រដ្ឋបាលខេត្តសៀមរាប សម្រេចបិទការធ្វើដំណើរ និងការជួបជុំនានាក្នុងខេត្ត ចាប់ពីម៉ោង៨យប់ រហូតដល់ម៉ោង៥ទាបភ្លឺ រយ:ពេល១៤ថ្ងៃ គិតចាប់ពីថ្ងៃទី១០ រហូតដល់ថ្ងៃទី២៣ ខែមេសា ឆ្នាំ២០២១។
សេចក្តីសម្រេច ធ្វើឡើងបន្ទាប់ពី រកឃើញករណីវិជ្ជមាន និងអ្នកពាក់ព័ន្ធជាបន្តបន្ទាប់ ក្នុងខេត្តសៀមរាប និងការកើនឡើងយ៉ាងគំហុកនៅនៅរាជធានីភ្នំពេញ និងបណ្ដាខេត្តមួយចំនួន នៃប្រទេសកម្ពុជា។
សេចក្តីសម្រេចបិទការធ្វើដំណើរ និងជួបជុំក្នុងខេត្តនៅពេលយប់នេះដែរ បានផ្អាកជាបណ្ដោះអាសន្ននូវសកម្មភាពតាមទីតាំងតូបអាហារ អាហារដ្ឋានភោជនីយដ្ឋាន ហាងកាហ្វេ ហាងភេសជ្ជៈនិងភោជនីយដ្ឋាននៅតាមសណ្ឋាគារ។ល។ ដែលទទួលអតិថិជន មកប្រើប្រាស់សេវាដោយផ្ទាល់។ ប៉ុន្តែទីតាំងអាជីវកម្មទាំងនោះ អាចលក់ដូរជាលក្ខណ:វេចខ្ចប់បាន។
ការសម្រេចបិទការធ្វើដំណើរក្នុងនេះដែរ លើកលែងចំពោះ÷
– ការធ្វើដំណើរដោយមូលហេតុសុខភាពបន្ទាន់ និងមូលហេតុចាំបាច់ និងបន្ទាន់ក្នុងគ្រួសារ ដែលមានលិខិតបញ្ជាក់ឬការអនុញ្ញាតពីអាជ្ញាធរមានសមត្ថកិច្ចដែលនៅជិតបំផុត។
– ការធ្វើដំណើររបស់បុគ្គលិកក្រុមគ្រូពេទ្យទាំងផ្នែករដ្ឋ និងឯកជនមន្ត្រីរាជការក្រុមពន្លត់អគ្គីភ័យកងកម្លាំងប្រដាប់អាវុធគ្រប់ប្រភេទ ដើម្បីបំពេញបេសកកម្មជូនស្ថាប័នអង្គភាព។
– ការធ្វើចរាចរណ៍របស់រថយន្តកុងតឺន័រ រថយន្តដឹកទំនិញ រថយន្តបាញ់បេតុង រថយន្តសម្រាប់បម្រើការដឹកជញ្ជូនទំនិញ ផ្គត់ផ្គង់ការដ្ឋានសំណង់ រថយន្តដឹកជញ្ជូនសំរាម-សំណល់រឹង និងសំណល់វេជ្ជសាស្ត្រ ការដឹកជញ្ជូន ម្ហូបអាហាររបស់បុគ្គលិកបម្រើសេវាដឹកជញ្ជូន។
– ការធ្វើដំណើររបស់បុគ្គលិក និងកម្មករកម្មការិនីទៅទីកន្លែងបំពេញការងារនៅក្នុងគ្រឹះស្ថាន រោងចក្រ ឬទីតាំងអាជីវកម្ម ដែលអនុញ្ញាតឲ្យបើកដំណើរការធម្មតា។
– ការធ្វើដំណើរចាំបាច់ផ្សេងៗទៀត ដែលមានការអនុញ្ញាតពីអាជ្ញាធរសមត្ថកិច្ច ឬការបំពេញកាតព្វកិច្ច ដែលបម្រើផលប្រយោជន៍សាធារណ:។
រីឯការបិទការជួបជុំក្នុងខេត្ត ក្នុងសេចក្តីសម្រេចដដែលនេះលើកលែងចំពោះ÷
– ការជួបជុំក្នុងចំណោមសមាជិកគ្រួសាររស់នៅក្នុងលំនៅឋានឬទីសំណាក់ជាមួយគ្នា ។
– ការរៀបចំពិធីបុណ្យសព ដោយគោរពតាមការណែនាំរបស់អាជ្ញាធរមានសមត្ថកិច្ច ។
– ការជួបជុំរបស់បុគ្គលិកសុខាភិបាល ក្នុងករណីប្រមូលសំណាកអ្នកមានផ្ទុកជំងឺកូវីដ-១៩ ឬអ្នកពាក់ព័ន្ធដោយផ្ទាល់ ឬប្រយោល អ្នកជំងឺកូវីដ-១៩ ឬការចាក់វ៉ាក់សាំងការពារជំងឺកូវីដ-១៩ ក៏ដូចជាការសង្គ្រោះបន្ទាន់ផ្សេងៗ ។
– ការជួបជុំរបស់អាជ្ញាធរមានសមត្ថកិច្ច ក្នុងការបំពេញការងារថែរក្សាសន្តិសុខសណ្ដាប់ធ្នាប់ និងរបៀបរៀបរយសាធារណ:។
– ការជួបជុំមនុស្សដែលមានភាពចាំបាច់សំរាប់បម្រើផលប្រយោជន៍សាធារណ: ឬក្នុងគោលបំណងផ្សេងទៀត តាមការកំណត់របស់អាជ្ញាធរមានសមត្ថកិច្ច។
ក្នុងសេចក្តីសម្រេចក៏បានកំហិតយ៉ាងដាច់ខាតផងដែរ ចំពោះជនណាដែលមិនគោរពតាមសេចក្ដីសម្រេចនេះ រដ្ឋបាលខេត្តសៀមរាប នឹងចាត់វិធានការតាមផ្លូវច្បាប់ ដូចមានកំណត់ក្នុងច្បាប់ ស្ដីពីវិធានការទប់ស្កាត់ការឆ្លងរាលដាល នៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តនានាជាធរមាន៕
អត្ថបទ និងរូបភាព: លោក សេង ផល្លី
កែសម្រួលដោយលីវសុខុន ។
