ស្មៅពើកដ៍ក្រាស់ឃ្មឹកដែលមានអាយុកាលជាច្រើនឆ្នាំ ស្ថិតនៅក្នុងទឹកកស្សិន្ធុក្រុងអង្គរធំ ពីខាងលិច ក្នុងសង្កាត់គោកចក ក្រុងសៀមរាប ត្រូវបានក្រុមការងារនៃអាជ្ញាធរជាតិអប្សរា ចាប់ផ្ដើមស្ដារចេញពីកស្សិន្ធុ ដើម្បីអភិរក្ស និងលើកតម្លៃប្រាង្គប្រាសាទបុរាណអោយមានភាពស្រស់ស្អាត និងទាក់ទាញអ្នកទេសចរ ជាពិសេសសម្រួលដល់ប្រព័ន្ធចរន្ដទឹកនៅក្នុងកសិ្សន្ធុ។
បើតាមឯកឧត្ដម យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា បានឲ្យដឹងនៅព្រឹកថ្ងៃទី២៧ ខែមេសា ឆ្នាំ២០២១នេះថា ស្មៅពើកនេះបានដុះក្នុងកស្សិន្ធុក្រុងអង្គរធំ ពីខាងលិចនិងឈាងខាងជើង ជាប់ខ្លោងទ្វារតាកាវ ដែលមានទំហំបណ្ដោយ១៥០០ម៉ែត្រ និងទំហំទទឹងជិត១០០ម៉ែត្រ មានអាយុកាលជាច្រើនឆ្នាំមកហើយ ព្រោះមិនធ្លាប់មានការស្ដារម្ដងណាឡើយ ដែលនេះជាការស្ដារលើកទី១ ខុសពីកសិ្សន្ធុទន្លេអុំមានការថែទាំនិងសំអាតរាល់ថ្ងៃ។ ការស្ដារនេះដោយប្រើដោយកំលាំងពលកម្មរបស់មនុស្ស និងប្រើប្រាស់សម្ភារៈធន់ស្រាល ដូចជាចងខ្សែទាញ មង ក្បូន ទូកអូសពើកចេញពីទឹកជាដើម។ ការសា្ដរសាកល្បងដំបូងនេះ អាចប្រើរយៈពេលច្រើនខែ អាចពី៥ខែទៅ៦ខែទើបរួចរាលល់ ខណៈដែលស្មៅពើកនេះមានកម្រាស់ពីកន្លះម៉ែត្រទៅមួយម៉ែត្រ ការយកពើកចេញពីទឹកកសិ្សន្ធនេះ មិនមានផលប៉ះពាល់ដល់ជីវៈចម្រុះរបស់សត្វ ក៍ដូចជាដល់ប្រាង្គប្រាសាទបុរាណនោះឡើយ។
ឯកឧត្ដម យិត ចាន់ដារដ្ឋ បន្ថែមថា គម្រោងសា្ដរពើកសាកល្បងនេះ បានចាប់ផ្ដើមកាលពីថ្ងៃទី២៦ ខែមេសា ក្រោយពេលមានការចូលរួម និងគាំទ្រថវិកាផ្ទាល់ខ្លួនពីសប្បុរសជន រួមមាន លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងមួយរដ្ឋសភា ព្រឹទ្ធសភា និងអធិការកិច្ច ,លោកជំទាវ សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ ព្រមទាំងសប្បុរសជនជាច្រើនទៀត ដើម្បីរួមចំណែកលើកស្ទួយវប្បធម៌ ប្រាង្គប្រាសាទបុរាណនៅក្នុងកសិន្ធុក្រុងអង្គរធំ ដើម្បីទុកជាប្រយោជន៍ដល់កិច្ចការអភិរក្ស ជាពិសេសជួយលើកស្ទួយដល់ទេសភាពក្នុងតំបន់អង្គរ សម្រាប់ទាក់ទាញអ្នកទេសចរ និងជួយសម្រួលដល់ចរន្ដទឹកក្នុងកស្សិន្ធុក្រុងអង្គរធំផងដែរ ខណៈដែកស្ថានភាពក្រាស់ឃ្មឹកនៃពើកជាច្រើនឆ្នាំនេះ បានធ្វើអោយប៉ះពាល់ដល់ទេសភាពនៅប្រាសាទបុរាណ ៕
អត្ថបទ និងរូបភាព៖និង បូ សាវី
