នៅយប់ថ្ងៃទី៣១ខែមីនាឆ្នាំ២០២១ មានករណីអគ្គិភ័យកើតឡើងដោយមិនដឹងមូលហេតុបានបណ្តាលឱ្យឆេះព្រៃ និងស្មៅអស់ប្រមាណជា២ហិកតា ស្ថិតនៅភូមិសាស្ត្រភូមិលលៃ ឃុំបាគង ស្រុកប្រាសាទបាគង ខេត្តសៀមរាប តាំងពីវេលាម៉ោង១៩ :៣០នាទី រហូតដល់ម៉ោង២១:០០នាទីយប់ ។ ករណីនេះ កម្លាំងនគរបាលស្រុកប្រាសាទបាគង បានប្រើប្រាស់រថយន្តពន្លត់អគ្គីភ័យ០១គ្រឿង សហការជាមួយបងប្អូនប្រជាពលរដ្ឋ និងបងប្អូនប្រជាការពារភូមិ ចុះធ្វើអន្តរាគមន៍បាញ់ទឹកពន្លត់ បានទាន់ពេលវេលាទើបមិនបណ្តាលឱ្យឆេះរាលដាលដល់លំនៅដ្ឋាន និងដំណាំរបស់បងប្អូនប្រជាពលរដ្ឋ ។នេះបើតាមលោក វរសេនីយឯក លឹម សម្បត្តិ អធិការ នៃអធិការដ្ឋាននគរបាលស្រុកប្រាសាទបាគង បានឱ្យអ្នកព័ត៌មានដឹងនៅព្រឹកថ្ងៃទី០១ ខែមេសាឆ្នាំ២០២១ នៅមុខអធិការដ្ឋាននគរបាលស្រុកប្រាសាទបាគង។
លោក វរសេនីយឯក លឹម សម្បត្តិ បញ្ជាក់ថា៖ ករណីអគ្គិភ័យនេះមិនទាន់ដឹងមូលហេតុនៅឡើយទេកំពុងតែធ្វើការស្រាវជ្រាវ តែយ៉ាងណាក៏ពុំបណ្តាលឱ្យគ្រោះថ្នាក់ដល់អាយុជីវិតមនុស្សសត្វ និងមិនបណ្តាលឱ្យខូចខាតទ្រព្យសម្បត្តិប្រជាពលរដ្ឋនោះដែរ ដោយសារកម្លំាងសមត្ថកិច្ចសហការជាមួយប្រជាពលរដ្ឋធ្វើការពន្លត់ទាន់ពេលវេលា។ក្នុងរយ:ពេលដើមឆ្នាំ២០២១ ករណីអគ្គិភ័យរបៀបនេះកើតឡើង២លើកហើយសម្រាប់ភូមិសាស្ត្រស្រុកប្រាសាទបាគង។ លោកបានអំពាវនាវ និងសំណូមពរដល់ប្រជាពលរដ្ឋ មេត្តាជួយបង្ការ និងទប់ស្កាត់ ចៀសវាងហេតុការណ៍អគ្គិភ័យនេះកើតឡើងជាយថាហេតុ ដែលនាំឱ្យកើតមានមហន្តរាយខូចខាតទ្រព្យសម្បត្តិ និងអាយុជីវិត។ សូមមេត្តាសង្កេតឱ្យគ្រប់ជ្រុងជ្រោយមុននឹងចាកចេញពីផ្ទះសូមពិនិត្យ និងបិទឱ្យអស់នូវឧបករណ៍ប្រើភ្លើងដែលបណ្តាលឱ្យឆាបឆេះផ្សេងៗ និងសូមរាយការណ៍ទៅសមត្ថកិច្ចជាបន្ទាន់ករណីមានអគ្គិភ័យកើតឡើងក្បែរលំនៅដ្ឋាន ឬភូមិសាស្ត្ររបស់ខ្លួន ៕
អត្ថបទ និងរូបភាព: លោក យូ វង្ស
កែសម្រួលដោយ លីវ សុខុន ។
