ក្នុងគោលបំណង ចុះអនុវត្តសេចក្តីសម្រេចលេខ ០៣៦/២១ស.សរចុះថ្ងៃទី០៩ ខែមេសា ឆ្នាំ២០២១ របស់រដ្ឋបាលខេត្តសៀមរាប ស្តីពីការអនុវត្តវិធានការរដ្ឋបាលឲ្យបិទការធ្វើដំណើរជាបណ្ដោះអាសន្ន និងការជួបជុំនានាក្នុងខេត្ត ចាប់ពីម៉ោង៨យប់ រហូតដល់ម៉ោង៥ទាបភ្លឺ រយ:ពេល១៤ថ្ងៃ គឺគិតចាប់ពីយប់ថ្ងៃទី១០ រហូតដល់ថ្ងៃទី២៣ ខែមេសា ឆ្នាំ២០២១ ព្រមទាំងផ្អាកជាបណ្ដោះអាសន្ននូវសកម្មភាពនៅតាមទីតាំងតូបអាហារ អាហារដ្ឋានភោជនីយដ្ឋាន ហាងកាហ្វេ ហាងភេសជ្ជៈនិងភោជនីយដ្ឋាននៅតាមសណ្ឋាគារ ប៉ុន្តែមានករណីមួយចំនួនត្រូវបានលើកលែងផងដែរ ។
លោក ពៅ ពិសិដ្ឋ អភិបាលរងខេត្តសៀមរាប ប្រធានក្រុមដឹកនាំក្នុងគោលដៅមួយ ក្នុងចំណោមគោលដៅទាំង៦ មានប្រសាសន៏ថា ជាក់ស្តែងនៅយប់នេះ រដ្ឋបាលខេត្តដៀមរាប បានអនុវត្តវិធានការដ៏ចាំបាច់ ដែលបានដាក់ចេញប្រកបដោយយកចិត្តទុកដាក់យ៉ាងតឹងរឹងពីឯកឧត្តម ទៀ សីហា អភិបាលខេត្តសៀមរាប និងជាប្រធានគណ:បញ្ជាការឯកភាពរដ្ឋបាលខេត្ត បានបង្ហាញពីភាពរឹងមាំ ម្ចាស់ការ ក្នុងស្មារតីទទួលខុសត្រូវខ្ពស់ និងភាពជាអ្នកដឹកនាំចំពោះស្ថានការដ៏អាក្រក់ដែលប្រទេសជាតិកំពុងជួបប្រទះ។ លោកពៅ ពិសិដ្ឋ បានបន្តថា បើទោះជាយ៉ាងណាក្តី ការដាក់ចេញនូវវិធានការទាំងឡាយ ចាំបាច់ណាស់ទាមទារការចូលរួមរបស់ប្រជាពលរដ្ឋទាំងអស់គ្នាទើបយើងអាចទប់ស្កាត់បាននៅការរីករាលដាលជំងឺឆ្លងកូវិដ-១៩ ចំពោះបងប្អុនប្រជាពលរដ្ឋ ពិតណាស់គឺការការពារអាយុជីវិតផ្ទាល់របស់បងប្អូន និងសហគមន៍របស់យើង។ ប្រសិនបើគ្មានការចាំបាច់ទេនោះ សូមបងប្អូនកុំចេញក្រៅផ្ទះឲ្យសោះ ព្រោះវាមានហានិភ័យខ្ពស់បំផុត។ ដូច្នេះ សូមបងប្អូនប្រជាពលរដ្ឋត្រូវចូលរួមអនុវត្តវិធានការទាំងអស់នេះឱ្យបាននឹងមានប្រសិទ្ធភាពខ្ពស់បំផុត និងសូមបន្តប្រកាន់នូវវិធានសុខាភិបាល ៣កុំ ៣ការពារឲ្យបានខ្ជាប់ខ្ជួន។
លោក ឧត្តមសេនីយ៏ទោ ទិត្យ ណារ៉ុង ស្នងការនគរបាលខេត្តសៀមរាប បានបង្ហាញថា នៅយប់ថ្ងៃទី១០ ខែមេសានេះ កម្លាំងចម្រុះបានចុះទៅតាមគោលដៅសំខាន់ៗ ចំនួន៦កន្លែង និងគោលដៅចល័តជាច្រើនទៀតរៀងៗខ្លួន ដែលយើងបានចាត់តាំងអនុវត្តវិធានការរដ្ឋបាលជាបណ្តោះអាសន្នរបស់រដ្ឋបាលខេត្តក្នុងក្រុងសៀមរាបនេះ។ គោលដៅសំខាន់ៗ ទាំង ៦ នៅក្នុងក្រុងសៀមរាប បានរៀបចំដាក់គោលដៅត្រួតពិនិត្យលើដងផ្លូវ រួមមាន៖ ១-គោលដៅផ្លូវបំបែកនាគបាញ់ទឹក(ផ្សារចាស់)។ ២- គោលដៅស្តុបគ្រួស។ ៣- គោលដៅស្តុបសុខាអង្គរ,៤- គោលដៅស្តុបមន្ទីរពេទ្យជ័យវរ្ម័នទី៧ (ស្ពាននាគ), ៥- គោលដៅស្តុបផ្លូវតាណឺយ និង៦- គោលដៅស្តុបចុងកៅស៊ូ ផ្លូវជាតិលេខ៦។ លោក បានបញ្ជាកថា ចំពោះគោលដៅទាំង០៦ខាងលើនេះ គឺយើងប្រើប្រាស់កម្លាំងនគរបាលចរាចរណ៍ខេត្ត និងរថយន្តមួយគ្រឿងចល័ត ត្រួតពិនិត្យតាមដងផ្លូវផ្សេងៗ ក្នុងភូមិសាស្រ្តក្រុងសៀមរាប និងគោលដៅតាមដងផ្លូវនឹងធ្វើការត្រួតពិនិត្យទៅលើអ្នកដំណើរដែលមិនមានភារកិច្ច ឬការចាំបាច់តាមការកំណត់ ដោយណែនាំឲ្យពួកគាត់វិលត្រឡប់ចូលទៅលំនៅដ្ឋានរៀងៗខ្លួនវិញ។ ដោយឡែក កម្លាំងអធិការដ្ឋាននគរបាលក្រុងសៀមរាប សហការជាមួយកម្លាំងគណ:បញ្ជាការឯកភាពរដ្ឋបាលក្រុង ចុះត្រួតពិនិត្យនិងអនុវត្តតាមខ្លឹមសារសេចក្តីសម្រេចនេះដែរ ចំពោះទីតាំងណាដែលមិនគោរពតាមកំណត់របស់រដ្ឋបាលខេត្ត។ អធិការដ្ឋាននគរបាលស្រុកចំនួន១១ទៀត ត្រូវអនុវត្តតាមផែនការនេះ ហើយសហការជាមួយគណ:បញ្ជាការឯកភាពរដ្ឋបាល និងត្រូវកំណត់គោលដៅត្រួតពិនិត្យ បិទបម្រាមគោចរ ចាប់ពីម៉ោង៨;០០នាទី ដល់ម៉ោង៥;០០នាទីព្រឹក ទៅតាមភូមិសាស្រ្តជាក់ស្តែង។
នៅក្នុងសេចក្តីសម្រេច បានកំហិតយ៉ាងខាច់ខាតផងដែរ ចំពោះជនណាដែលមិនគោរពតាមសេចក្ដីសម្រេចនេះ រដ្ឋបាលខេត្តសៀមរាប នឹងចាត់វិធានការតាមផ្លូវច្បាប់ ដូចមានកំណត់ក្នុងច្បាប់ ស្ដីពីវិធានការទប់ស្កាត់ការឆ្លងរាលដាល នៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តនានាជាធរមាន។ ទោះជាយ៉ាងនេះក្តី សម្រាប់ការចុះអនុវត្តនៅរាត្រីថ្ងៃទី១០ ខែមេសាដែលជាថ្ងៃដំបូងនេះ ចំពោះបងប្អូនប្រជាពលរដ្ឋ ដែលបានធ្វើដំណើរឆ្លងផុតពេលម៉ោងកំណត់ និងអនុវត្តមិនទាន់បានត្រឹមត្រូវតាមសេចក្តីសម្រេចនោះ សមត្ថកិច្ច យើងគ្រាន់តែធ្វើការណែនាំ អប់រំពន្យល់ ហើយអនុញ្ញាតឲ្យពួកគាត់វិលទៅលំនៅឋានវិញ ដោយមិនបានអនុវត្តច្បាប់ការផាកពិន័យអ្វីឡើយ
៕
អត្ថបទ និងរូបភាព: មន្ត្រីព័ត៌មានទូរទស្សន៍ជាតិ នៃមន្ទីរព័ត៌មានខេត្តសៀមរាប
កែសម្រួលដោយ លីវ សុខុន!!!
