ប្រធានសមាគមទេសចរណ៍ បានឱ្យដឹងថា អ្នកបំរើសេវាកម្មទេសចណ៍ខេត្ដសៀមរាប នៅមិនទាន់មានការរៀបចំសេវាកម្មទេសចរណ៍ រួមមានផ្ទះសំណាក់ សណ្ឋាគារ ភោជនីយដ្ឋាន ដើម្បីត្រៀមទទួលអ្នកទេសចរក្រោយបញ្ចប់ជំងឺកូវីដ១៩ នៅឡើយទេ ដោយអះអាងថា ការរៀបចំឡើងវិញនេះ ត្រូវការចំណាយថវិកាច្រើន និងកំពុងប៉ះពាល់ផ្លូវថ្នល់ដែលកំពុងអភិវឌ្ឍន៍។
លោក ហ្វីលីប កៅ ប្រធានសមាគមក្លឹបទេសចរណ៍សៀមរាប ហៅកាត់ថា STC បានឱ្យដឹងនៅព្រឹកថ្ងៃទី១៣ ខែឧសភានេះថា ក្រុមប្រតិបត្ដិករទេសចរណ៍បាននឹងកំពុងដាក់សំណើរទៅអាជ្ញាធរ និងក្រសួងពាក់ព័ន្ធ ដើម្បីសុំវ៉ាក់សាំងសម្រាប់ចាក់អោយក្រុមប្រតិបត្ដិករទេសចរណ៍ ជាមុនសិន ដើម្បីធ្វើយ៉ាងណាឱ្យពួកគាត់កាត់បន្ថយហានីភ័យនៃការឆ្លងជំងឺកូវីដ១៩។ បច្ចុប្បន្ននេះមានភ្ញៀវទេសចរតិចតួចបានទៅទស្សនា នៅតាមរមណីយដ្ឋានផ្សេងនៅក្នុងខេត្ដនេះ ក្រោយពេលដែលរាជរដ្ឋាភិបាល បានឱ្យដំណើរការឡើងវិញនៅនៅរមណីយដ្ឋានទេសចរណ៍នៅក្នុងស្រុកឡើងវិញ។ លោកបានបន្ដថា ចំណែកការបើកដំណើរការឡើងវិញនូវសេវាផ្ទះសំណាក់ សណ្ឋាគារ ឬការរៀបចំកន្លែងទេសចរណ៍ផ្សេងៗ នៅមិនទាន់បានរៀបចំអោយល្អដូចមុនការផ្ទុះជំងឺកូវីដ-១៩នៅឡើយទេ ហើយការបើកទេសចរណ៍ឡើងវិញ ប្រតិបត្ដិករទេសចរណ៍ត្រូវធានាសុវត្ថិភាពឲ្យបានដល់ផ្ញៀវទេសចរ។
ប្រធានមន្ទីរទេសចរណ៍ខេត្ដសៀមរាប លោក ង៉ូវ សេងកាក់ លោកមានប្រសាសន៍ស្រដៀងគ្នាដែរថា នៅក្នុងខេត្ដសៀមរាប បាននឹងកំពុងរៀបចំអភិវឌ្ឍន៍ផ្លូវ៣៨ខ្សែនៅក្នុងក្រុង ដែលផ្លូវខ្លះបានប៉ះពាល់ដល់សណ្ឋាគារ ដែលមិនអាចរៀបចំអោយបានល្អឡើងវិញបាន ខណៈដែលផ្លូវនោះកំពុងជួសជុល។ ដោយឡែកកន្លែងបំរើសេវាកម្មទេសចរណ៍ខ្លះ នៅក្នុងក្រុងនៅឆ្ងាយខេត្ដបន្ដបិទនៅឡើយង ដោយបារម្ភការឆ្លងជំងឺកូវីដ១៩នេះ។ លោកបានបន្ថែមថា ចំណែកអ្នកទេសចរក្នុងស្រុកមានតិចតួចបានទៅលេង និងកំសាន្ដនៅឆ្ងាយពីខេត្ដសៀមរាប ដូចជានៅតំបន់ទេសចរណ៍បឹងឈូក ស្រុកបន្ទាយ តំបន់ទេសចរណ៍ភ្នំគូលេន និងតំបន់ទេសសួនផ្កានានាដែលទើបបង្កើតថ្មីជាដើម ខណៈដែលនៅក្នុងតំបន់រណីយដ្ឋានអង្គរវិញមានអ្នកទេសចរក្នុងស្រុកទៅទស្សនាជាបន្ដបន្តាប់៕
អត្ថបទ និង រូបភាព៖ ឈិត សាវី
