សមាគមនារីកម្ពុជាដើម្បីសន្តិភាព និងអភិវឌ្ឍន៍គ្រប់លំដាប់ថ្នាក់ បានធ្វើការទំនាក់ទំនង សហការជាមួយអាជ្ញាធរមូលដ្ឋាន អង្គការជាតិ អន្តរជាតិ សប្បុរសជន (កាកបាទក្រហម) វិស័យឯកជន និងម្ចាស់ជំនួយផ្សេងៗទៀត ដើម្បីស្វែងរកការគាំទ្រផ្នែកស្មារតី ធនធាន ដែលជាកត្តាសំខាន់ក្នុងការរួម ចំណែកឆ្លើយតបទៅនឹងសេចក្តីត្រូវការរបស់បងប្អូនប្រជាពលរដ្ឋ ជាពិសេសផលប្រយោជន៍របស់ស្ត្រី និងកុមារ នៅតាមសហគមន៍។
ជាក់ស្តែង នាព្រឹកថ្ងៃទី០៨ ខែមេសា ឆ្នាំ២០២១នេះ លោក ជំទាវ ស៊ិន ណម អនុប្រធាន សមាជិកាសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ខេត្ត បានថ្លែងនៅក្នុងពិធីប្រគល់អំណោយនៅសាលាខេត្តសៀមរាបថា អំណោយដែលចែកជូនដល់ស្ត្រីក្រីកសកម្មលើការងារនៅមូលដ្ឋានទាំងអស់នេះ សរុបចំនួន ២១០គ្រួសារ ក្នុងនោះមានក្រុង, ស្រុក ចំនួន ៧ គឺ÷ ក្រុងសៀមរាប, ស្រុកក្រឡាញ់, ស្រុកពួក, ស្រុកប្រាសាទបាគង, ស្រុកសូទ្រនិគម, ស្រុកជីក្រែង និងស្រុកអង្គរធំ។ អំណោយទទួលបានពីសាខាកាកបាទក្រហមកម្ពុជា ពីលោកជំទាវ-លោកស្រីភរិយាថ្នាក់ដឹកនាំ និងសប្បុរសជន តាមរយ:លោកជំទាវ ទាង អេង ទៀ សីហា ប្រធានកិត្តិយសគណ:កម្មការសាខាសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្ត កាលពីថ្ងៃទី២៥ ខែតុលា ឆ្នាំ២០២០ និងថ្ងៃទី១៥ ខែកុម្ភ: ឆ្នាំ២០២១កន្លងមក រួមមាន ៖ ១- សាខាកាកបាទក្រហមកម្ពុជាខេត្តសៀមរាប មានអង្ករចំនួន ៤,៥០០គ.ក្រ, ទឹកសុទ្ធចំនួន ២០កេះ។ ២- លោកជំទាវ គៀន ស្រីនាង ទ្រីភាព មានអង្ករ ១តោន, ត្រីខ ៥០យួរ, ទឹកស៊ីអ៊ីវ ៥០យួរ និងមីម៉ាម៉ាចំនួន ៥០កេស។ ៣- លោកជំទាវ សុខ ណារ៉ូ ពៅ ហេង មានថវិកាចំនួន ៣០០ដុល្លា(បន្ថែមទៅលើទឹកស៊ីអ៊ីវ ទឹកត្រីនិងត្រីខកំប៉ុង)។ ៤-លោកស្រី អេង សុខហ្គិច មានមីជាតិ ចំនួន ៣០០កេស។ ៥-លោកស្រី នៅ ច័ន្ទពិនី មានភួយចំនួន៥០ភួយ។
លោកជំទាវ បានបញ្ជាក់ថា អំណោយទាំងអស់នេះ គឺបានមកពីការរួបរួមសាមគ្គីបានធ្វើការទំនាក់ទំនង សហការជាមួយអាជ្ញាធរមូលដ្ឋាន អង្គការជាតិ អន្តរជាតិ សប្បុរសជ សប្បុរសធម៌ (កាកបាទក្រហម) វិស័យឯកជន និងម្ចាស់ជំនួយផ្សេងៗទៀត ដើម្បីស្វែងរកការគាំទ្រផ្នែកស្មារតីធនធាន ដែលជាកត្តាសំខាន់ក្នុងការរួមចំណែកឆ្លើយតបទៅនឹងសេចក្តីត្រូវការរបស់បងប្អូនប្រជាពលរដ្ឋ។ អំណោយដែលទទួលបានពីសប្បុរសជនទាំងអស់ គឺខាងសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត ចំពោះថវិកាសរុប ចំនួន ៩,៥៦០,០០០រៀល ដែលបានចំណាយទៅលើការទិញគ្រឿងឧបភោគបន្ថែម និងថវិកាឧបត្ថម្ភដល់គ្រួសារទាំង២១០គ្រួសារផងដែរ ។ ដោយសារស្ថានភាពនៃការរីករាលដាលជំងឺកូវីដ- ១៩ និង ដើម្បីចូលរួមទប់ស្កាត់ជំងឺកាចសាហាវនេះ ទើបសាខាសមាគមនារី សម្រេចអញ្ជើញ លោកស្រីជាប្រធានអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រុង ស្រុក មកទទួលអំណោយដោយផ្ទាល់ និងធ្វើការចែកបន្តទៅដល់ស្ត្រីក្រីក្រ ដែលសកម្មលើការងារមូលដ្ឋាន ដោយក្នុង ១ស្រុកៗ មានចំនួន៣០គ្រួសារ, ហើយក្នុង ១គ្រួសារត្រូវទទួលបាន អង្ករចំនួន ២៥គីឡូក្រាម, មី១កេស, ត្រីខ ១យួរ, ទឹកស៊ីអីវ ១យួរ, ទឹកត្រី ១យួរ និងថវិកាចំនួន ២០,០០០រៀល៕
ព័ត៌មានជាតិ ថ្មីៗ
អត្ថបទ និងរូបភាព: លោក ស៊ាន សុផាត កែសម្រួលដោយ លីវ សុខុន
