលនេះ ស្របពេលដែលពួកគាត់ពិតជាជួបការលំបាកក្នុងជីវភាពមែន តែយ៉ាងណាអាជ្ញាធរមូលដ្ឋានតែងតែកៀរគរស្បៀងអាហារពីសប្បុរសជននានាទោះតិចក្តីច្រើនក្តី យកមកឧបត្ថម្ភជូនដល់ពួកគាត់ដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
