កាលពីរសៀលថ្ងៃទី៧ ខែមេសា ឆ្នាំ២០២១ ក្រុមការងារសកម្មពលរបស់សាលាគណ ខេត្តសៀមរាប ដឹកនាំដោយព្រះធម្មានុរ័ក្ខញាណ ស៊ុម ពិសិទ្ធិ ព្រះរាជាគណៈថ្នាក់កិត្តិយស ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ចូលរួមដោយព្រះរាជាគណៈព្រះគ្រូ ព្រះចៅអធិការវត្ត និងព្រះថេរានុត្ថេរៈមួយចំនួនក្នុងក្រុងសៀមរាប បាននាំយកគ្រឿងឧបភោគបរិភោគទៅប្រគល់ជូនអាជ្ញាធរឃុំស្វាយចេក ស្រុកអង្គរធំ ខេត្តសៀមរប ដើម្បីឧបត្ថម្ភដល់ប្រជាពលរដ្ឋដែលកំពុងធ្វើចត្តាឡីស័កក្នុងមណ្ឌលឃុំស្វាយចេក។
ព្រះគ្រូធម្មសិរីញាណ ធម្មទិន្នោ ឡម លឿម នាយកប្រតិបត្តិសមាគមជីវិត និងក្តីសង្ឃឹម មានសង្សដីកាថា សម្ភារស្បៀងអាហារដែលបានផ្ដល់ជូននាពេលនេះបានមកពីការប្រគេនដល់ព្រះសង្ឃ របស់ទាយក ទាយិកា និងសប្បុរសជនជិតឆ្ងាយ មន្ត្រីសង្ឃសាលាគណខេត្តបានសន្សំ និងប្រមូលបំរុងទុកសម្រាប់ចែកជូនគ្រួសារ ឬអាជ្ញាធរមូលដ្ឋានដែលជួបហានិភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗដូច្នេះហើយមន្ត្រីសាលាគណខេត្ត តែងតែជួយគិតគូរ និងផ្តល់ជូនទៅតាមលទ្ឋភាពដែលក្រុមព្រះសង្ឃមាន។
ព្រះតេជគុណ ឡម លឿម ក៍បានជំរុញលើកទឹកចិត្តដល់អ្នកកំពុងធ្វើចត្តាឡីស័កទាំងអស់ ត្រូវតស៊ូ ជំនះ អត់ធ្មត់ អនុវត្តនិងស្នាក់នៅដាច់ដោយឡែកឱ្យខាងតែបាន១៤ថ្ងៃ ទៅតាមការកំណត់និងត្រូវអនុវត្តទៅតាមការណែនាំក្រុមការងារ និងសេចក្តីណែនាំ របស់ក្រសួងសុខាភិបាល ក៍ដូចជាវិធានការ៣ការពារ និង៣កុំរបស់សម្តេចតេជោ សែន នាយករដ្ឋមន្ត្រី ក៏ដូចជាក្រសួងសុខាភិបាលផងដែរ។
សូមជម្រាបថា គិតត្រឹមថ្ងៃទី១០ ខែមីនា មកដល់ថ្ងៃទី៧ ខែមេសា ឆ្នាំ២០២១ មណ្ឌលចត្តាឡីស័កឃុំស្វាយចេកមានអ្នកធ្វើចត្តាឡីស័កចំនួន ១០៦នាក់ ដោយពួកគាត់ជាប្រជាពលរដ្ឋចំណូលស្រុកមកពីប្រទេសថៃ និងមកពីខេត្តផ្សេងៗមួយចំនួនក្នុងប្រទេសកម្ពុជា។ ចំពោះស្បៀងអាហារដែលប្រគល់ជូននាឱកាសនោះដែររួមមាន៖អង្ករ១៥០គីឡូក្រាម ត្រីខ២៦កំប៉ុង ស្ករស១២.៥គ្រាក មី១០កេស ទឹកផ្លែឈើ៣កេស ទឹកត្រី២យួរ ទឹកស៊ីអ៊ីវ៤យួរ ទឹកត្រី២យួរ ម៉ាស់ ៥ប្រអប់កាហ្វេ១០ប្រអប់ ទឹកសុទ្ឋ៣៤យូរ ថវិកា៣០ម៉ឹនរៀល៕
អត្ថបទ និង រូបភាព៖ យូ វង្ស
