នៅថ្ងៃទី០៩ ខែមេសា ឆ្នាំ២០២១ រដ្ឋបាលខេត្តសៀមរាបបានទទួលអំណោយជាសម្ភារមួយចំនួនពីក្រុមហ៊ុន E &T Real Estate រួមមាន៖ ម៉ាស់ចំនួន៨កេស សម្ភារវាស់កំដៅចំនួន៣ និងថវិកាចំនួន១លានរៀល និងក្រុមហ៊ុន Pactics Cambodia រួមមាន៖ ម៉ាស់ចំនួន៥,០០០ម៉ាស់ ដើម្បីចូលរួមក្នុងការបំពេញការងារទប់ស្កាត់ជំងឺកូវីដ-១៩ ក្នុងខេត្តសៀមរាប។ ហើយចំពោះអំណោយនាពេលនេះ វាជាការបង្ហាញឲ្យឃើញនូវទឹកចិត្តរបស់ក្រុមហ៊ុនទាំងពីរ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរាជការ គ្រូពេទ្យ កម្លាំងមានសមត្ថកិច្ច ប្រជាការពារ និងអ្នកពាក់ព័ន្ធទាំងអស់ក្នុងខេត្តសៀមរាប ក្នុងការទប់ស្កាត់ការឆ្លងរាលដាលជំងឺកូវីដ១៩ ក្នុងខេត្តសៀមរាបយ៉ាងមានប្រសិទ្ធភាព។
មានប្រសាសន៍នោះដែរ ក្នុងនាមរដ្ឋបាលខេត្ត លោក ពិន ប្រាកដ អភិបាលរងខេត្តសៀមរាប បានថ្លែងអំណរគុណចំពោះក្រុមហ៊ុនទាំងពីរ ដែលបានយកអំណោយមនុស្សធម៌ជាសម្ភារមួយចំនួនទៀត ប្រគល់ជូនរដ្ឋបាលខេត្តសៀមរាបនាពេលនេះ ស្របពេលដែលស្ថានភាពជំងឺកូវីដ-១៩ កំពុងធ្វើការឆ្លងរាតត្បាតនៅក្នុងប្រទេសកម្ពុជា ពិសេសនៅខេត្តសៀមរាប ខណៈពេលដែលរដ្ឋបាលខេត្ត កំពុងបង្កើនសកម្មភាពយ៉ាងខ្លាំងក្នុងការប្រយុទ្ធប្រឆាំងនិងជំងឺកូវីដ-១៩ សំខាន់លើវិធានការការពារ និងទប់ស្កាត់ការឆ្លងជំងឺកូវីដ-១៩ ឲ្យកាន់តែមានប្រសិទ្ធភាព ។
លោកអភិបាលរងខេត្តសៀមរាប បានបញ្ជាក់បន្ថែមទៀតថា ការប្រយុទ្ធប្រឆាំង និងការបង្ការទប់ស្កាត់ជំងឺកូវីដ-១៩ គឺជាបញ្ហារួមរបស់យើងទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ ទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃប្រជាពលរដ្ឋទូទៅ ត្រូវតែចូលរួមបង្ការទប់ស្កាត់ជម្ងឺឆ្លងដ៏កាចសាហាវនេះ ព្រោះបច្ចុប្បន្ននេះជម្ងឺនេះ បាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោកនៅឡើយ ដូច្នេះត្រូវគោរពប្រតិបត្តិឲ្យ ខាងតែបាន នូវវិធានការ ៣កុំ និង ៣ការពារ របស់ប្រមុខរាជរដ្ឋាភិបាល៕
