លោក លី សំរិទុ្ធ អភិបាលរង និងជាអ្នកនាំពាក្យសាលាខេត្ដសៀមរាប លោកមានប្រសាសន៍នៅថ្ងៃនេះថា ដោយយោងតាមសារាចរណែ របស់រាជរដ្ឋាភិបាលកម្ពុជា ដើម្បីធានាអាយុជីវិតរបស់ប្រជាពលរដ្ឋ ព្រមទាំងកាត់បន្ថយផលប៉ះពាល់នៃការឆ្លងរាលដាលជំងឺ កូវីដ-១៩ នៅក្នុង“ព្រឹត្តិការណ៍សហគមន៍ ២០ កុម្ភៈ ២០២១» រដ្ឋបាលខេត្តសៀមរាប បានណែនាំដល់រដ្ឋបាលក្រុង-ស្រុក ឃុំ-សង្កាត់ សមត្ថកិច្ចពាក់ព័ន្ធ ត្រូវយកចិត្តទុកដាក់គោរព និងអនុវត្តប្រកបដោយភាពម្ចាស់ការ ស្មារតីភ្ញាក់រលឹក និងការទទួលខុសត្រូវខ្ពស់នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលប្រព្រឹត្តិទៅចាប់ពីថ្ងៃទី១៤ ដល់ថ្ងៃទី១៦ខែមេសា ឆ្នាំ២០២១។
លោកថា អាជ្ញាធរត្រូវចាត់វិធានការ ឱ្យបានល្អប្រសើរ ព្រមទាំងធានានូវការគោរព និងការអនុវត្តវិធានការសុខាភិបាល បង្ការ និងទប់ស្កាត់ការឆ្លងរាលដាលនៃជំងឺកូវីដ-១៩អោយបានម៉ត់ចត់ និងខ្ជាប់ខ្ជួន អនុលោមតាមបទប្បញ្ញត្តិច្បាប់ និងលិខិតបទដ្ឋានជាធរមាន ទាំងនៅក្នុងការគ្រប់គ្រង ចរាចរណ៍ ការដឹកជញ្ជូនមនុស្ស ការធ្វើដំណើរឆ្លងកាត់ខេត្ត និងទាំងនៅតាមទីសាធារណៈនានា ពិសេសនៅ តាមវត្តអារាម រមណីយដ្ឋាន និងទីតាំងផ្សេងទៀត ដែលអាចមានសភាពអ៊ូអរ និងមានមនុស្សជួបជុំគ្នាក្នុងចំនួនច្រើន។ លោកបន្ថែមថា សាធារណជនគ្រប់រូបទាំងអស់ ត្រូវចូលរួមអនុវត្តនូវវិធានការជួបជុំក្រុមគ្រួសារតាមគេហដ្ឋានរៀងៗខ្លួន មិនត្រូវចេញក្រៅផ្ទះ ហាមធ្វើដំណើរទៅកាន់ ទីកន្លែងដែលមានហានិភ័យខ្ពស់នៃការឆ្លងរាលដាលជំងឺកូវីដ១៩។ មិនត្រូវរៀបចំពិធីផ្សេងៗ រួមទាំងពិធីសាសនា ដែលមានសភាពអ៊ូអរ និងមានមនុស្សចូលរួមច្រើន អនុវត្តវិធានការ -៣ការពារ ៣កុំ អនុវត្តវិធានការសុខាភិបាល សំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩។
អត្ថបទ និងរូបភាព ឈិត សាវី
