កាលពីថ្ងៃទី៨ខែមេសាឆ្នាំ២០២១ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានអញ្ជើញចុះត្រួតពិនិត្យការចាក់វ៉ាក់សាំងស៊ីណូហ្វាម (Sinopharm) ការពារជំងឺកូវីដ-១៩ លើកទី១ ជូនដល់គ្រួសារកងទ័ព ចំណុះទីបញ្ជាការយោធភូមិភាគ នៅមន្ទីពេទ្យយោធភូមិភាគទី៤ កងទ័ពជើងគោក ខេត្តសៀមរាប។ ការចាក់វ៉ាក់សាំងនេះធ្វើឡើងចាប់ថ្ងៃទី៨ដល់ថ្ងៃទី១០ខែមេសាឆ្នាំ២០២១ នៅមន្ទីរពេទ្យយោធភូមិភាគទី៤ខេត្ដសៀមរាប។
នាឱកាសនោះ ឯកឧត្តម មេបញ្ជាការ មានប្រសាសន៍ផ្តាំផ្ញើដល់បងប្អូនក្រុមគ្រួសារ ដែលបានមកចាក់វ៉ាក់សាំងនាពេលនេះថា សូមកុំមានការព្រួយបារម្ភ ឬភ័យខ្លាច បន្ទាប់ពីបានចាក់វ៉ាក់សាំង មានអាការៈមិនស្រួលខ្លូនបន្តិចបន្តួច វាមិនមានបញ្ហាប៉ះពាល់ដល់អាយុជីវិតនោះឡើយ កន្លងមកមន្ទីរពេទ្យយោធភូមិភាគទី៤ បានចាក់វ៉ាក់សាំងស៊ីណូហ្វាមការពារជំងឺឆ្លងកូវិដ១៩នេះដល់កងកំលាំងប្រដាប់អាវុធ បានចំនួនជាងពីរម៉ឺននាក់រួចមកហើយ ដោយពុំមាននរណាម្នាក់មានបញ្ហាប៉ះពាល់សុខភាពធ្ងន់ធ្ងរ ឬអាយុជីវិតនោះឡើយ។ ឯកឧត្តម បន្តទៀតថាដោយខេត្តសៀមរាប មានហានិភ័យក្នុងចំណោម៨ខេត្ត ដែលមានការឆ្លងសហគមន៍ ហើយដោយមានការយកចិត្តទុកដាក់ខ្ពស់ ពីសម្តេចអគ្គមហាសេនាបតីតេជោ និងសម្តេចកិត្តិព្រឹត្តបណ្ឌិត បានជួយទំនុកបម្រុងគ្រប់យ៉ាង រហូតដល់ពេលនេះក្រុមគ្រួសាររបស់កងទ័ព ចំណុះទីបញ្ជាការយោធភូមិភាគទី៤ បានទទួលវ៉ាក់សាំងនេះ ហើយជំនួសមុខឲ្យក្រុមគ្រួសារនាយទាហាន នាយទាហានរង និងពលទាហាន សូមថ្លែងអំណអរគុណចំពោះសម្តេចទាំងទ្វេរ ព្រមទាំងសម្តេចពិជ័យសេនា ក៏ដូចជាអគ្គបញ្ជាការ មេបញ្ជាការកងទ័ពជើងគោក លោកបានផ្តល់អាទិភាពដល់ទីបញ្ជាការយោធភូមិភាគទី៤ទទួលវ៉ាក់សាំងនេះ។
ជាក់ស្តែង ថ្ងៃនេះយើងទទួលបានវ៉ាក់សាំងចំនួន៩០០០ដូស ដើម្បីចាក់ជូនក្រុមគ្រួសារកងទ័ពដែលរស់នៅក្រោមដំបូលផ្ទះតែ១ ។ ឯកឧត្តម បានសំណូមពរដល់ក្រុមគ្រួរសារកងទ័ព ក៏ដូចជាទ័ព ដែលបានចាក់លើកទី១ និងលើកទី២រួច ត្រូវចូលរួមវិធានការ ៣ការពារ ៣កុំ របស់រាជរដ្ឋាភិបាលឲ្យមានប្រសិទ្ធភាពខ្ពស់ និងអនុវត្តតាមវិធានសុខាភិបាល បង្ការ ទប់ស្កាត់ការឆ្លងរីករាលដាលជំងឺឆ្លងកូវីដ-១៩ ឲ្យបានម៉ត់ចត់ ខ្ជាប់ខ្ជួន ត្រូវនៅក្នុងផ្ទះជាមួយក្រុមគ្រួសារចៀសវាង ចេញក្រៅបើគ្មានការចាំបាច់ មិនត្រូវជួបជុំនៅតាមទីវត្តអារាម ឬកន្លែងកំសាន្តផ្សេងៗ នៅថ្ងៃបុណ្យចូលឆ្នាំថ្មីប្រពៃណីជាតិនាពេលខាងមុខនោះឡើយ៕
អត្ថបទ និងរូបភាព ឈិត សាវី
ព័ត៌មានជាតិ ថ្មីៗ
