រយៈពេល២៣ថ្ងៃ ចាប់ពីថ្ងៃទី៩ ដល់ថ្ងៃទី៣១ ខែមីនា ឆ្នាំ២០២១ អ្នកបើកបរ និងអ្នកដំណើរជិត ៧មុឺននាក់ បានឆ្លងកាត់ប៉ុស្តិត្រួតពិនិត្យសុខភាពបឋម និងចុះឈ្មោះ ឬស្កែន QR Code ស្វែងរកអ្នកពាក់ព័ន្ធនឹងជំងឺកូវីដ-១៩ របស់រដ្ឋបាលខេត្តសៀមរាប នេះបើយោងតាមការបូកសរុបរបាយការណ៍ប្រចាំថ្ងៃ របស់ក្រុមការងាររដ្ឋបាលខេត្តសៀមរាប។
គួររំលឹកថា ប៉ុស្តិត្រួតពិនិត្យសុខភាពបឋម និងចុះឈ្មោះ ឬស្កែន QR Code ស្វែងរកអ្នកពាក់ព័ន្ធនឹងជំងឺកូវីដ-១៩ ត្រូវបានរដ្ឋបាលខេត្តសៀមរាប រៀបចំមួយទីតាំងដំបូង នៅថ្ងៃទី០៩ ខែមីនា ឆ្នាំ២០២១ ស្ថិតក្នុងស្រុកជីក្រែង មានព្រំប្រទល់នឹងខេត្តកំពង់ធំ។ ដោយមានភាពចាំបាច់ ក្នុងបង្ការទប់ស្កាត់ ការរាលដាលជំងឺកូវីដ-១៩ក្នុងសហគមន៍ រដ្ឋបាលខេត្តសៀមរាប បានរៀបចំបន្ថែមមួយទីតាំងទៀត នៅថ្ងៃទី២២ ខែមីនា ឆ្នាំ២០២១ ស្ថិតក្នុងស្រុកក្រឡាញ់ មានព្រំប្រទល់នឹងខេត្តបន្ទាយមានជ័យ។
តាមការបូកសរុបរបាយការណ៍ប្រចាំថ្ងៃនេះ បង្ហាញថា អ្នកបើកបរ និងអ្នកដំណើរ មកពីរាជធានីខេត្តចំនួន៥ បានឆ្លងកាត់ និងមកកាន់ខេត្តសៀមរាប រួមមានរាជធានីភ្នំពេញ ខេត្តព្រៃវែង ខេត្តកំពង់ធំ ខេត្តព្រះសីហនុ និងខេត្តកណ្ដាល ក្នុងនោះមានជនបរទេសសរុបចំនួន ២០នាក់ផងដែរ។
បើតាមប្រសាសន៍ឯកឧត្តមវេជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តសៀមរាប បញ្ជាក់កាលពីថ្ងៃទី១៧ ខែមីនាកន្លងទៅនេះថា ចំពោះអ្នកបើកបរ ក៏ដូចជាអ្នកដំណើរ ដែលមកពីតំបន់មានហានិភ័យខ្ពស់ នៃការរាលដាលជំងឺកូវីដ-១៩ ក្រុមការងារនៅប៉ុស្តិត្រួតពិនិត្យនឹងធ្វើការកត់សម្គាល់ ទន្ទឹមនោះ ក្រុមគ្រូពេទ្យមណ្ឌលចត្តាឡីស័ក នៃមន្ទីរសុខាភិបាលខេត្ត នឹងធ្វើការវិភាគវាយតម្លៃលើស្ថានភាពសុខភាពរបស់ពួកគាត់ផងដែរ។
គួរជម្រាបថា ប៉ុស្តិត្រួតពិនិត្យសុខភាពបឋម និងចុះឈ្មោះ ឬស្កែន QR Code ស្វែងរកអ្នកពាក់ព័ន្ធនឹងជំងឺកូវីដ-១៩ ចំនួន២ទីតាំង នៅព្រំប្រទល់ខេត្តសៀមរាប និងខេត្តកំពង់ធំ និងព្រំប្រទល់ខេត្តបន្ទាយមានជ័យ នៅបន្តសកម្មភាពពិនិត្យនិងស្រង់ស្ថិតិជាធម្មតាគិតមកទល់ថ្ងៃទី១ ខែមេសានេះ។ លើសពីនេះ រដ្ឋបាលខេត្តសៀមរាប ក៏បានធ្វើការណែនាំស្ដីកាតព្វកិច្ចការពាក់ម៉ាស និងរក្សាគម្លាតសុវត្ថិភាព ព្រមទាំងបានចុះធ្វើកិច្ចសន្យាជាមួយទីតាំងឯកជនដែលមិនអនុវត្តន៍ តាមសេចក្ដីប្រកាសរបស់ក្រសួងសុខាភិបាល កាតព្វកិច្ចពាក់ម៉ាស និងរក្សាគម្លាតបុគ្គល អំឡុងពេលនៃការរាលដាលជំងឺកូវីដ-១៩ ក្នុងសហគមន៍ ចុះថ្ងៃទី២២ ខែមីនា ឆ្នាំ២០២១ផងដែរ។
អត្ថបទ៖ លោក សេង ផល្លី
