ក្នុងឱកាសចែកអំណោយមនុស្សធម៌ដល់ក្រុមអ្នករត់ម៉ូតូរ៉ឺម៉កក្នុងក្រុងសៀមរាប ដែលកំពុងខ្វះខាតស្បៀងក្នុងដំណាក់កាលការរាតត្បាតជំងឺកូវីដ-១៩ កាលពីព្រឹកមិញនេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានបញ្ជាក់ថា រដ្ឋបាលខេត្តសៀមរាប នឹងបន្តការចាក់វ៉ាក់សាំងការពារជំងឺកូវីដ-១៩ ជូនបងប្អូនប្រជាពលរដ្ឋ ដែលកំពុងប្រកបរបរប្រឈមផ្ទាល់ជាមួយវិស័យទេសចរ ដូចជាមគ្គុទ្ទេសក៍ទេសចរណ៍ជាដើម និង ជូនដល់ពលរដ្ឋគ្រប់រូប ក្នុងករណីមានវ៉ាក់សាំងមកជាបន្តបន្ទាប់ទៀតនោះ ខណៈកន្លងមក ក្រុមអ្នករត់ម៉ូតូរ៉ឺម៉កចំនួនជាង៤០០នាក់ បានទទួលការចាក់វ៉ាក់សាំងលើកទី១ និងលើកទី២រួចហើយនោះ ។
ឯកឧត្តម ទៀ សីហា មានប្រសាសន៍ទៀតថា យុទ្ធនាការនៃការចាក់វ៉ាក់សាំងជូនបងប្អូនប្រកបរបរក្នុងវិស័យសេដ្ឋកិច្ចក្រៅប្រព័ន្ធនេះ គឺជាការយកចិត្តទុកដាក់របស់រាជរដ្ឋាភិបាល ក៏ដូចជាអាជ្ញាធរខេត្ត សម្រាប់បង្ការជំងឹកូវីដ-១៩ ជូនដល់ប្រជាពលរដ្ឋគ្រប់រូប ជាពិសេស គឺដើម្បីត្រៀមខ្លួនក្នុងការស្ដារសេដ្ឋកិច្ចខេត្តសៀមរាបឡើងវិញ ក៏ដូចជាត្រៀមទទួលស្វាគមន៍ភ្ញៀវទេសចរនៅត្រីមាសទី៤ ឆ្នាំ២០២១ខាងមុខនេះផងដែរ ។
ឯកឧត្តមអភិបាលខេត្តសៀមរាប មានប្រសាសន៍បន្ថែមទៀតថា ការឆ្លងរាលដាលជាសកលនៃជំងឺជំងឺកូវីដ-១៩ ពិសេស ក្នុងព្រឹត្តិការណ៍សហគមន៍២០កុម្ភៈនេះ បានបង្កផលប៉ះពាល់ជាក់ស្ដែងដល់ជីវភាពរស់នៅរបស់បងប្អូនប្រជាពលរដ្ឋ និង បានធ្វើឱ្យអ្នកប្រកបរបរសេដ្ឋកិច្ចក្រៅប្រព័ន្ធរងគ្រោះធ្ងន់ធ្ងរ ដែលធ្វើឱ្យពិបាកក្នុងការរកប្រាក់ចំណូលដោះស្រាយជីវភាពប្រចាំថ្ងៃផងដែរ តែយ៉ាងណាក៏ដោយ ដើម្បីទប់ស្កាត់ការឆ្លងរាលដាលនៃជំងឺនេះ សូមបងប្អូនប្រជាពលរដ្ឋទាំងអស់ ត្រូវអនុវត្តឲ្យបានម៉ត់ចត់ និងខ្ជាប់ខ្ជួន នូវវិធានការនានារបស់ក្រសួងសុខាភិបាល ជាពិសេសវិធានការរបស់រាជរដ្ឋាភិបាល ៣ការពារ គឺ ១.ពាក់ម៉ាសគ្រប់ពេល , ២. លាងដៃឱ្យបានញឹកញាប់ , ៣. រក្សាគម្លាតបុគ្គល និង ៣កុំ គឺ១. កុំទៅកន្លែងមនុស្សច្រើន , ២. កុំនៅកន្លែងបិទជិត , ៣. កុំប៉ះពាល់ ឬចាប់ដៃគ្នា ។
គួររំលឹកថា កាលពីព្រឹកថ្ងៃទី២៩ ខែមេសា ឆ្នាំ២០២១នេះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានអញ្ជើញជាអធិបតីក្នុងពិធីចែកអំណោយមនុស្សធម៌ របស់សាខាកាកបាទក្រហមកម្ពុជាខេត្ត ជូនដល់ក្រុមអ្នករត់ម៉ូតូរ៉ឺម៉កក្នុងក្រុងសៀមរាប ដែលកំពុងខ្វះខាតស្បៀងក្នុងដំណាក់កាលការរាតត្បាតជំងឺកូវីដ-១៩ ចំនួន៤៤១គ្រួសារ នៅមន្ទីរពេទ្យបង្អែកខេត្តសៀមរាប ដែលក្នុងមួយគ្រួសារៗទទួលបានអង្ករចំនួន៣០គីឡូក្រាម , មី១កេស , ត្រីខ១យួរ , ទឹកត្រី និងទឹកស៊ីអ៊ីវ១យួរ រីឯក្រុមហ៊ុន បាលិលេយ្យ បានជូនបាយ១ប្រអប់ និងដបបាញ់អាកុល ១ផងដែរ ៕
អត្ថបទ និង រូបភាព ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
