នារសៀលថ្ងៃទី០៥ ខែមេសា ឆ្នាំ២០២១ លោក លី សំរិទ្ឋ និងលោក នាក់ ណេរ៉ុន អភិបាលរងខេត្តតំណាងដ៍ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ដោយមានការចូលរួមដោយ លោកនាយករដ្ឋបាលខេត្ត នាយកទីចាត់ការរដ្ឋបាល នាយកទីចាត់ការអន្តរវិស័យរបស់រដ្ឋបាលខេត្ត ប្រធានមន្ទីរព័ត៌មានខេត្ត អនុប្រធានមន្ទីរសុខាភិបាលខេត្ត បានអញ្ជើញចូលរួម ក្នុងកិច្ចប្រជុំជាមួយក្រសួងយុត្តិធម៌តាមប្រព័ន្ធវីដេអូពីចម្ងាយ(Zoom) ក្រោមអធិបតីភាពដឹកនាំកិច្ចប្រជុំ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ ជាមួយតំណាងរដ្ឋបាលរាជធានីខេត្តទាំង២៥ ក្នុងគោលបំណងដើម្បីពិគ្រោះយោបល់ និងឆ្លើយឆ្លងនូវសំណួរ-ចម្លើយ ជុំវិញច្បាប់អនុក្រឹត្យ និងលិខិតបទដ្ឋានគតិយុត្តិនានា ដើម្បីពន្យល់ និងផ្សព្វផ្សាយអំពីវិធានការតាមផ្លូវច្បាប់នានាទាក់ទងនឹងការទប់ស្កាត់ការរីករាលដាលនៃជំងឺកូវីដ-១៩ និងចំណាត់ការទាក់ទងនឹងការដាក់ចេញនូវវិធានការនានារបស់រដ្ឋបាលរាជធានីខេត្ត។
ក្នុងឱកាសនោះ ឯកឧត្តម កើត រិទ្ធ បានពន្យល់បកស្រាយ ពីវិសាលភាពនៃអនុក្រិតលេខ៥៧ ស្តីពីវិធានការរដ្ឋបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។ អនុក្រិតនេះមាន៧ជំពូក និងចែកជា២៣មាត្រា ចុះហត្ថលេខានៅថ្ងៃទី៣១ ខែមីនា ឆ្នាំ២០២១ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។ អនុក្រិតនេះ បានកំណត់អំពីវិធានការរដ្ឋបាលស្របតាមច្បាប់ ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត សំដៅការពារអាយុជីវិតរបស់ប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈព្រមទាំងកាត់បន្ថយឱ្យបានជាអតិបរិមានូវផលប៉ះពាល់នៃការឆ្លងជំងឺនេះ ចំពោះវិស័យសង្គម និងសេដ្ឋកិច្ចនៅក្នុងប្រទេសកម្ពុជា។
ឯកឧត្តម កើត រិទ្ធ បន្តថា ចំពោះអនុក្រិតលេខ៣៧មាន៨ជំពូក និងចែកចេញជា៣៥មាត្រា ចុះហត្ថលេខានៅថ្ងៃទី១២ ខែមីនាឆ្នាំ ២០១២ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានចែងបទបញ្ញត្តិប្រភេទ និងខ្លឹមសារនៃវិធានការសុខាភិបាល ក្នុងនោះមានចែងជាផ្នែកទី១ ការធ្វើអនាម័យការវាស់កម្តៅការពាក់ម៉ាស់ និងការរក្សាគម្លាតសុវត្ថិភាព និងផ្នែកទី២ការធ្វើសេចក្តីប្រកាសសុខភាព ការយកសំណាកទៅវិភាគរកមេរោគកូវីដ-១៩ ការធ្វើចត្តាឡីស័កការដាក់ឱ្យនៅដាច់ដោយឡែកដើម្បីទទួលការព្យាបាល ផ្នែកទី៣ ការគ្រប់គ្រងការចាត់ចែងសាកសពដែលមានផ្ទុកមេរោគកូវីដ-១៩ និងផ្នែកទី៤ការចាក់វ៉ាក់សាំងការពារជំងឺកូវីដ-១៩។ល៕
អត្ថបទ និង រូបភាព៖ យូ វង្ស
