ដើម្បីចូលរួមចំណែកជាមួយរាជរដ្ឋាភិបាលកម្ពុជា ជាពិសេសរដ្ឋបាលខេត្តសៀមរាប សម្រាប់ប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩ នៅព្រឹកថ្ងៃទី២៨ ខែមេសា ឆ្នាំ២០២១នេះ លោក ពិន ប្រាកដ អភិបាលរងខេត្ត តំនាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានទទួលអំណោយជាគ្រឿងឧបភោគ បរិភោគពីសប្បុរសជនក្នុងខេត្ត ដើម្បីចូលរួមប្រយុទ្ធប្រឆាំងជំងឺកូវីដ-១៩ ដោយក្នុងនោះរួមមាន៖ សមាគម BNI Siem Reap បាននាំយកអង្ករ ១តោន ,មី ៦០កេស ,ត្រីខ ៦កេស និងគ្រឹះស្ថានមីក្រូហិរញ្ញវត្ថុ ហ្គោលដិនឃែស ភីអិលស៊ី បាននាំយកនូវអង្ករ ៥០០គក្រ ,មី ១០កេស ,ទឹកសុទ្ធ ២០កេស ,ទឹកត្រី ១០យួរ ,ទឹកស៊ីអ៉ីវ១០យួ ,ស្កសរ ១០គក្រ និង អំបិល១០គក្រ ។
លោក ពិន ប្រាកដ បានបញ្ជាក់ថា បញ្ហាការប្រយុទ្ធប្រឆាំង និងការបង្ការទប់ស្កាត់ជំងឺកូវីដ-១៩ គឺជាបញ្ហារួមរបស់យើងទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ ទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ និងប្រជាពលរដ្ឋទូទៅ គឺត្រូវតែចូលរួមបង្ការទប់ស្កាត់ជំងឺឆ្លងដ៏កាចសាហាវនេះ ព្រោះបច្ចុប្បន្នជំងឺកូវីដ-១៩ បាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោកនៅឡើយ។ បច្ចុប្បន្នរដ្ឋបាលខេត្តក៏បាននឹងកំពុងយកចិត្តទុកដាក់អនុវត្តវិធានការបង្ការ ទប់ស្កាត់ការឆ្លងរីករាលដាលជំងឺកូវីដ-១៩ ចូលដល់សហគមន៍ តាមបទបញ្ជារបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល ក៏ដូចជាក្រសួងមហាផ្ទៃបានយ៉ាងល្អប្រសើរ។
ជាមួយនោះក្នុងនាមរដ្ឋបាលខេត្ត លោក ពិន ប្រាកដ ក៏បានថ្លែងអំណរគុណចំពោះ សមាគម BNI Siem Reap និងគ្រឹះស្ថានមីក្រូហិរញ្ញវត្ថុ ហ្គោលដិនឃែស ភីអិលស៊ី ដែលបានផ្តល់ជូននូវសម្ភារៈបម្រើការក្នុងយុទ្ធនាការប្រយុទ្ធប្រឆាំងបង្កា ទប់ស្កាត់ជំងឺកូវីដ១៩ ដល់រដ្ឋបាលខេត្តសៀមរាប ។ ចំពោះសម្ភារៈទាំងអស់នេះអាជ្ញាធរខេត្ត ក៏នឹងផ្តល់នូវសម្ភារៈ និងឧបករណ៍ប្រើប្រាស់ទាំងនេះជូនទៅតាមបណ្តាក្រុង/ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងរាជធានីខេត្ត ដែលជួបនូវហានីភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុង/ស្រុក ជាពិសេសតំបន់បិទខ្ទប់ក្នុងភូមិសាស្ត្រសង្កាត់ទាំង៣ ក្នុងក្រុងសៀមរាប។
ព័ត៌មានជាតិ ថ្មីៗ
ក្នុងឱកាសនោះដែរ លោកអភិបាលរងខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ ជាពិសេសបងប្អូនជាម្ចាស់សណ្ឋាគារ ផ្ទះសំណាក់ ភោជនីយដ្ឋាន រមណីដ្ឋាននានា ត្រូវរៀបចំធ្វើការសម្អាតសម្លាប់មេរោគនៅតាមទីតាំងរបស់ខ្លួនឲ្យបានល្អ ក្នុងការទទួលស្វាគមន៍ភ្ញៀវទេសចរណ៍ឡើងវិញ នៅក្នុងបរិបទកូវីដ-១៩ ជាមួយនឹងការរស់នៅតាមបែបគន្លងថ្មី (The New Normal) និង សូមបងប្អូនត្រូវចូលរួមអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាល ឲ្យបានខ្ជាប់ខ្ជួនទៀតផង៕
