នៅថ្ងៃទី៣១ ខែមីនា ឆ្នាំ២០២១ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀសីហា អភិបាល នៃគណៈអភិបាលខេត្ត ឯកឧត្តម អែល សៀត សមាជិកក្រុមប្រឹក្សាខេត្តសៀមរាប បានដឹកនាំក្រុមការងារ ចុះពិនិត្យទីតាំងសម្រាបរៀបចំទុកបញ្ចុះសពជូនសាសនិកឥស្លាមក្នុងខេត្ត ក្នុងករណីស្លាប់ដោយសារជំងឺកូវីដ-១៩ នៅក្នុងខេត្តសៀមរាប។
ក្នុងឱកាសនោះដែរ លោក ពិន ប្រាកដ មានប្រសាសន៍ថា ការចុះពិនិត្យនេះដែរក្រុមការងារបានសម្រេចយកទីតាំងមួយ ដែលធានាបាននូវសុវត្ថិភាពស្របតាមការណែនាំរបស់រាជរដ្ឋាភិបាល ក្រសួងសុខាភិបាល ក៏ដូចជាមន្ទីរសុខាភិបាលខេត្តសៀមរាប ក្នុងរៀបចំកន្លែងបញ្ចុះសពជូនសាសនិកឥស្លាម ធានាបានយ៉ាងណាមិនឱ្យឆ្លងដល់អ្នកដ៍ទៃ។ ហើយចំពោះទីតាំងដែលត្រូវបញ្ចុះសព គឺស្ថិតនៅក្នុងភូមិគោកក្រើល ឃុំលាងដៃ ស្រុកអង្គរធំ ខេត្តសៀមរាប ។ ជាមួយគ្នានោះលោកអភិបាលរងខេត្ត ក៏សូមសំណូមពរដល់បងប្អូនប្រជាពលរដ្ឋទាំងអស់គ្នា ត្រូវបន្តប្រុងប្រយ័ត្នបន្ថែមទៀតក្នុងការពារកុំឲ្យជំងឺនេះចូលមកដល់ក្រុមគ្រួសាររបស់ខ្លួន និងសូមចូលរួមផ្សព្វផ្សាយពីច្បាប់ស្តីពី ការទប់ស្កាត់ការឆ្លងរាលដាលនៃជំងឺកូវីដ១៩ និងអនុក្រឹត្យស្តីពីវិធានការចត្តាឡីស័កដើម្បីទប់ស្កាត់ការឆ្លងរាលដាលនៃជំងឺកូវីដ១៩។
គូររំលឹកថា កន្លងមករដ្ឋាភិបាលបានសម្រេចថា ប្រសិនបើមានករណីស្លាប់ដោយសារជំងឺកូវីដ១៩ គឺត្រូវបូជាទាំងអស់ ប៉ុន្តែក្នុងនោះដោយមានការស្នើសុំពីសាសនិកឥស្លាមចំពោះសាស និកឥស្លាមប្រសិនបើមានករណីស្លាប់ដោយសារជំងឺកូវីដ១៩ គឺសុំបញ្ចុះសព ដោយក្នុងនោះប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានអនុញ្ញាតតែត្រូវរៀបចំឲ្យស្របតាមការណែនាំរបស់ក្រសួងសុខាភិបាល៕
អត្ថបទ និង រូបភាព៖ ទ្រា ពន្លឺ
