មន្ទីរពេទ្យបង្អែក២កន្លែង និងមណ្ឌលសុខភាពចំនួន២០ទីតាំងផ្សេងទៀត នៅក្នុងខេត្តសៀមរាប ដែលប្រតិបត្តិការដោយគ្រូពេទ្យជំនាញចំនួន២៤ក្រុម បានដំណើរការចាក់វ៉ាក់សាំងស៊ីណូវ៉ាក់ បង្ការកូវីដ-១៩ ស្របពេលដែលដើមខែមេសានេះ ដំណើរការវិភាគចុងក្រោយ របស់អង្គការសុខភាពពិភពលោក(WHO)បានមើលឃើញថា វ៉ាក់សាំងផលិតដោយប្រទេសចិន ស៊ីណូវ៉ាក់ និងស៊ីណូហ្វាម មានប្រសិទ្ធភាពគ្រប់គ្រាន់តាមលក្ខខណ្ឌរបស់ WHO ហើយ។
ជាមួយនោះ វ៉ាក់សាំងបង្ការជម្ងឺកូវីដ-១៩ ស៊ីណូវ៉ាក់ បានដឹកជញ្ជូនមកដល់ខេត្តសៀមរាប កាលពីយប់ថ្ងៃទី៣១ ខែមីនា និងត្រូវបានដឹកជញ្ជូនបែងចែកបន្តទៅតាមបណ្តាគោលដៅនានា ក្នុងថ្ងៃទី០១ ខែមេសា។ ក្នុងដំណើររួមគ្នានៅក្នុងយុទ្ធនាការ ចាក់វ៉ាក់សាំងស៊ីណូវ៉ាក់នេះ គណ:កម្មការចំពោះកិច្ចរបស់ខេត្ត នៅខេត្តសៀមរាបយុទ្ធនាការនេះត្រូវបានចាប់ផ្តើមដំណើរការដំបូង ថ្ងៃទី០២ ខែមេសា ឆ្នាំ២០២១។ នេះបើយោងតាមការឲ្យដឹងពី លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប។
នៅក្នុងផែនការគ្របដណ្តប់ការចាក់វ៉ាក់សាំងប្រឆាំងជម្ងឺកូវីដ-១៩នេះ លោកវេជ្ជបណ្ឌិត ក្រុស សារ៉ាត់ បានបង្ហាញឲ្យដឹងថា លើគោលដៅទាំង១២ក្រុង-ស្រុក ត្រូវបានអនុគណ:កម្មការចំពោះកិច្ច រៀបចំឲ្យមានទីតាំងចាក់វ៉ាក់សាំងនេះចំនួន២២កន្លែង ក្នុងនោះរួមមាននៅមន្ទីរពេទ្យបង្អែក ខេត្តសៀមរាប និងមន្ទីរពេទ្យបង្អែកសូទ្រនិគម, ប្រតិបត្តិការដោយគ្រូពេទ្យចំនួន៤ក្រុម និងគ្រូពេទ្យចំនួន២០ក្រុមផ្សេងទៀត ត្រូវបានដាក់ពង្រាយនៅតាមបណ្តាមណ្ឌលសុខភាពចំនួន២០ទីតាំងទៀតទូទាំងខេត្ត។ សម្រាប់មួយថ្ងៃបូងនេះ វ៉ាក់សាំងប្រឆាំងជម្ងឺកូវីដ-១៩ ស៊ីណូវ៉ាក់ ប្រមាណជា ៤,០០០ដូស ត្រូវបានចាក់ជូនថ្នាក់ដឹកនាំ និងមន្រ្តីរាជការជុំវិញខេត្ត មន្រ្តីរដ្ឋបាលមូលដ្ឋានគ្រប់លំដាប់ថ្នាក់ រួមទាំងមន្រ្តីបុគ្គលិកចូលនិវត្តផងដែរ តាមគោលការណ៍ស្ម័គ្រចិត្ត មិនគិតកម្រៃ និងមិនប្រកាន់និន្នាការអ្វីនោះឡើយ។
សូមជម្រាបថា វ៉ាក់សាំងស៊ីណូវ៉ាក់ និងស៊ីណូហ្វាម ត្រូវបានចរាចរឱ្យប្រើប្រាស់នៅលើបណ្តាប្រទេសជាច្រើនក្នុងពិភពលោក ឆ្លើយតបទៅនឹងការរាតត្បាតនៃជម្ងឺកូវីដ-១៩ ក្រោមចំណងជើងថា៖ ទីបំផុត ទៅ! អង្គការសុខភាពពិភពលោកសម្រេចថា ” វ៉ាក់សាំងចិន មានប្រសិទ្ធភាពគ្រប់គ្រាន់តាមលក្ខខណ្ឌរបស់ WHO ហើយ” ដែរត្រូវបានចេញផ្សាយដោយគេហទំព័រក្នុងស្រុក កាលពីថ្ងៃទី០១ ខែមេសានេះ ដោយយោងតាមប្រភពព័ត៌មានពីបរទេស(CGTN )។ ប្រធានក្រុមជំនាញរបស់អង្គការ សុខភាពពិភពលោក បង្ហើបឲ្យដឹងថា វ៉ាក់សាំង ស៊ីណូវ៉ាក់ និងស៊ីណូហ្វាម ដែលផលិតដោយប្រទេសចិន កំពុងស្ថិតក្នុងដំណើរការវិភាគចុងក្រោយរបស់អង្គការសុខភាពពិភពលោក ហើយអាចនឹងត្រូវសម្រេចឆាប់ៗនេះ សម្រាប់ការដាក់ប្រើប្រាស់ជាផ្លូវការ ព្រោះវាមានប្រសិទ្ធភាពគ្រប់គ្រាន់តាមលក្ខខណ្ឌរបស់WHO ហើយសេចក្តីប្រកាសការសម្រេចចិត្តនោះ អាចនឹងធ្វើឡើងជាសាធារណៈ នាអំឡុងដើមខែមេសាឆ្នាំ២០២១នេះ៕
អត្ថបទ និងរូបភាព៖ ងិន គឹមឡេង ,ទ្រា ពន្លឺ
កែសម្រួល៖ លីវ សុខុន
