កាលពីរសៀលថ្ងៃទី០៦ខែ ឧសភា ឆ្នាំ២០២១ម្សិលមិញនេះ លោកជំទាវ ស៊ិន ណម អនុប្រធានសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តសៀមរាប និង សហការី បានប្រគល់ជូនអំណោយជាគ្រឿងឧបភោគបរិភោគ និង ថវិកា រួមមាន ៖ អង្ករចំនួន ២.០៥០គីឡូក្រាម , មី ១២៥កេសតូច , ទឹកស៊ីអ៊ីវ ១២៥យួរ , ទឹកត្រី ១២៥យួរ , ត្រីខ ១២៥យួរ និង ថវិកា ២.៥០០.០០០ រៀល ជូនដល់អនុសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ស្រុកចំនួន៥ ក្នុងនោះមានស្រុកស្រីស្នំ , អង្គរជុំ , វ៉ារិន , បន្ទាយស្រី និង ស្រុកស្វាយលើ ដើម្បីយកចែកជូនបន្តដល់គ្រួសារស្ត្រីក្រីក្រ សរុបចំនួន១២៥ គ្រួសារ ដែលជាសកម្មការងារនៅមូលដ្ឋាន ។
លោកជំទាវ ស៊ិន ណម បានមានប្រសាសន៍ថា អំណោយទាំងអស់នេះ គឺបានមកពីការរួបរួមសាមគ្គី និង ធ្វើការទំនាក់ទំនង សហការជាមួយអាជ្ញាធរមូលដ្ឋាន អង្គការជាតិ អន្តរជាតិ សប្បុរសជន សប្បុរសធម៌ (កាកបាទក្រហម) វិស័យឯកជន និងម្ចាស់ជំនួយផ្សេងៗទៀត ដើម្បីស្វែងរកការគាំទ្រផ្នែកស្មារតី ធនធាន ដែលជាកត្តាសំខាន់ក្នុងការរួម ចំណែកឆ្លើយតបទៅនឹងសេចក្តីត្រូវការរបស់បងប្អូនប្រជាពលរដ្ឋ ក្នុងពេលដែលកំពុងជួបនូវវិបត្តិជំងឺកូវីដ-១៩ ព្រោះបច្ចុប្បន្ននេះជំងឺកូវីដ-១៩ កំពុងឆ្លងរាលដាលខ្លាំងក្នុងព្រឹត្តិការណ៍សហគមន៍ ២០កុម្ភៈ ដូច្នេះតាមរយៈនេះ សូមធ្វើការណែនាំដល់បងប្អូនប្រជាពលរដ្ឋនៅមូលដ្ឋាន ឲ្យអនុវត្តឲ្យបានខ្ជាប់ខ្ជួននូវវិធានការអប់រំរបស់ក្រសួងសុខាភិបាល ជាពិសេសវិធានការរបស់រាជរដ្ឋាភិបាល គឺ៣ការពារ និង ៣កុំ ៕
អត្ថបទ និង រូបភាព ៖ ទ្រា ពន្លឺ
កែសម្រួលអត្ថបទ ៖ លោក លីវ សាន្ត
