នៅព្រឹកថ្ងៃទី១០ ខែមេសា ឆ្នាំ២០២១នេះ សមត្ថកិច្ច និងអាជ្ញាធរមូលដ្ឋានក្រុង-ស្រុក ឃុំ-សង្កាត់ នៃខេត្តសៀមរាប បានរកឃើញអ្នកពាក់ព័ន្ធទាំង ១៩នាក់ ដែលបានជិះរថយន្តក្រុង ជាមួយស្ត្រីវ័យ ៤៦ឆ្នាំ មានវិជ្ជមានជំងឺកូវីដ-១៩ហើយ នេះបើតាមការចុះផ្សាយរបស់រដ្ឋបាលខេត្តសៀមរាប។
ការចុះផ្សាយដដែលនេះ បញ្ចាក់ថា សមត្ថកិច្ច និងអាជ្ញាធរមូលដ្ឋាន បានចុះទៅដល់លំនៅដ្ឋានអ្នកពាក់ព័ន្ធទាំង១៩នាក់នោះ និងបានណែនាំដល់ពួកគាត់ ធ្វើចត្តាឡីស័កដាក់ខ្លួនឲ្យនៅដាច់ដោយឡែកពីអ្នកដទៃ និងត្រៀមបន្តយកសំណាកមកធ្វើតេស្តរកជំងឺ-១៩ នៅព្រឹកថ្ងៃទី១០ ខែមេសានេះ។
គួរជម្រាបថា តាមចុះផ្សាយរបស់រដ្ឋបាលខេត្តកាលពីថ្ងៃទី០៩ ខែមេសា ឆ្នាំ២០២១ ស្ត្រីឈ្មោះ ចាប នី វ័យ៤៦ឆ្នាំ រស់នៅភូមិគោកតាចាន់ សង្កាត់គោកចក ក្រុងសៀមរាប ត្រូវបានរកឃើញវិជ្ជមានជំងឺកូវីដ-១៩ថ្មី នៅយប់ថ្ងៃទី០៩ ខែមេសា ឆ្នាំ២០២១។ ស្ត្រីរូបនេះ បានចាកចេញពីខេត្តស្វាយរៀង ឆ្លងកាត់រាជធានីភ្នំពេញ ឆ្ពោះមកកាន់ខេត្តសៀមរាប កាលពីថ្ងៃទី០៤ ខែមេសា ឆ្នាំ២០២១ តាមរយៈរថយន្តក្រុង ស្លាកលេខ 3D-9211 រួមនិងអ្នកដំណើរ១៩នាក់ទៀត។ ជាមួយនោះ រដ្ឋបាលខេត្ត បានសម្រេចចាត់វិធានការបិទទីតាំងមួយចំនួនក្នុងក្រុង រួមមាន៖ ផ្សារភូមិភាគបួន ស្ថិតភូមិខ្វៀន សង្កាត់គោកចក មន្ទីរសម្រាកព្យាបាល ឆាយ លាង ស្ថិតនៅភូមិវាល សង្កាត់គោកចក ក្រុងសៀមរាប និងទីតាំងមួយចំនួន ដែលនឹងជូនដំណឹងនាពេលបន្ទាប់។
អត្ថបទ៖ លោក សេង ផល្លី
រូបភាព៖ រដ្ឋបាលខេត្តសៀមរាប
