យុទ្ធនាការផ្តល់វ៉ាក់សាំងសុីណូវ៉ាក់ (Sinovac) ជូនដល់បងប្អូនអតីតយុទ្ធជននៅក្នុងខេត្តសៀមរាប កាលពីព្រឹកថ្ងៃទី១១ ខែមេសា ឆ្នាំ២០២១នេះ ប្រព្រឹត្តឡើង ក្រោមការស្ម័គ្រចិត្ត និងពោរពេញទៅដោយមនោសញ្ចេតនារីករាយទីបំផុតពីសំណាក់បងប្អូនអតីតយុទ្ធជន។ ក្នុងពិធីយុទ្ធនាការចាក់វ៉ាក់សាំងនេះ ក្រោមអធិបតីភាពដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងវត្តមាន មេបញ្ជាការកងកម្លាំងប្រដាប់អាវុធទាំងបី ថ្នាក់ដឹកនាំមន្ទីរ អង្គភាពពាក់ព័ន្ធជាច្រើននាក់បានចូលរួម។
ក្នុងពិធីយុទ្ធនាការចាក់វ៉ាក់សាំងនេះដែរ ឯកឧត្តម ទៀ សីហា អភិបាលខេត្ត បានមានប្រសាសន៍សំណេះសំណាលថា មានតែការចាក់វ៉ាក់សាំងទេ ទើបធ្វើឲ្យបងប្អូនប្រជាពលរដ្ឋទាំងអស់ចាកផុតពីការឆ្លងមេរោគកូវីដ-១៩ ហើយរស់នៅដោយសេចក្តីសុខសាន្តបាន និងអាចប្រកបរបរចិញ្ចឹមជីវិត និងការអភិវឌ្ឍប្រទេសជាតិឲ្យរីកចម្រើន។
ឯកឧត្តមអភិបាលខេត្ត បានបន្តថាថ្ងៃនេះខ្ញុំមានសេចក្តីសោមនស្សរីករាយណាស់ ដែលបានចូលរួមក្នុងការបើកយុទ្ធនាការចាក់វ៉ាក់សាំងប្រភេទ ស៊ីណូវ៉ាក់ (Sinovac) ជូនដល់លោកតា លោកយាយ ពូមីង បងប្អូន ដែលជាអតីតយុទ្ធជនក្នុងខេត្តសៀមរាបប្រមាណ ៦,៦២០នាក់។ ជាមួយគ្នានេះខ្ញុំបាទសូមកោតសរសើរដល់ លោកតា លោកយាយ ពូមីង បងប្អូន អតីតយុទ្ធជនទាំងអស់ ដែលមានភាពក្លាហាន និងជឿជាក់លើរាជរដ្ឋាភិបាល ក្នុងការស្ម័គ្រចិត្តអញ្ជើញមកចាក់វ៉ាក់សាំង ក្នុងថ្ងៃទី១ (ដូសទី១ ) នៃយុទ្ធនាការនេះ បន្ទាប់ពីលោកតា លោកយាយ ពូមីង បងប្អូន មានភាពក្លាហានក្នុងការលះបង់កាយ ជីវិត និងបូជាកាយរហូតដល់មានពិការភាពក្តី គឺដើម្បីការពារបូរណភាពទឹកដី និងសេចក្តីសុខសាន្តរបស់ប្រទេសជាតិ។
ឯកឧត្តម បន្ថែមថា តាងនាមរូបខ្ញុំផ្ទាល់ អជ្ញាធរខេត្ត និងលោកតា លោកយាយ បងប្អូន ពូមីងដែលជាអតីយុទ្ធជនទាំងអស់ សូមថ្លែងអំណរគុណយ៉ាងជ្រាលជ្រៅជាទីបំផុតចំពោះសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា, សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ, ឯកឧត្តមនាយឧត្តមសេនីយ គន់ គីម និងក្រសួងសុខាភិបាល ដែលតែងតែយកចិត្តទុកដាក់ ចំពោះបងប្អូនអតីតយុទ្ធជនគ្រប់កាល:ទេស:។ ឯកឧត្តម ទៀ សីហា បានបញ្ជាក់បន្ថែមថា ទោះបីជាយើងទាំងអស់គ្នាបានទទួលការចាក់វ៉ាក់សាំងរួចរាល់ក្តី ក៏យើងទាំងអស់គ្នានៅតែគោរពតាមការណែនាំរបស់ក្រសួងសុខាភិបាល ជាពិសេសពិសេសអនុសាសន៍របស់សម្ដេចតេជោ នាយករដ្ឋមន្ត្រី គឺវិធានការ “៣ការពារ” ទី១ ដោយការពាក់ម៉ាស់, ទី២ លាងសំអាតដៃឱ្យបានញឹកញាប់, ទី៣ រក្សា គម្លាតសុវត្ថិភាពសង្គម រវាងបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅ និង”៣កុំ” គឺកុំទី១ កុំចូលទៅទីកន្លែងបិទជិតខ្វះខ្យល់ចេញចូល និងប្រើម៉ាស៊ីនត្រជាក់ច្រើន, កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម៕
អត្ថបទ និងរូបភាព: មន្ត្រីទូរទស្សន៍ជាតិខេត្តសៀមរាប កែសម្រួលដោយ លីវ សុខុន
