នៅថ្ងៃទី៦ ខែឧសភា ឆ្នាំ២០២១ រដ្ឋបាលខេត្តខេត្តសៀមរាប បានជូនដំណឹងពីការធ្វើនិរាករណ៍សេចក្ដីសម្រេច លេខ០០៧/២១ និងគោរពតាមសារសំឡេងពិសេសរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ជូនដល់ឯកឧត្តម លោកជំទាវអភិបាលរាជធានី-ខេត្ត ក្នុងការសម្រួលដល់ការធ្វើដំណើរ និងរស់នៅប្រចាំថ្ងៃ ក្នុងខេត្តសៀមរាប សំដៅធានាស្ថិរភាពនៃដំណើរការជាប្រក្រតីផ្នែកសង្គម សេដ្ឋកិច្ច។
យោងតាមអនុសាសន៍ដ៏ខ្ពង់ខ្ពស់ របស់សម្ដេចតេជោ បានណែនាំដល់ឯកឧត្តម លោកជំទាវអភិបាលរាជធានី-ខេត្ត ទូទាំងប្រទេស ត្រូវកែសម្រួលខ្លឹមសារសេចក្ដីសម្រេច ក្នុងដែនសមត្ថកិច្ចរបស់ខ្លួន ក្នុងការរឹតបណ្ដឹងលើការធ្វើដំណើរឆ្លងកាត់ និងចូលមកកាន់បណ្ដារាជធានី-ខេត្ត ដែលអាចតម្រូវឱ្យធ្វើចត្តាឡីស័ក និងការផ្ដល់សំណាក ដើម្បីស្វែងរកមេរោគកូវីដ-១៩។
ក្នុងនោះសម្តេចតេជោ ក៏បានបញ្ជាក់ផងដែរថា ការសម្រួលឱ្យធ្វើដំណើរទៅកាន់បណ្ដារាជធានី-ខេត្តនេះ ពុំមែនលើកលែងដល់អ្នកធ្វើដំណើរទូទៅដោយគ្មានការត្រួតពិនិត្យនោះឡើយ។
យោងតាមអនុសាសន៍ដ៏ខ្ពង់ខ្ពង់សម្ដេចតេជោនេះ រដ្ឋបាលខេត្ត បានបន្តយកចិត្តទុកដាក់ខ្ពស់ ដោយបន្តអនុវត្តន៍ច្រកត្រួតពិនិត្យសុខភាពបឋម និងស្រង់ស្ថិតិអ្នកធ្វើដំណើរនៅព្រំប្រទល់ខេត្ត សៀមរាប-កំពង់ធំ , សៀមរាប-បន្ទាយមានជ័យ ព្រមទាំងបានបន្ថែមមួយច្រកទៀត គឺនៅព្រំប្រទល់ខេត្ត សៀមរាប-ឧត្តរមានជ័យ ដើម្បីស្វែងរកអ្នកមានហានិភ័យចម្លងមេរោគកូវីដ-១៩។
ជាមួយគ្នានេះ រដ្ឋបាលខេត្តសៀមរាប សូមជម្រាបជូនបងប្អូនប្រជាពលរដ្ឋ ចូលរួមអនុវត្តន៍វិធានការ ៣ការពារ ៣កុំ ដើម្បីចូលរួមទប់ស្កាត់ការចម្លងជំងឺកូវីដ-១៩។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
រូបភាព៖ មន្ត្រីមន្ទីរព័ត៌មាន
អត្ថបទ៖ សេង ផល្លី
