នៅយប់ថ្ងៃទី២៩ ខែមេសា ឆ្នាំ២០២១នេះ រដ្ឋបាលខេត្តសៀមរាប បានបង្ហាញថា បានរកឃើញករណី អ្នកវិជ្ជមានកូវីដ-១៩ចំនួន ១៥នាក់ និងត្រូវបានដាក់ឱ្យធ្វើចត្តាឡីស័ក។
តាមរយៈសេចក្តីប្រកាសព័ត៌មានដដែលនេះ បញ្ជាក់ថា ចំនួន ១៣ករណី ជាករណីនៅចូល មកពី រាជធានីភ្នំពេញ, ខេត្តព្រះសីហនុ, ព្រៃវែង និងកំពង់ធំ រីឯ ២ករណីទៀត ជាករណីក្នុងខេត្តសៀមរាប ស្ថិតនៅភូមិតាវៀន សង្កាត់សាលាកំរើក, និងភូមិធ្លកអណ្តូង សង្កាត់ស្លក្រាម។
សេចក្តីប្រកាសនេះ ក៏បានបញ្ជាក់ដែរថា គណៈបញ្ជាការឯកភាពខេត្ត បាននិងកំពុង ស្រាវជ្រាវរកអ្នកពាក់ព័ន្ធ នឹបុគ្គលទាំង១៥នាក់នេះ និងបានអំពាវនាវដល់ប្រជាពលរដ្ឋ ដែលបានប៉ះពាល់ដោយផ្ទាល់ ឬប្រយោល ជាមួយបុគ្គលដូចដែលមានបង្ហាញឈ្មោះនេះ សូមរួសរាន់ដាក់ខ្លួនឱ្យនៅដាច់ឡែក កុំប៉ះពាល់អ្នកដទៃ និងធ្វើចត្តាឡីស័កនៅផ្ទះរៀងៗខ្លួន។
ជាមួយនោះ រដ្ឋបាលខេត្តសៀមរាប ក៏បានរំលឹកដល់ប្រជាពលរដ្ឋទងអស់ ត្រូវគោរព និងអនុវត្តន៍នូវកាតព្វកិច្ចពាក់ម៉ាស់ កាតព្វកិច្ចរក្សាគម្លាតសុវត្ថិភាព វិធានការបិទខ្ទប់ បម្រាមគោចរ និងវិធានការដទៃទៀតដែលរដ្ឋបាលខេត្ត បានដាក់ចេញ ចៀសវាងការផ្ដន្ទាទោសអន្តរកាល និងដាក់ពន្ធនាគារ តាមផ្លូវច្បាប់។
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
