ក្រោមគំនិតផ្តួចផ្តើមរបស់ព្រះវិតមុនីញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ ព្រមទាំងអាចារ្យ គណៈកម្មការវត្ត និងបងប្អូនប្រជាពលរដ្ឋក្នុងមូលដ្ឋាន និងព្រះតេជគុណ ព្រហ្មបញ្ញោ ឡាយ ជឿន ព្រះវិន័យធរវត្តពោធិបន្ទាយជ័យ បានឯកភាពគ្នាជាឯកច្ឆ័ន្ទជាមួយអាជ្ញាធរសង្កាត់សៀមរាបផងនោះ ផ្លូវលំប្រភេទដីសមួយខ្សែដែលភ្ជាប់ពីផ្លូវបេតុងនៃភូមិប្រឡាយ ឆ្ពោះទៅទិសខាងត្បូងទល់គ្នានឹងផ្លូវកែងខាងកើតវត្តអារញ្ញាសាគរ។ ផ្លូវនេះដែរមានទទឹងប្រវែង៦ម៉ែត្រ និងបណ្តោយប្រវែង១.៥០០ម៉ែត្រ ត្រូវបានធ្វើការជួសជុលឡើងវិញជាផ្លូវគ្រួសក្រហម នៅថ្ងៃទី១២ ខែមេសា ឆ្នាំ២០២១នេះ ដោយលើកបន្ថែមកម្ពស់ឱ្យខ្ពស់ជាងមុន និងពង្រីកបន្ថែមឱ្យបានទទឹង០៧ម៉ែត្រ ដោយគ្រោងនឹងប្រើរយៈពេលជាង១ខែ និងគ្រោងចំណាយប្រមាណជា៦០លានរៀល ដែលនៅពេលនេះ លោក ស៊ឹម តាប់ អតីតមន្ត្រីធម្មការសាលាក្រុងសៀមរាបនិងភរិយាព្រមទាំងក្រុមគ្រួសារបាន បរិច្ចាគថវិកាចំនួន៥ពាន់ដុល្លារសម្រាប់ជួសជុលផ្លូវនេះ ហើយព្រះវិតមុនីញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ បានអំពាវនាវសូមឱ្យបងប្អូនប្រជាពលរដ្ឋបន្តចូលរួមបរិច្ចាកថវិកាទៅតាមសទ្ឋា ដើម្បីពន្លឿនការជួសជុលផ្លូវឱ្យបានរួចរាល់មុនរដូវភ្លៀងមកដល់។
លោក ម៉ៃ សាមេត ចៅសង្កាត់សៀមរាប បានឲ្យដឹងថា ផ្លូវថ្នល់មានសារៈសំខាន់ណាស់ ជាពិសេសបានរួមចំណែកយ៉ាងសំខាន់ក្នុងការកាត់បន្ថយការលំបាករបស់ប្រជាពលរដ្ឋ ក្នុងការធ្វើដំណើរនិងដើរតួនាទីយ៉ាងសំខាន់ក្នុងកិច្ចការងារសន្តិសុខ សណ្តាប់ធ្នាប់សាធារណៈ និងសុខុមាលភាពសង្គមព្រមទាំងជួយលើកកម្ពស់សោភ័ណភាព និងជីវភាពរស់នៅរបស់ប្រជាពលរដ្ឋក្នុងមូលដ្ឋានបានមួយកម្រិតផងដែរ ខណៈដែលផ្លូវមួយខ្សែនេះរងនូវការខូចខាតជាអន្លើរៗ និងរងនូវការលិចលង់ជារៀងរាល់ឆ្នាំនារដូវវស្សាផងដែរ ។
ក្នុងឱកាសនោះដែរ លោក ម៉ៃ សាមេត បានសំណូមពរ និងសុំការអធ្យាស្រ័យពីសំណាក់បងប្អូនប្រជាពលរដ្ឋ រស់នៅតាមបណ្តោយផ្លូវដែលកំពុងធ្វើការជួសជុលនេះ អាចនឹងមានផលប៉ះពាល់បន្តិចបន្តួចខ្លះៗប៉ះចំលើដីបងប្អូនមួយចំនួន បញ្ហាដោយការហុយដី ការរំខានគ្រឿងចក្រឈូសឆាយ ជាដើម និងសុំឱ្យបងប្អូនចូលរួមបើកមុខទឹកនិងដាក់លូ តាមមុខផ្ទះរៀងៗខ្លួនដើម្បីឱ្យផ្លូវនេះប្រើប្រាស់បានយូរ និងចៀសវាងការជនលិចនៅរដូវវស្សានាំឱ្យផ្លូវឆាប់ខូច៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
