នៅព្រឹកថ្ងៃទី ១២ ខែមេសា ឆ្នាំ២០២១នេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានទទួលអំណោយជាម៉ាស់ចំនួន ២ម៉ឺនម៉ាស់ , អាល់កុល ៣០០លីត្រ , មី ១០កេសធំ រួមនឹងថវិកាមួយចំនួន ដែលជាអំណោយរបស់ឯកឧត្តម សំ វណ្ណថន និងលោកជំទាវ រួមទាំងក្រុមការងាររដ្ឋាភិបាលចុះជួយឃុំរលួស ស្រុកប្រាសាទបាគង ខេត្តសៀមរាប នៅសាលាខេត្តសៀមរាប ។
ឯកឧត្តម សំ វណ្ណថន មានប្រសាសន៍បានថា អំណោយយកមកផ្តល់ជូនរដ្ឋបាលខេត្តសៀមរាបនាថ្ងៃនេះ ចេញឡើងពីទឹកចិត្តដ៏សប្បុរស របស់ក្រុមការងាររដ្ឋាភិបាលចុះជួយឃុំរលួស គឺជាសិល្បះនៃការចែករំលែកក្នុងគ្រាលំបាក ក្នុងការប្រយុទ្ធប្រឆាំងជំងឺកូវីដ-១៩ នៅតាមមូលដ្ឋាន ព្រោះក្នុងពេលវេលានេះ យើងចាំបាច់ត្រូវតែចូលរួមជាមួយរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី ក្នុងពេលដែលប្រជាពលរដ្ឋបានកំពុងជួបនូវវិបត្តិជំងឺកូវីដ-១៩ សំខាន់បងប្អូនប្រជាពលរដ្ឋនៅតាមបណ្តាក្រុង ស្រុក មួយចំនួន ក្នុងខេត្តសៀមរាប បានទទួលរងគ្រោះធ្វើឲ្យប៉ះពាល់នូវជំងឺដ៏កាចសាហាវនេះ ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានថ្លែងអំណរគុណដល់ទឹកចិត្តដ៏សប្បុរសធម៌ របស់ប្រតិភូក្រុមការងាររាជរដ្ឋាភិបាល ចុះជួយឃុំរលួស ដែលបានផ្តល់ជូននូវសម្ភារបម្រើការក្នុងការប្រយុទ្ធប្រឆាំងបង្ការ ទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប ខណៈដែលកម្ពុជាយើង បានកំពុងជួបនូវវិបត្តិជំងឺកូវីដ-១៩ នេះ អាជ្ញាធរខេត្តបានផ្តល់នូវសម្ភារ ឧបករណ៍ ប្រើប្រាស់ជូនទៅតាមបណ្តាក្រុង ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលមកពី ក្រៅប្រទេស និង រាជធានី ខេត្តដែលជួបនូវហានីភ័យខ្ពស់ នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌល ក្រុង ស្រុក ឃុំ ។
ឯកឧត្តម បានសំណូមពរ ដល់ប្រតិភូក្រុមការងាររាជរដ្ឋាភិបាល ក៏ដូចសប្បុរសជន បន្តនូវប្រពៃណីវប្បធម៌ចែករំលែកនេះ ទៅតាមបណ្តា ក្រុង ស្រុក ទៀតផងដែរ និង អំពាវនាវដល់បងប្អូនប្រជាពលរដ្ឋទាំងអស់ សំខាន់នៅខេត្តសៀមរាប សូមបងប្អូនត្រូវចូលរួមអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និង សូមបន្តប្រកាន់នូវវិធានសុខាភិបាល ឲ្យបានខ្ជាប់ខ្ជួនទៀតផង ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
