ជនសង្ស័យចំនួន០២នាក់ត្រូវបាន កម្លាំងសមត្ថកិច្ចស្រុកប្រាសាទបាគង ឃាត់ខ្លួនកាលពីវេលារសៀលថ្ងៃទី០៨ ខែឧសភាឆ្នាំ២០២១កន្លងមក ពាក់ពន្ធ័ទៅនឹងករណីលួចឈូសឆាយ និងកាប់ទន្រ្ទានព្រៃលិចទឹក ដែលជាជម្រកត្រីពងកូនននៅរដូវវស្សា ស្ថិតក្នុងចំណុចទំនប់កញ្ចូន និងទំនប់កូនស្មន់ ភូមិឃុនមោឃ ឃុំកណ្ដែក ស្រុកប្រាសាទបាគង ខេត្តសៀមរាប ។
លោក វរ:សេនីយ៍ឯក លឹម សម្បត្តិ អធិការ នៃអធិការដ្ឋាននគរបាលស្រុកប្រាសាទបាគងមានប្រសាសន៍ឱ្យដឹងតាមទូរស័ព្ទ នារសៀលថ្ងៃទី១០ ខែឧសភា ឆ្នាំ២០២១ថា៖ បន្ទាប់ពីទទួលបានសេចក្តីរាយការណ៍ កម្លាំងនគរបាលស្រុក បានចេញប្រតិបត្តការបង្ក្រាប ហើយឃាត់ខ្លួនបានជនសង្ស័យចំនួន០២នាក់ ពាក់ពន្ធ័នឹងករណីលួចឈូសឆាយ និងកាប់ទន្រ្ទានព្រៃលិចទឹកដែលជាជម្រកត្រីពងកូននៅរដូវវស្សា។ ដោយអនុវត្តតាមការណែនាំរបស់លោកឧត្តមសេនីយ៍ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប និងលោក សូរ ប្លាតុង ប្រធានគណ:បញ្ជាការឯកភាពរដ្ឋបាលស្រុកប្រាសាទបាគង។
លោក អធិការបន្តែមថា៖ ជនសង្ស័យទី១បានសារភាពថា នៅថ្ងៃកើតហេតុខាងលើ ខ្លួនពិតជាបាន ធ្វើការកាប់ឆ្ការទន្រ្ទានព្រៃសហគមន៍ ដែលជាតំបន់ហាមឃាត់ពិតមែន និងធ្លាប់បានដុតព្រៃបរិវេណនេះពីមុនផងដែរ ។ ចំណែកជនសង្ស័យទី២ បានឆ្លើយសារភាពថា ខ្លួនពិតជាបានទៅលើកភ្លឺ និងកាប់ទន្ទា្រនដីសហគមន៍ហាមឃាត់ពិតមែន ជាមួយគ្នានេះកាលពីជាងកន្លះខែមុននេះខ្លួនក៏ធ្លាប់បានអោយប្អូនថ្លៃឈ្មោះឌឹម សុខា ភេទប្រុស រស់នៅភូមិច្រេស ឃុំកណ្ដែក ស្រុកប្រាសាទបាគង ជួលត្រាក់ទ័រចំនួន០២គ្រឿងអោយរុញព្រៃនិងភ្ជួរលើដីនេះផងដែរ។ ជនសង្ស័យទាំងពីររួមមាន៖ -ជនសង្ស័យទី១/ឈ្មោះដឹង ដន ភេទប្រុស អាយុ៣៨ឆ្នាំ នៅភូមិឃុនមោឃ ឃុំកណ្ដែក ស្រុកប្រាសាទបាគង ខេត្តសៀមរាប ,ទី២/ឈ្មោះសេង សឿយភេទប្រុស អាយុ៤១ឆ្នាំ នៅភូមិគោកក្រសាំង សង្កាត់ស្វាយដង្គំ ក្រុងសៀមរាប ខេត្តសៀមរាប។
លោក អធិការស្រុកបញ្ជាក់ថា៖ តាមចម្លើយសារភាព និងវត្ថុតាងដែលដកហូតបាន បច្ចុប្បន្នជនសង្ស័យទាំង០២នាក់ខាងលើរួមទាំងវត្ថុតាង ត្រូវបានកម្លាំងនគរបាលស្រុកប្រាសាទបាគង សហការជាមួយខ័ណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប កសាងសំណុំរឿង បញ្ជូនទៅនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប ដើម្បីចាត់ការបន្តតាមនិតិវិធីច្បាប់៕
អត្ថបទ និងរូបភាព៖ យូ វង្ស
កែសម្រួល៖លីវ សុខុន
