ក្នុងកិច្ចប្រជុំតាមវីដេអូZoom ជាមួយក្រុមប្រឹក្សាសកម្មភាពជនពិការខេត្តសៀមរាប នាព្រឹកថ្ងៃទី១៣ ខែឧសភា ឆ្នាំ២០២១នេះ ឯកឧត្តម អ៊ុង សម្បត្តិ អគ្គនាយករងក្រុមប្រឹក្សាសកម្មភាពជនពិការកម្ពុជា បានថ្លែងកោតសរសើរដល់អាជ្ញាធរ និងក្រុមប្រឹក្សាសកម្មភាពជនពិការខេត្តសៀមរាប ដែលបានផ្តល់ការគាំទ្រ ជាថវិកាបណ្តុះបណ្តាលជំនាញ លើកកម្ពស់សិទ្ធិ និងការស្តាលទ្ធភាពដល់ជនពិការក្នុងខេត្តសៀមរាប និង ជាខេត្តមួយដែលគាំទ្រខ្លាំងដល់ជនពិការដូចជា បង្កើតឱ្យមានសាលាគរថ្លង់ , មជ្ឈមណ្ឌលស្តាលទ្ធភាពពលកម្មកាយសម្បទាជនពិការ ហើយតាមវិស័យរដ្ឋ ឯកជន បានបង្កើតឱ្យមានជម្រាលសម្រាប់ជនពិការទៀតផង ដែលសកម្មភាពទាំងនេះ ស្តែងចេញពីការយកចិត្តទុកដាក់របស់ថ្នាក់ដឹកនាំខេត្តសៀមរាប និងការចូលរួមចំណែកយ៉ាងសកម្មរបស់វិស័យឯកជន ។
ឯកឧត្តម បន្តថា ការងារជួយដល់ជនពិការ គឺមិនមែនធ្វើនៅតែមន្ទីរសង្គមកិច្ច អតីតយុទ្ធជន និងយុវនីតិសម្បទានោះទេ គឺជាកិច្ចការដែលត្រូវធ្វើឡើងដោយពហុវិស័យ ដូច្នេះទាមទារឱ្យមន្ទីរ អង្គភាពរួមគ្នាជួយដល់ជនពិការ តាមវិស័យ និងជំនាញរបស់ខ្លួន ខណៈដែល រាជរដ្ឋាភិបាលកម្ពុជា ក៏កំពុងសិក្សា លើការធ្វើវិសោធនកម្មច្បាប់ ដើម្បីគាំទ្រ និងផ្តល់សិទ្ធិបន្ថែមដល់ជនពិការ ។
ក្នុងឱកាសនោះ លោក នាក់ ណេរ៉ុន អភិបាលរងខេត្ត និងជាប្រធានគណៈកម្មការក្រុមប្រឹក្សាសកម្មភាពជនពិការខេត្តសៀមរាប ក៏បានជំរុញឱ្យមន្ទីរអង្គភាពជុំវិញខេត្ត រៀបចំឱ្យកាន់តែប្រសើរឡើង និងកែលម្អសេវាមួយចំនួនដើម្បីជួយដល់ជនពិការ ស្របពេលដែលអាជ្ញាធរខេត្ត កំពុងសិក្សាបន្ថែមទៀត លើការផ្តល់ប័ណ្ណបើកបរដល់ជនពិការ និងការដាក់ផែនសកម្មភាពជនពិការក្នុងកិច្ចការអភិវឌ្ឍន៍ឃុំសង្កាត់ ។
ក្នុងឱកាសនោះដែរ លោកស្រី ANNE ROUE KHIEV ប្រធានកម្មវិធីរបស់អង្គការអាសេសប្រចាំនៅកម្ពុជា បានសម្តែងនូវការសាទរចំពោះអាជ្ញាធរខេត្តសៀមរាប ដែលបានបញ្ចេញថវិកា និងបានគាំទ្រយ៉ាងសកម្មដើម្បីជួយដល់ជនពិការ ក្នុងខេត្តរបស់ខ្លួន ខណៈដែលអង្គការអាសេស បានទទួលជំនួយពីរដ្ឋាភិបាលអូស្រ្តាលីគាំទ្រដល់សកម្មភាពជួយដល់ជនពិការ និងអំពើហិង្សាក្នុងគ្រួសារនៅក្នុងប្រទេសកម្ពុជា ហើយសកម្មភាពទាំងនេះ និងបន្តរយៈពេល២ឆ្នាំទៀតដើម្បីជួយដល់កម្ពុជា៕
អត្ថបទ និង រូបភាព៖ បុង ឆវន្ត
