បើយោងតាមសេចក្តីប្រកាសព័ត៌មានរបស់រដ្ឋបាលខេត្តសៀមរាប បានឲ្យដឹងថា នៅថ្ងៃទី០៨ ខែមេសា ឆ្នាំ២០២១នេះ មានករណីរកឃើញថ្មីអ្នកវិជ្ជមានមេរោគកូវីដ-១៩ ថ្មីចំនួន០២នាក់ដែរពាក់ព័ន្ធនឹងហាងកាហ្វេលឹង្គ១០០០ និងបុរសអ្នកបើករថយន្តតាក់ស៊ី ដែលមានផ្ទុកមេរោគកូវីដ-១៩។
សេចក្តីប្រកាសព័ត៌មានដដែលបានឲ្យដឹងថា អ្នកដែលមានផ្ទុកជំងឺកូវីដ-១៩ ទាំង២នាក់ខាងលើរួមមាន៖ ទី១.ឈ្មោះ ទាវ សូវៀត ភេទប្រុស អាយុ ៣០ឆ្នាំ រស់នៅភូមិវត្តស្វាយ សង្កាត់សាលាកំរើក ក្រុងសៀមរាប ដែលបានទៅហាងកាហ្វេលឹង្គ១០០០ កាលពីថ្ងៃទី១៨ ខែមីនា ឆ្នាំ២០២១ ,ទី២.ឈ្មោះ ពុធ សំអាត ភេទប្រុស អាយុ ៣២ឆ្នាំ រស់នៅភូមិតាភុល សង្កាត់ស្វាយដង្គំ ក្រុងសៀមរាប ដែលបានទៅហាងកាហ្វេលឹង្គ១០០០ កាលពីថ្ងៃទី២៣ ខែមីនា ឆ្នាំ២០២១។
ជាមួយគ្នានេះរដ្ឋបាលខេត្តសៀមរាប ក៏សូមណែនាំដល់បងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានទាំងពីរនាក់ខាងលើ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤ / ០៧៧ ៧៨៩ ០០១ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
សូមជម្រាបថា កាលពីថ្ងៃទី២៧ ខែមីនា ឆ្នាំ២០២១កន្លងទៅ ខេត្តសៀមរាបមានបុរសជាអ្នកបើកបររថយន្តតាក់ស៊ី ត្រូវបានក្រុមគ្រូពេទ្យរកឃើញថា មានវិជ្ជមានមេរោគកូវីដ១៩។ បន្ទាប់ពីសាកសួរបុរសរូបនេះធ្លាប់ទៅទទួលទាននំបញ្ចុក នៅភូមិព្រះដាក់ និងទៅទីកន្លែងមួយចំនួនទៀត ដូចជាហាងកាហ្វេលឹង្គ១០០០នៅក្រុងសៀមរាប។ ក្នុងនោះបុគ្គលិកម្នាក់ និងភ្ញៀវម្នាក់របស់ហាងកាហ្វេលឹង្គ១០០០នេះ ត្រូវបានអាជ្ញាធរសុខាភិបាលរកឃើញមានវិជ្ជមានមេរោគកូវីដ១៩ និងបើគិតទាំងករណីថ្មីដែលទើបនឹងរកឃើញនេះ បង្ហាញថាអ្នកពាក់ព័ន្ធជាមួយហាងកាហ្វេនេះមាន អ្នកវិជ្ជមានកូវីដ១៩ បានកើនដល់៤នាក់៕
អត្ថបទ៖ ជា ស្រស់
កែសម្រួល៖ អ៊ុន ណារាជ្យ
