នៅព្រឹកថ្ងៃទី១៣ ខែឧសភា ឆ្នាំ២០២១ លោក ពិន ប្រាកដ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប បានទទួលជាគ្រឿងឧបភោគបរិភោគ ពីក្រុមហ៊ុនអង្គរគ្រីស្តាល់សូយ៉ាដា និង ភោជនីយដ្ឋាននាងពួនមនោរម្យ ក្នុងនោះមាន ៖ អង្ករ ១តោន , មី៥០កេស , ត្រីខ ៥កេស , ទឹកស៊ីអ៊ីវ ២៥កេស និង ថវិកាចំនួន ១ពាន់ដុល្លារអាមេរិក ។
តំណាងក្រុមហ៊ុនគ្រីស្តាល់សូយ៉ាដា និងភោជនីយដ្ឋាន នាងពួនមនោរម្យ បានលើកឡើងថា ដោយសារវិបត្តិជំងឺកូវីដ-១៩ បានធ្វើឲ្យប៉ះពាល់ដល់ជីវភាពពលរដ្ឋទូទៅ ដែលការប៉ះពាល់នេះ គឺជាបន្ទុកដ៏ធំរបស់រាជរដ្ឋាភិបាល និងថ្នាក់ដឹកនាំស្ថាប័នជាតិ ដូច្នេះការប្រគល់ជូនគ្រឿងឧបភោគបរិភោគទាំងនេះ ជាការជួយសម្រាលបន្ទុកដល់រដ្ឋបាលខេត្ត ដើម្បីយកទៅជួយសម្រាលបន្ទុក និង ជួយដោះទ័លជូនដល់ប្រជាពលរដ្ឋដែលជួបការខ្វះខាតជាក់ស្តែង និង បងប្អូនដែលកំពុងធ្វើចត្តាឡីស័ក នៅតាមមណ្ឌលក្រុង ស្រុក ។
មានប្រសាសន៍ក្នុងឱកាសនោះ ក្នុងនាមរដ្ឋបាលខេត្ត និងក្នុងនាម ឯកឧត្តម ទៀ សីហា អភិបាលខេត្តសៀមរា លោក ពិន ប្រាកដ បានបង្ហាញនូវក្តីសោមនស្សរីករាយ ចំពោះទឹកចិត្តដ៍ឧត្តុង្គឧត្តម របស់ក្រុមហ៊ុន អង្គរគ្រីស្តាល់សូយ៉ាដា និង ភោជ្ជនីយដ្ឋាននាងពួនមនោរម្យ រួមទាំងសប្បុរសជនដែលបានលះបង់នូវធនធានផ្ទាល់ ចូលរួមយ៉ាងធំធេងក្នុងពេលដែលយើងទាំងអស់គ្នាកំពុងប្រឈម និងជួបការលំបាកដោយសារវិបត្តិជំងឺ កូវីដ១៩ ដើម្បីចូលរួមចំណែកជាមួយរាជរដ្ឋាភិបាល ក៏ដូចជារដ្ឋបាលខេត្តសៀមរាប ។
លោក ពិន ប្រាកដ សន្យាថា រដ្ឋបាលខេត្តសៀមរាប នឹងយកអំណោយទាំងអស់នេះ ឲ្យដល់គោលដៅសំខាន់ៗ និងបែងចែង ផ្តល់ជូនប្រជាពលរដ្ឋ ដែលបានកំពុងធ្វើចត្តាឡីស័ក និង ពលរដ្ឋខ្វះខាតនៅ ក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ១៩ នៅក្នុងខេត្តសៀមរាប ក្នុងព្រឹត្តិការណ៍ ២០កុម្ភៈទៅតាមលទ្ឋភាពដែលរដ្ឋបាលខេត្តមាន ៕
អត្ថបទ និង រូបថត ៖ ជា ស្រស់
កែសម្រួលអត្ថបទ ៖ លីវ សាន្ត
